1 Atei izhineba ba ndi bai ŋli kɛ Yahudawa ba, izhin yi ndi abɛ ku nǝ la lɛ nǝ zumimiŋ min, 2 Nǝ mkpaŋ yuŋɔ izhin nǝ zǝ kiki mimin yi gɔŋmimi; izhin nǝ zǝ lɛ kǝ angɔŋgɔŋ abǝ mgbyamgbyaŋ kǝ izhu yi sha, izhu iyiŋ ndi azǝzaŋa izǝn na ndum bǝn aneshir abǝ yaŋ zǝ lɛ kɛ Arik. 3 Bai ki tun ba bɔbɔk mɔrɔ tanǝ bǝn yi ndi imǝnɛ tǝna tsǝn nǝ kpa kǝ tǝ bubu yi gɔŋmimi, tǝ na kiki yiŋ ndi ikpa mɔr bǝn asusun amɔr anyerǝ. Nǝ ir kpa mɔr kǝŋe fe taba, ndi kɔtǝ ŋɔwa ayimɛ, ta nǝ men zhi tǝ ta tei yik iya nǝ mfu kɛ Arik. 4 Ama ilɔ susun yɛ Arik iyi tǝtǝk, bǝn inyɛr maa nɛtu amɔr iyi ŋgɔŋ, 5 ndi tanǝ ku nǝ min kǝ izhu nǝ lalɛ zǝ lɛ maa kǝŋ ndi nɛ glii ta vli nǝ min kǝ Kristi. Tǝ ai tazhɔk yɛ Arik iyi nǝ duŋ ta yik ta zhɔk. 6 Nǝ yimɛ mɔr bǝn Kristi Yesɔ nɛ lu bǝnebɔu tǝ zeu sɔŋ nǝ kpǝmkpa yi gbarshu yi gɔŋmimi. 7 Nɛ na amɛ tǝ abe tsar bɔbɔk mkpaŋ kǝ nyɛ tǝ ina ŋgɔŋ iyi tazhɔk maa yi nyɛr ndi nɛ tsar ta nǝ min kǝ Kristi Yesɔ. 8 Tǝ ayi tazhɔk yɛ Arik iyi duŋ ta nǝ yik itazhɔk nǝ tanyɛmɛ. Nǝ tanyɛmɛ bai na min ba, ai nǝk Arik, 9 bai ndum keŋ ndi tanǝ na ba, ndi nuŋ abǝ ŋur asa nǝ tumɔ. 10 Tǝ ta yi kiki iyi na ndum ye Arik, nena ta ne min kɛ Kristi Yesɔ te tabǝ na ndum didik, keŋ ndi Arik ne naa ta aŋyak tɛka nai.

11 Izhineba abaŋ ndi ba yi ŋli kǝYahudawa ba nǝ ŋli, zhɔ <<abǝ yaŋ kɔkzhik>> nǝ zhɔ Yahudawa, abaŋ ndi azhɔ akpa men tǝ abǝ kɔk zǝk (iyiŋ ndi idi nǝ ki ndi alulum anaa akpa men), shuzhi ir kǝŋ ndi izhin nǝ bǝn yimɛ. 12 Nǝ mkpaŋ yuŋɔ izhin nǝ bǝn yi shan bǝn Kristi. Izhin nǝ yi acɛn tǝna yi aner abǝ yaŋ hria Arik. Bazhin yi nǝ kinuŋ nǝ min kǝ kpa nyak ba, iyiŋ ndi ai kpa nyak yɛ Arik nɛtu aneshir amaa, fe izhin yi nǝ gɔŋmimi kǝŋe kǝ yaŋ zhɔk susun bǝn iyaŋ zhi Arik. 13 Fe azǝzaŋa ne zǝ Kristi Yesɔ iwaŋ ndi zhin ne bǝn yi shaan bene bɔu Arik ne gli zhin abɛ lalɛ anyɛ gbahir nǝ hrie azhizhi ayɔu Kristi me.

14 Tǝ Yesɔ ne tu maa nɛ glii ta isɔŋ kǝ sǝk ndi nɛ duŋ Yahudawa bǝn abaŋ ndi ba yi ŋli Yahudawa ba iya mǝne abɛ yi zhin, mpaŋ ndi ne gab ba ntǝk yaa ma iku kɛ Yesɔ tena lu maa ne bɛ ne zǝr kɛ, mkpaŋ kɛ kyak akpa ayi, 15 ne ku kɛ Yesɔ ne tuŋ ta biŋ ta baŋ ndi tane bǝn te zɔr nɛ akpa nǝ cɛr bǝn nǝk nkan lɛ yi Yahudawa nǝ bla nǝ kiki iyiŋ ndi abɛ nai tɛna zǝǝ. Nǝ na nyak maa ndi abɛ buu ner yayas ne min kɛ ayaa, tɛ yik sɔŋ kǝ sǝk ne kpa ane Yahudawa bǝn abaŋ ndi bai ŋli Yahudawa ba. 16 Nǝ ku maa nǝ mkpɔk tu kuŋkun kǝ gen Kristi nɛ zir ikyak ayi men; nǝ nkɔŋ kǝ kpɔk tu kuŋkun kǝ gen tɛ biŋ anere ayaa ma nǝ kpa zhiin tɛna gli ba anyak bǝn Arik. 17 Fe Kristi nɛ nye tɛ du lɛ didik kɛ men bǝn isɔŋ kǝ sǝk bǝn bɔbɔk izhineba ndi bai ŋli kɛ Yahudawa ba, bǝn Yahudawa, abaŋ ndi ayi gbahir bǝne bɔu. 18 Tǝ nɛ atu ayi Kristi tǝ bɔbɔk mɔrɔ, Yahudawa bǝn abaŋ ndi bai ŋli Yahudawa ba, ta yi nǝ nye nǝ Izhu tsetser zhiin nǝ ti kǝ Tetɛɛ.

19 Nǝ yeme, izhineba ndi ba yi ŋli kǝ Yahudawa ba zhin yi acɛn bǝn agɛn ba; azǝzaŋa fe izhin yi nǝ mgbyamgbyaŋ bǝn aner abe Arik bǝn amunya nǝ min kǝ zǝ Arik. 20 izhineba, iminyi, ne mɛ zhin netu tanda iyi shur abɛ na ndum maa bǝn abɛ bla tɔ ti, itanda ma iyi Kristi Yesɔ nǝ tu maa. 21 Ayi wa iwaŋ ndi agli imɛ me tɛ duŋǝ flu nɛ akabaŋkɔŋ anǝ nǝk Ŋgɔŋ. 22 Fena ne min kɛ Yesɔ ijineba minyi ne mezhin abiŋ te zhin bǝ yi amkpa ne sɔŋ awaŋ ndi Arik asɔŋ Izhu tsetser maa nǝ miŋ mɔr.