1 Kɔte ŋɔwa ndi ate tanyɛme tedi Yesɔ wa ai Kristi me ayi ŋli kɛ Arik, fe iwaŋ ndi ate tanyɛme ben tetɛɛ nena tanyɛme ben zu maa. 2 Waŋa ayi kiyiŋ ndi tane zhi te tane tanyɛme ben amumun abɛ Arik: ne tanyɛme ben Arik tena gli inǝk lɛ maa. 3 Waŋa ayi tanyɛme iye Arik: abɛ zǝ nkanlɛ yi nek maa. Fena inǝk maa bai hru ba, 4 te kɔte ŋɔwa ndi ayi ŋli kɛ Arik anaŋ kiki yi gɔŋmimi. Waŋa ayi lieru ndi ne naŋ gɔŋmimi, kɔte tanyɛme mɔr. 5 Ayi ŋɔwa ndi ne naŋ gɔŋmimi? Ayi ner waŋ ndi ne tanyɛme bǝn Yesɔ te iwa ankyak ayi izu Arik.

6 Waŋa ayi wa ndi ne nyɛ ne amashir ben azhizhi Yesɔ Kristi. Yesɔ bane nyɛ ne amashir ankyak ba, ama ne amashir bǝn azhizhi. Fena ayi Izhu Tsetser wa ne duŋ azhi, te Izhu mɔ ai zub. 7 Fe iki tar ne blai: 8 Izhu Tsetser, amashir bǝn azhizhi; fe iki tar ma ne tanyɛme ne akpa. 9 Ta ne tanyɛme ne bla yi neshir, ama ibla yi Arik iyi yi ŋgɔŋɔ te ibla ye Arik, ai yi ne nǝk ta zhi Izu maa. 10 Iwaŋ ndi ate tanyɛme ben Izu Arik ayi ne tanyɛme ne susun maa. Iwaŋ ndi bate tanyɛme bǝn Arik ba ne di Arik atimu, te bane tanyɛme ne bla ye Arik ndi Yesɔ bai zu maa ba. 11 Waŋa ayi blama: Arik ne nǝk ta ivli kɛ yaŋ klɛtu, fena ivli kǝŋe iyi ne miŋ kɛ Zu maa. 12 Iwaŋ ndi ate yine Zu maa ayi ne vli kɛ yaŋ klɛtu; iwaŋ ndi Izu Arik bate yi ne miŋ maa ba ivli kɛ yaŋ klɛtu ba yi bene bɔu ba.

13 Nga mcɛr zhin iki yiŋɛ izhineba abɛ tanyɛme ne sak kɛ Izu Arik te duŋ zhin bǝ zhi te izhin yi ne ivli kɛ yaŋ klɛtu. 14 Iyiŋɛ yi ai zhɔk susun mɔr ndi ta yime neyi ben Arik: ndi ta te rib ikinuŋ ne tanyɛme maa, ai wɔ ta. 15 Fena tate zhi te Arik awɔta, tate rib kɔte nii tane zhi te atei nǝk ta ki yiŋ ndi nenai aŋyak ta bene abɔu.

16 Iner waŋ ndi ate yik zumen ayi ne miŋ kɛ lalɛ keŋ ndi bane mla kɛ ku ba, abɛ ben Arik atei nǝgu ivli. Mdi abaŋ ndi ilalɛ mǝne bane mla yi duŋ ba aku. Ilalɛ yi mla duŋ neshir ku iyime. Bam ndi te abɛ ben Arik ne yime ba. 17 Iyaŋ na kiki bɔbɔk ai lalɛ, fe ilalɛ nuŋ ba duŋ neshir aku ba.

18 Tane zhi te iner waŋ ndi ate yi ŋli kɛ Arik ba atei tsǝn ne miŋ kɛ lalɛ ba; iwaŋ ndi ate ŋliu ne nkɔŋ kɛ Arik aŋubu mgbamgbaŋ, fe ine na lɛ mimin bai nau kinuŋ ba. 19 Tane zhi te tayi amumun abɛ Arik, te igɔŋ mimi bɔbɔk iyi ne aŋɔk abɛ na ki mimin. 20 Tane nazhi te Izu Arik ne nyɛ tena nǝk ta izhi, te duŋ ta bǝ zhi waŋ ndi ayi zub, kɔ ne tu Izu maa Yesɔ Kristi. Iwa ayi Arik ine zub ben ivli kɛ iyaŋ klɛtu.

21 Izhineba amumun amuŋ, te zhin shaan ben arik ane yaŋ vli.