1 Nga Siman Biturus, igen ben ne na Yesɔ Kristi ndum,

Mcɛr zhin abaŋ ndi ne tanyɛme ne ki didik iyi Arik amɔr ben ne ta ta zhɔk Yesɔ Kristi iwaŋ ndi iwa ne tanyɛme maa ne nek ta didik tanyɛme ndi mɔr:

2 Ita zhɔk ye Arik ben isɔŋ kɛ sik bǝ yi min shaga ne izhi kɛ Arik ben Yesɔ Ŋgɔŋ amɔr.

3 Tǝ mgbyamgbyaŋ kɛ Arik ne nek ta kɔte nii ndi ta wɔ bǝ ne sɔŋ mɔr ben na gli Arik ne asusun ne Mgbemgbeb kɛ waŋ ndi ne zhɔ ta ne ŋgɔŋ ben na didik maa. 4 Nǝ na yiŋɛ, Arik ne nek ta kiki ngɔngɔŋ maa bǝn iyi baŋ susun didik ndi ne kpai aŋyak, te duŋ ne atu mǝne izhin bǝ yime ne miŋ kɛ sen yi kpa te lieru ne kpa kɛ lalɛ kǝkɛŋ ndi shetan atur kiki iyi duŋ aneshir ate bubu mɔ.

5 Ne atu ki yiŋɛ, nek tu mi te na ki ndi iduŋu tanyɛme mi bǝ yi didik; te ididik mi, izhi mi; 6 ben vuŋ kpa, ivuŋ susun; te zǝ Arik ŋgɔŋ; 7 naa amunya iki didik; te bɛ na ta nyɛmɛ ne akpa. 8 Ate yi ndi kiki iyi bla yiŋɛ uyime neyi tena nai ŋgɔŋ, itei duŋu klik ne nkɔŋ kɛ izhi Ŋgɔŋ Yesɔ Kristi. 9 Ama atei ndi inuŋ ba yime neyi ba, ayi ndi ner ndi ba yik gbagbaŋ ba tena yi amfik, te aŋur asuk ne ir keŋ ndi Yesɔ ne ŋlau lalɛ maa yi kukub.

10 Neme, amunya, izhin bɛ shur ayi ŋgɔŋ te duŋ ijɔ mine ben ir keŋ ndi Arik ne hria zhin bǝ yi anenen. Ndi izhin te zǝ kiki yiŋɛ, ba zhin tei zhaku ne tanyɛme mi ba, 11 fe Arik atei ta zhin aŋɔk ayaa ne kɔb ŋgɔŋ kɛ shu ndi Ŋgɔŋ ine ta ta zhɔk Yesɔ Kristi iwa atei gli iyaŋ klɛtu.

12 Fena M tei ben shu zhin kiki yiŋɛ, Mne zhi izhin ne zhi tena zhik ne kɛ zub ndi iyi anenen. 13 Myik irɛ tem nduŋ zhin bǝ shuzhi te mnak ri yime tsitsir ne kpa kǝŋe, 14 tem mne nzhi te bai baŋ mkpaŋ ba mbaŋ tu yaŋa, ndi Ŋgɔŋ amɔr Yesɔ Kristi ne tsar me ndende. 15 Fe M tei na kɔte nii tem yik mte kam goŋ yaŋa ba zhin tei ŋursuk ne kiki yiŋɛ ba.

16 Taba abɛ na ndum Yesɔ Kristi me ba tane bla zhin lɛ kɛ duk ijɔm ba kɔ kai Mgbemgbeb kɛ atu amɔr ba, ama ta bla zhin ki yiŋ ndi tane yik ne ayi amɔr te Yesɔ Kristi atei nyɛ Ŋgɔŋ maa. 17 Fena tane yi amɔ ndi ne ta ilɛk gli bǝn ŋgɔŋ ire bǝn Arik Tetɛɛ ndi ikɔr ne nyɛ netu maa ire Shu Ŋgɔŋ, te di, <<Waŋa ai Zumuŋ, ai wa Mtanyɛme; ben wa Myi ne zhɔk susun.>> 18 Taba mɔr yime tane wɔ kɔr keŋ ndi ne re shu ndi tane yi ben Yesɔ ne tu gbu tsetser.

19 Fena taba ne tanyɛme ne nkanlɛ yi aner abɛ Arik, te duŋ izhin bǝ klɛ anenen ne tsara, ndi ilaŋ amkpa ne miŋ kɛ bu, imla ne ŋan bɛr te duŋ cinces ye amblimblɛ bǝ laŋ yir miŋ asusun amin. 20 Nǝ klɛ tu, izhin bǝ zhi te abaŋ ndi ne bla nek ilɛ kɛ Arik bai Mgbemgbeb kinuŋ kɛ nek izhi ilɛmɛ ba ai nek iyi tɔ ti ne lɛ kɛ Arik. 21 Tǝ bla tɔ ti ba yi ne mkpaŋ tiŋ ba ne na iyi neshir, ama aner abaŋ ndi Arik wa ne anǝk ba Izhu Tsetser maa.