1 Neme amba, izhin bǝ nek alulum amin atu amin, te yi ndi anuŋ ne miŋ min ba zi lɛ kɛ Arik ba, iki yi na amba men ben lǝlɛ men itei duŋ alulum anuŋ azǝ Arik, 2 ate yik tsetser ben iki didik yi na min. 3 Irɛ min kɛ amba kǝr bǝ yi ne abɛm ankyak ba, iluk tu ben iki kɔr ne tɔŋ yi te anyaŋ ben nkluŋklu yi rɛ ŋgɔŋ. 4 Neme, izhin bǝ duŋ rɛ min bǝ rɛ miŋ asusun amin, ire kɛ yaŋ cɔkla kɛ zi tu zhɔk ben vuŋ kpa, waŋa ayi ki yiŋ ndi Arik anyɛri. 5 Waŋa ayi ir keŋ ndi amba tsetser abɛ kukub abɛ zǝ Arik ne duŋ, ne nek alulum amen atu men, 6 ndi Saratu, ne nek ilu maa Ibrai tu maa te zhɔu te ŋgɔŋ amaa. Izhin yi aŋɔ amaa ndi izhin te na iki didik, izhin bǝ duŋ tǝ sisik ba.

7 Alulum, izhineba ba min yi, izhin bǝ sɔŋsɔŋ didik ben amba min, izhin bǝ gli amba min ne ankɔŋ adidik ndi abɛ yaŋ mgbyamgbyaŋ abɛ li gadu bǝ abɛ zhin ne iki didik yi lieru, te kǝr ikinuŋ bǝ yar ben min yir aŋɔk Arik ba.

8 Ne klɛtu, bɔbɔk min, izhin bǝ sɔŋsɔŋ kɛ sik asusun ne akpa amin; izhin bǝ lɔ susun kɛ akpa, abɛ tanyɛme ne kpa, te nyɛr akpa ne zǝ tu zhɔk. 9 Waŋ ndi te na zhin iki mimin kǝr zhin bǝ nau mayi ba, ate yen zhin kǝr zhin bǝ yen yaa maa ba, ne me izhin bǝ nek ba anu adidik, te iyeme Arik ne zhɔ zhin te zhin bǝ ta anu adidik. 10 Amɛ,

<<Waŋ ndi te wɔb te wa abɛ wɔ men kɛ sɔŋ maa

Te na yik iber didik

Abɛ vuŋ anu maa gli ne ki mimin

Te na duŋ kam aŋa.

11 Abɛ duŋ na iki mimin te na iki didik;

Te na wɔb sɔŋ keke.

12 Tǝ ayi Arik ayi bǝn abɛ yi tsetser

Ana bu atɔŋ amaa te wɔ ben men,

Ama Arik akyak abɛ na iki mimin.>>

13 Iŋɔwa atei na zhin iki mimin ndi zhin te nek atu ne na iki didik? 14 Ama ate yi ndi izhin tei yik iyah ne na iki didik, izhin tei ta anu adidik. <<Kǝr izhin bǝ te sisik iki yiŋ ndi ate sisik maa ba; izhin bǝ duŋ te sisik ba.>> 15 Neme ne asusun amin izhin bǝ baŋ Kristi ayi Arik. Izhin bǝ na sɔŋ te bla kɔte ŋɔwa ndi arib zhin lɛ kɛ shur ayi amin ndi izhin yime ne kǝ. Ama izhin bǝ na amɛ ne zi tu zhɔk bǝn nek ŋgɔŋ. 16 Izhin bǝ duŋ idur min bǝ yi tsetser, te abaŋ ndi ayen zhin ne na iki didik ne ankɔŋ ayou Kristi shisha tei vuŋ ba ne wɔb cɔk asak amin la. 17 Itei rɛ, ate yi ndi ayi na Arik izhin bǝ yik ya ne na didik naŋ na iki mimin. 18 Te Kristi ne ku ne la lɛ mɔr mkpaŋ zhiin bɔbɔk, abɛ yi tsetser ben abɛ yaŋ yi tsetser, te bǝ gli ta aglii Arik ge. Ne ŋunu ne kpa, ama atei yi tsitsir ne Izhu, 19 ne izhu mɔ ne gar te kɔte du izhu abɛ ku ndi ayi ne jaru lɛ kɛ Arik 20 abaŋ ndi ne kyak zǝ lɛ kɛ Arik kukub ndi Arik ne vuŋ susun te ŋub ba ne bɛr yi Nuhu ndi ne zen na igu. Ne min gumɔ aneshir watsɔb, aneshir atender ankyak, ne li aru ne amashir, 21 amashir awaŋa ayi ndi isu aneshir yiŋ ndi ita zhin shur, ba gli irik iglirumɔ ne kpa min ba ama ne ben Arik ne susun didik. Ne lu Yesɔ Kristi ne bɛ, 22 iwaŋ ndi ne kɔmɔ ne gbarshu te yi ne ŋɔk li kɛ Arik ben abɛ shar amaa, mgbyamgbyaŋ ben ŋgɔŋ iyi ne ŋɔk maa.