1 Timoti mne biŋu bǝn Arik bǝn Yesɔ Kristi, waŋ ndi atei te abɛ yi atsitsir ben abɛ ku ambuk, mna nǝgu lɛ ne atu ayi nyɛ Kristi ben Ŋgɔŋ maa, mnegu lɛ: 2 Ubǝ du lɛ kɛ Arik; ubǝ na klɛ kɔte mkpaŋ takɛ; bǝn ŋɔk susun zhɔk ne ankɔŋ, te na tsaŋ aneshir, te na duŋ ba klik susun, bǝn vuŋ susun bǝn tsar ba bwe. 3 Tǝ mkpaŋ tei nyɛ ndi aneshir ba atei klɛ mgbamgbaŋ ne lɛ kɛ Arik didik ba. Neme, atei wɔb te aba bɛ wɔ iki yiŋ ndi atɔŋ amene awɔb wɔi, atei biŋ aneshir abɛ tsar tetɛk ndi atei bla ba iki yiŋ ndi aba wɔb wɔi. 4 Atei ku atɔŋ amen ne wɔ lɛ didik te kam awɔ nkan lǝlɛ iye atsintsim amen. 5 Ama uwa Timoti, ubǝ vuŋ kpa gli ne kiki yiŋɛ bɔbɔk, vuŋ susun gli ne iyah, na ndum kɛ ne bla lɛ kɛ Arik, na ndum mi bɔbɔk.

6 Atei nga ane ka abwam ashur ndi ituk amkpur, mkpaŋ kɛ ŋurkam muŋ ne ka nyɛ. 7 Mne nka ntsǝk mgbu didik, iklu muŋ neka tartu, mne ngli tanyɛme iyi susun. 8 Azizaŋa Arik ne ka aŋyak me itu anku kɛ tsǝn tsetser, ndi Arik ne te ambuk tsetser, atei nǝm idǝk muŋ ne bǝn, ba nga kiki muŋ ba, ama ben abaŋ ndi asɔŋ aŋub nyɛ Yesɔ.

9 Uwa Timoti, tsǝ klɛ te nyɛ ben abɛm andanda, 10 te Dimas, bubu iki yi gɔŋmimi ne ka vuŋu, ne kyak me aduŋ te akɔmɔ ne Tasolɔnika. Karaska ne kɔmɔ ne Galantiya, Titus ne kɔmɔ ne Dalmatiya. 11 Anak ayi Luka wa ankyak ayi ben abɛm. Ubǝ gli Markus glim ma, te ayim didik ne ndum muŋ. 12 Nga mne shar Tikikus ne Afisa. 13 Utǝ tei nyɛ, ubǝ ka baŋ me anklu akɛ ku mvlu ndi mne ŋur kǝ nsuk bǝn Karbus ne Taruwasa, bǝn amplɛ cɛr, bǝn kpaki kɛ cɛr yuŋɔ.

14 Alikzanda ne lak ne nam iki mimin ŋgɔŋ. Arik wa atei ka nǝgu iki yiŋ ndi ne nai. 15 Iwa miyi ubǝ te zee bǝn abɔu, te ane akyak ilɛ mɔrɔ ŋgɔŋ.

16 Nǝ mkpaŋ keŋ ndi mne kuti ŋla tu muŋ, ba nuŋ ne kum goŋ ba, bɔbɔk mǝne ne kyak me. Mben te kǝr abɛ gli ba ne lalɛ yiŋɛ ba. 17 Ama Arik ne kliim ne goŋ te nǝm mgbyamgbyaŋ, neme tǝm du lɛ didik kɛ Arik te abaŋ ndi bai ŋli Yahudawa ba abɛ wɔ kɛ. Nena tam azhɔk ne anu kɛ Ici. 18 Arik atei tam azhɔk ne kɔte ki mimin tayi te glim agar ikɔb maa keke. Ŋgɔŋ bǝ yi maa gar klɛ tu.

19 Ubǝ tek me Bilkisu ben Akila bǝn aner kɔb Onisifaras. 20 Arastas ne klɛ ne kɔrantiya, mne duŋ Tarofimas ne Milita, ikpa ne ŋuru vuŋ. 21 Ubǝ nama te nyɛ kǝr ubǝ duŋ ikus bǝ te ba. Ane, Aubulus, bǝn Budis, bǝn linas, bǝn Kaludiya, bǝn abɛ zǝ Arik bɔbɔk ategu.

22 Arik abɛ yi bǝn asusun amin. Iki didik bǝ yi bǝn abɛ zhin.