1 Mcɛr anuŋkub ne miŋ mine, Mben zhin akpa amuŋ anuŋkub, ne yik iyah iyi Kristi ben iwaŋ ndi atei nek gab ŋgɔŋ keŋ ndi iyi bǝn kristi ne shu. 2 Izhin bǝ yi ndi abɛ kyu aneshir abaŋ ndi ne nek zhin ŋub bama, na zhin ndi abɛ blɛ amkpa, kǝr bǝ yi ndi asak zhin ne mgbyamgbyaŋ ba, ama ibǝ yi itanyɛme ne asusun amin, ndi Arik ata nyɛmɛ ne na mine; ba ne su ayi ne wɔb azɔb ba, ama ne tanyɛme min; 3 kǝr zhin bǝ yi ihru ne atu aye abaŋ ndi ne nek zhin ŋub bama ba, neme ubǝ duŋ ba baŋ nkɔŋ mi. 4 Fena ate yi ndi Ŋgɔŋ Yesɔ ne ŋub tama ate muŋ aru, izhin tei ta idǝk min ŋgɔŋ ndi ba tei ce ba.

5 Izhin amunanzak ben aŋɔ, ina yeme izhin bǝ nek anuŋkub ŋgɔŋ men. Bɔbɔk mine, izhin bǝ yi abɛ zi atu zhɔk ne akpamin, te,

<<Arik akyak abɛ lɛk atu

Te nek abɛ zhɔk atu ta zhɔk.>>

6 Fena, izhin bǝ yi abɛ zi atu zhɔk te duŋ Arik wa ai ka lɛk zhin ne mkpaŋ maa. 7 Lǝk zhin ayi tɔ Arik ne miŋ kɛ yik iyah min te Arik wa ai yi ŋub zhin ai na nek zhin iki yiŋ ndi izhin wɔ bǝ.

8 Izhin bǝ vuŋ kpa tena sɔŋ zhin atsitsir. Tǝ ine kyak zhin ayi waŋa shetan aŋur aka ndi zaki kɛ wɔb neshir ne vuŋ gbuŋa te ta. 9 Izhin bǝ kyagu, te tsǝ kli zhin mgbamgbaŋ ne tanyɛme, tena zhi te amunzumin ne gɔŋmimi bɔbɔk azǝn yik iyah ir yiŋ ndi ta yige ma.

10 Fena Arik ne nek aneshir ita zhɔk, waŋ ndi ne zhɔ zhin ne ŋgɔŋ kɛ yaŋ klɛ ne miŋ kɛ Kristi, ndi izhin te yik ivǝya iyi yaŋ baŋ mkpaŋ, Iwa ne tu maa atei gli zhin aŋyaga te duŋ zhin bǝ yi ne mgbamgbaŋ, te klik tena vuŋ kpa. 11 Ayi Arik wa Ŋgɔŋ yi maa kɛ yaŋ klɛ tu. Bǝ yeme.

12 Sila ne zɔk me cɛr ivǝ ilɛ kǝŋe, iwaŋ ndi myigu ayi zumɔr ne bla zub, Mne nak cɛr zhin watsɔb, Mnǝk zhin lɛ te kpamin bǝ ŋur klik te izhin bǝ nazhi te itanyɛme iyi Arik. Klɛ zhin mgbamgbaŋ amɛ.

13 Aner abɛ zǝ Arik abaŋ ndi ayi ne ntun yi Babila, abaŋ ndi ne hria ba ben abɛ zhin, ashar te bɛ tek zhine, izu muŋ Markus maayi atǝk zhin. 14 Tǝk zhin akpa min ne ku asa bǝn tanyɛme.

Isik susun iye Arik bǝ yi bǝn abɛ zhin bɔbɔk ne miŋ kɛ Kristi.