3 1 Izhin bǝ tɔ ir nyɛr ndi Tetɛɛ ne tsar ta ne kɛ, te zhɔ ta te amumun Arik tei na yi amaa, waŋa ayi ki yiŋ ndi gɔŋmimi bane zhi ta ba, bane na zhi Arik ba. 2 Izhin akpa amuŋ, azizaŋa ta yi amumun abɛ Arik, bane zen atsar ta ir keŋ ndi ta tei yime ba. Ama ta ne zhi te te di Yesɔ ate muŋ aru ta tei yi ndi iwa, ta tei yigu ir keŋ ndi ayime. 3 Iwaŋ ndi a te nyak susun maa ben Kristi, ne nyak kpa maa tsetser yir keŋ ndi Yesɔ ayi tsetser.

4 Iner waŋ ndi ana zumimin ayi iner ne yaŋ zǝ lɛ kɛ Arik, zumimin iyi klik tu. 5 Izhin ne zhi ne nyɛ te abɛ nyɛ baŋ lalɛ mɔr agli tibɛ. Nǝ miŋ maa lalɛ ba yime ba. 6 Iwaŋ ndi ayi ne miŋ maa, ba na zumimin ba iwaŋ ndi ana zumimin, ba tei yigu ba, ba nena zhiu ba.

7 Izhineba amumun atsɔtsɔb, kǝr nuŋ abɛ duŋ zhin dur ba, iwaŋ ndi ana ki didik, ayi ner didik, ir keŋ ndi Almasihu ayi ne na ki didik 8 Iner ne na zumimin ayi ner ayou shetan. Inak men rɛ kukub ishetan ne yi nena zumimin. Waŋa ayi ki yiŋ ndi Izu Arik ne nyɛ te iwa abɛ nyɛ zǝr ndum kɛ shetan. 9 Iwaŋ ndi ate yi ŋli kɛ Arik, ba na zumimin kɔte mkpaŋ takɛ ba, ilɛ kɛ Arik yi ne susun maa, ba na zumimin ba, te ayi ŋli kɛ Arik. 10 Ne amɛ wa ta zhi abɛ yi amumun Arik, ben abaŋ ndi ayi abɛ shetan, iwaŋ ndi ba te na ki didik ba, ba yi ayou Arik ba ina yi amɛ ben waŋ ndi ba ne tanyɛme ben zumen ba.

11 Waŋa ayi lɛ keŋ ndi tane wɔ kɛ men rɛ kukub: tabǝ nyɛr akpa mɔr. 12 Kǝr tabǝ yi ndi Keinu waŋ ndi neyi ayou shetan te aŋun zumen Abila. Aye anii ne duŋu aŋunu? Ikiki yi na maa ne yi mimin iyi zumen ne yi didik. 13 Izhin bǝ duŋ vuŋ anu ba, amunzumɔr, ndi gɔŋmimi te kyak zhin. 14 Tane zhi tedi tane ka gar kam iku te yir vli, te ta nyɛr amunzumɔr. Waŋ ndi ba nyɛr zumen ba akɔsɔŋ ne min kɛ ku. 15 Waŋ ndi ate kyak zumen ayi ne ŋlɔk aneshir, izhin ne zhi waŋ ndi aŋlɔk aneshir ba yine vli kɛ yaŋ klɛ tu ba. 16 Waŋa ayi ir keŋ ndi tane zhi nyɛr iyime: Yesɔ Kristi ne nek tu maa ne tu amɔr. Taba mɔryi tabǝ nek atu mɔr ne atu ayi amunzumɔr. 17 Waŋ ndi ate yine adudunki te yik zumen ne min kɛ iyah te bane alɔ susun maa ba, nyɛr yi Arik itei na kikin te sɔŋ ben abɔu? 18 Izhin amumun amuŋ, tabǝ duŋ nyɛr yi bɛrenu ankyak tabǝ na kiki didik iyi yik ne yi 19 Ayi amɛ wa atei zhi te tayi abɛ tanyɛme ir keŋ ndi tane nyak asusun amɔr ne amkpa ane sɔŋ sik ne tii maa. 20 Ate yi ndi asusun amɔr ablaa ta tedi tane lalɛ. Tabǝ zhi te arik anaŋ asusun amɔr, nena zhi kɔte anii. 21 Izhin akpa amuŋ, ate yi ndi asusun amɔr adi bata ne lalɛ ba, ta yine zhɔk susun ben Arik 22 ta tei na ta kɔte anii ndi tate ben ir keŋ ndi tane nyak ilɛ maa ne asusun amɔr tena na kiki ndi ne duŋ susun maa bǝ sik. 23 Waŋa ayi di maa: abɛ tanyɛme ne sak kɛ Izu maa Yesɔ te ana tanyɛme ben zumen ir keŋ ndi ne di tama. 24 Abaŋ ndi azǝ iki ndi ne dii ayi ne miŋ maa, waŋa ayi ir keŋ ndi tane zhi ayi ne miŋ mɔr, tane zhi ne Izhu ndi ne nek ta.