2 Pedro 2

Abɛ bla tsar mu ben cɔk kiki la men

1 Neme abɛ bla mu te aba yi abɛ na ndum kɛ Arik ne miŋ kɛ aneshir, ndi anuŋ atei na yi amɛ ne miŋ min. Atei lɔm aner te bu alɛla ane zǝr ba te bɛ tun izhi Yesɔ ndi ne ku te na kam lu ne atu ayi lalɛ mɔr, atei zǝr atu amen ahrie. 2 Aneshir abɛ zǝ Arik tetɛk atei zǝ tsar men ne ŋkuŋkɔŋ iyi shisha te ai gli itsar yi lɛ didik atibe ne asusun abɛ kyak tanyɛme ne lɛ didik te wɔb duk ijɔm. 3 Nǝ miŋ kɛ timu mǝne atei duk zhin ijɔm ndi ne ŋlɔi. Ililɛ mǝne ne akɔrǝ asak ba, fe bai kam iber yi zǝr bama ba.

4 Ate yi ndi Arik bane duŋ abɛ bla shar maa ne lalɛ men ba, te tur ba kɔmɔ ne miŋ dudu lu kɛ te buu, te kpa ba shur aŋub bɛr yi ŋas; 5 te Arik ba te duŋ aner abɛ gɔŋmimi abɛ kukub ba te duŋ amashir anca aŋgɔŋ avu abɛ kyak zǝ lɛ maa adɔmɔ, te duŋ Nuhu wa, ine bla lɛ didik, ben aner abɛ kɔ maa amɛ ataŋgba; 6 ate yi ndi Arik ane goŋ ntun ŋgɔŋ iyi Sodɔm bǝn Gomɔra ate ntɔŋ, te duŋ ba abɛ yik te zhi iki ndi itei vuŋ abɛ kyak ta lɛ kɛ Arik; 7 fena te yi ndi Arik ate ta Lot azhɔk, iner tsetser, iwaŋ ndi bane tik ayi ne kiki iyi bubu ye ner abɛ klik tu ba 8 te Ilɔt iner tsetser yuŋɔ, ne sɔŋ ne miŋ mǝne, ne yik iyah ne aŋɔk abɛ kyak na didik Ilɔt ne yik tena wɔ 9 iyiŋɛ te yi amɛ, fena Arik Ŋgɔŋ ne zhi ir keŋ ndi wai gli aner abɛ zeu arumɔ bǝn abaŋ ndi ana kiki iyi nyɛr maa, ne miŋ kɛ iyik iyah men te Arik abɛ kpa abɛ lalɛ aŋyak aŋub bɛr yi ŋas, te bɛ zen yik iyah men. 10 Waŋa ai lɛ didik ndi aner abɛ zǝ bubu yi kpa kɛ lalɛ te kyak ilɛ kɛ nek Arik.

Aŋur asa te lɛ lǝlɛ mimin netu lɛ kɛ Arik iyaŋ klu sisik iye aner abɛ shar Arik ndi aklik anaŋ ba te ana yi ne mgbyamgbyaŋ anaŋ ba ne ti kɛ Arik; 11 neme kɔ te vuŋ abɛ shar amaa, ne ye me abɛ shara aklik tena ayi ne mgbyamgbyaŋ anaŋ abɛ tsar imumɔ, ba lɛ mla netu kiki iyi na Arik ba. 12 Ama aner abɛ tsar imumɔ atimu ne atu yi kiki ndi bane zhi ba. Te naga yi ndi inarum ne yaŋ zhi ki, iyi na Arik neme Arik atei zǝr ba adɔmɔ ndi inarumɔ.

13 Atei ya ba kiki iyi na mǝne ne yik iyah netu ki ndi ne nai. Te yik te aba abɛ kpur abɛ yaŋ klik teduŋ ba abɛ zhaku te zǝ ba ali kili, te gbur iyaŋ sɔŋ keke aku bama. 14 Ayi amene atei bu ŋgon netu abubu yi wɔb kur ben amba, te kyak duŋ na zumimiŋe; atei zǝb aza abɛ yaŋ klik ne atu bubu ndi neka zhaku ne tanyɛme men! 15 Neka duŋ ankɔŋ adidik te dur adɔ te akama zekur Balaam izu Biyo, iwaŋ ndi anyɛr ki yi na mimin. 16 Fena Arik ne duŋ tatur ndi ba lɛ ba agbaŋu atɔŋ ne ki mimin iyi na maa ne kɔr kɛ neshir.

17 Anere abɛ tsar mu abaŋa ayi ndi angyak atuk ayi yaŋ amashir tena yi ndi mgbumgbuk abuda ndi ŋguŋgu ngɔŋ fugǝ. Arik nena amantib bu aŋyak aŋub ba. 18 Aŋur asa ne kǝŋkɛn lǝlɛ yi ti mu men ndi, aruk aner ayayas abɛ ta Arik te bɛ na kiki mimin ndi aner abɛ na zumimiŋ azǝn na, watɔ kiki bubu iyi baŋ asusun aneshir. 19 Abɛ tsar mumɔ ne kpa anyak ba tedi aba atei zuk ba shur ne miŋ kɛ yi ne agɛn men, te ŋur asuk te aba menyi ayi ne miŋ kɛ na gen kɛ zen lalɛ, amɛ neshir waŋ ndi ne shur zhɔk susun ne ki yi gɔŋ mimi inaŋ Arik ayi gen neyi me. 20 Ka abɛ di abɛ tsar mu abaŋa ne lieru ne ki mimin yi na mǝne te zhi Ŋgɔŋ amɔr bǝn Nǝ ta ta zhɔk Yesɔ Kristi te akam duŋ ilalɛ mǝne tsǝ ba nyak ne klɛtu inaŋ yi ku ti me, ne na mimin. 21 Ibɛre te aner abaŋa ai bɛ zhi ankɔŋ ayou Arik ane na didik, naŋ yiŋ ndi ne zhiu te akam agɔŋ ne nkanlɛ yi nek Arik. 22 Tǝ aneshir ne di nkan lǝlɛ ne tu amene: <<Iviu akama lak iklɔk maa,>> neme, <<Agluk ane kɔb ate ŋlau kpa maa atei na kama kɔmɔ ne ancam.>>