1 Nga Biturus mcɛr zhin akpa amuŋ, waŋa ayi mplɛ kɛ yaa ndi mcɛr zhin. Mne ncɛrǝ yayaa ma te izhin bǝ shuzhi te zhin bǝ lu klɛ mgbamgbaŋ ne kiki ndi mne bla zhin neyi. 2 Mdi izhin bǝ shuzhi nkan lǝlɛ yi ŋgɔŋ ndi tsetser aner abɛ na ndum kɛ Arik kukub ane bla kɛ ne di iyiŋ ndi Ŋgɔŋ Yesɔ amɔr ine ta ta zhɔk ane nek abɛ na ndum maa.

3 Iki zhin bɔbɔk, izhin tei na zhi te ne bɛr yi nyɛ klɛtu aneshir abɛ na kiki mimin atei nyɛ, te zǝ kiki mimin iyi bubu. 4 Atei rib, <<Iki yiŋɛ iye ni <I nyɛ> te Yesɔ ne kpai aŋyak te Iwa atei kama nyɛi? Ire kukub ndi antsintsim amɔr neka ku, ikinuŋ ba ne sen ba baŋ rɛ mkpaŋ kɛ na goŋ mimi.>> 5 Fena ne ŋur asuk ne ŋyak te ire kukub Arik ne nek ilɛ kɛ ndi gbarshu ne yime tena na gɔŋmimi asak ne amashir ben amashir. 6 Ne amashir ayiŋɛ menyi gɔŋmimi kɛ mkpaŋa Arik ne zǝr aneshire adɔmɔ ne anca ngoŋ. 7 Nǝ ir nkanlɛ zhin ishu kɛ azizaŋa ben gɔŋmimi ne kam ba aŋyak abɛ goŋ ne lu, ndi Arik ne kam ba aŋyak aŋub bɛr yi te ŋas bǝn aner abɛ yaŋ zhi Arik adɔmɔ.

8 Ama izhineba akpa amuŋ, kǝr zhin bǝ ŋursuk ne ki zhiin iyiŋɛ ba: Bǝn Arik iber zhiin iyi ndi ase azhin azhiin, ne me ase azhin azhiin ayi ndi iber zhiin 9 Arik ba sik kpa ne yaŋ na ki ndi ne akpai aŋyak, ir keŋ ndi anuŋ azhi abɛ sik kpa. Arik avuŋ susun ben abɛ zhin, bane tanyɛme te inuŋ ne miŋ min abɛ naŋ adɔ, ama kɔte ŋɔwa abɛ nyɛ ben zuk ne lalɛ maa.

10 Fena iber iyi nyɛ Arik itei yi ndi iyir ner ne zhib. Igbar shu itei naŋadɔ ne gwu ŋgɔŋ; ncinces ben nki ki iyi ku dɔ ne gbarshu itei goŋ ne lu, fe gɔŋmimi ben iki yiŋ ndi iyi ne miŋe itei naŋ dɔ.

11 Ate yi ndi kɔte nii atei goŋǝ ne ankɔŋ awaŋa, fe izhin yi aneshir kikin amei? Itsin mine ibǝ kɛ yi tsetser ne nkɔŋ kɛ Arik. 12 ndi izhin zen shur ayi ŋub bɛr yi nyɛ Arik na ir keŋ ndi utei na ne mgbyamgbyaŋ mi te duŋǝ nyɛ andanda. Nǝ bǝn ncinces, ihwa ben kime Arik atei goŋǝ ne lu, ikime tei ren dɔ ne ŋguŋgu lu. 13 Fe ne miŋ kɛ klɛ mgbyamgbyaŋ ne lɛ kɛ kpa nyak maa iduŋ ta shur ayi ne ishu yayas ben goŋ mimi yayas, ikɔb kɛ aner abɛ yi tsetser ne nkɔŋ kɛ Arik.

14 Fena, izhineba akpa amuŋ, ndi izhin yi ne miŋ kɛ zen shur ayi ŋub nyɛ iyi Yesɔ, tsi kli zhin mgbyamgbyaŋ ndi inyɛ maa bai nyɛ yik ŋgluk nuŋ, kɔ iyik lalɛ ba se ibǝ iyi isɔŋ kɛ sik susun ben Arik. 15 Shuzhi zhin Arik Ŋgɔŋ amɔr ne zhɔk susun ne ta ta zhɔk, ndi zumɔr Bulus ane cɛr zhin ne Mgbemgbeb keŋ ndi Arik ne nǝgu. 16 Bulus ne cɛr ne nkɔŋ zhin ir keŋ ndi abɛ cɛrǝ, te bla kiki iyi zen lumɔ. Icɛr maa ihru nkan lǝlɛ yi lɔ izhi, iyiŋ ndi abɛ yi awa ben aneshir abɛ yaŋ tsǝ klɛ te aba bǝ kpur ilɛ kɛ Arik, ndi anakǝ ne cɛr iye anuŋ, ne miŋ kɛ dur men.

17 Neme, izhineba akpa amuŋ, ndi izhin neka men zhi amɛ, izhin bǝ hria ayi te duŋ kǝr aner abɛ yaŋ zǝ lɛ kɛ Arik abaŋa abɛ klazhin avu awa tena duŋ zhin zhaku iyaŋ yik ki didik ndi Arik ne nai aŋyak zhin ba. 18 Fena izhin bǝ flu ne ta zhɔk ben izhi iyi Ŋgɔŋ ben Ine ta ta zhɔk Yesɔ Kristi. Ai wa inǝk ŋgɔŋ kɛ azǝzaŋa ben iyaŋ klɛtu! Bǝ yi amɛ.