1 Mdi zhin, fena, Ŋga waŋ ndi myi nǝ kur nǝ jaru nǝ lɛ kǝ Ŋgɔŋ: tsǝn nǝ nkɔŋ ndi itsar klik iyiŋ ndi Arik nai anyak ndi nɛ zhɔ zhin. 2 Izhin bǝ zi tu zhɔk, te yi zǝǝ, tena shur kpa, te vuŋ kpa tena nyɛr akpa. 3 Ne min kɛ nek tu te yi ki zhin te na kiyiŋ ndi izhu tsetser ne sik susun. 4 Ikpa zhiin, izhu tsetser zhiin ndi ne zhɔ zhin ne zhɔk susun zhiin bǝn waŋ ndi ne zhɔmɔ 5 Ŋgɔŋ zhiin ayime, itanyɛmɛ izhiin, bǝn su kpa ne amashir azhiin. 6 Arik ayi zhiin, Tetɛɛ bɔbɔk waŋ ndi ayi ne atu yi kɔte anii ne min kɛ ki bɔbɔk ne tu kɔte ni.

7 Kɔtǝ ŋɔ nǝ min mɔrɔ nɛ ta nǝk iki didik anenen nǝ nǝk iyiŋ ndi Kristi nɛ nǝk. 8 Neme icɛr ne di:

<<Ndi Yesɔ ne yuŋ shu gbagbaŋ,

Te gli abaŋ ndi ne vu ba agɛn ne mgbyamgbyaŋ maa

Nek ba izhi kiki yi na.>>

9 Nǝ bla te ni <<Ne yuŋ>> watɔ ne zi anyak gɔŋmimi. 10 Iwaŋ ndi ne zǝme, ayi wa ne na yuŋɔ kɔmɔ ne gbarshu te bɛ duŋ kɔte ni bǝ yi anenen. 11 Ne yi wa nɛ nǝk anuŋ zhi kaaŋkaŋ, anuŋ abǝ na ndum maa, anuŋ abǝ bla tɔ ti, anuŋ abǝ tsǝn gɔŋri nǝ du lɛ maa, anuŋ aye bǝ na dum du lɛ maa bǝn abǝ tsar. 12 Nɛ na amɛ tǝ abe naa ta bɔbɔk aner abe Arik anyak nǝ ndum kǝ aner abǝ zǝ Kristi, tǝ ta bǝ flu nǝ kpa kǝ Kristi me. 13 te ta ba bɛ bin atu bɔbɔk ne tanyɛmɛ bǝn mgbemgbeb kǝ Izu Arik, te na yi mgbamgbaŋ, bǝn zhɔ mɔr te ta bǝ mla aneshir abɛ shaga ne mgbamgbaŋ kɛ Kristi.

14 Neme bata tei na yi ndi amumun ne zǝ Yesɔ ba, abaŋ ndi ŋguŋgu ŋur ba kam ne lǝlɛ, te fuk te kɔmɔ ayaŋ ben amɔ ne tsar lǝlɛ ben ndi ibaŋ asusun amen tena cɔk ba. 15 Neme, ta bǝ bla zub nǝ min kɛ nyɛr, te ta bǝ flu ne kɔte nii ne miŋ kɛ Kristi ndi wa ayi Ŋgɔŋ. 16 Ayi wa ikpa bɔbɔk, te biŋ te yi kpa zhin, tena ŋur nyaŋ ne min kɛ na ndum kɔte gyaŋ kpa tayi, tǝ na flu ne mtanyeme ne akpa men, ndi kɔte igyaŋ kpa tayi ne nai anyak. Fe ate yi ndi kɔte igyaŋ tayi tǝ na ndum anenen, mkpuŋ kpama iflu tǝ mɛ biŋ nǝ nyɛr.

17 Nǝ sak kǝ Ŋgɔŋ, fǝna, Me mgbaaŋzhin atɔŋ: kǝr zhin bǝ zǝn tsǝn ndi abǝ yaŋ zhi Arik ba, ndi asusun amǝne akama kɔmɔ nǝ ki sha. 18 Ba yik ilaŋ abɛm nǝ zhi men ba ne na gli ba agli tibɛ ne vli keŋ ndi Arik a nek kɛ, ne lɛ kɛ yaŋ zhi men bǝn klik asusun men. 19 Ndi izhi men ne naŋ adɔ bɔbɔk, nɛ nǝk atu men nɛ amkpa nǝ tǝ bubu tɛ azǝn nyaŋ atɔŋ, nǝ zǝn na zumimin.

20 Neme, izhineba ba ne nyɛ zhi Kristi ne ankɔŋ awaŋa ba. 21 Ayi lɛ didik izhin ne wɔ lɛ kɛ Yesɔ, ne na tsar zhin lɛ didik ne tu amaa. 22 Ne bla zhin, ne tu kiki yi na min kukub, duŋ na zhin kiki yi kukub min, yiŋ ndi yi zǝr zhin tǝna lɔm zhin nɛ tu yi bubu; 23 te izhin bǝ kam asusun amin sɛn tǝ duŋɛ ayi ayayas. 24 izhin bǝ na sɛn asusun amin te bɛ yi ayayas, te duŋǝ abɛ yi ndi Arik tǝna gli tumaa rumɔ nǝ tsǝn kǝ zub didik ndi yi anenen bǝn tsetser maa. 25 Ndi amɛ, kɔte ŋɔ ne miŋ min abɛ duŋ timu te abla zub bǝn ikpa maa, te ta yi gab ye akpa. 26 <<Nǝ min kǝ mfu duŋ lalɛ ba>>: Kǝr ubǝ duŋ arik akyaŋ aku tǝ zǝn tǝ mfu ba. 27 Izhin bɛ duŋ bu shetan ankɔŋ ba. 28 Iner nǝ zhib abɛ duŋ zhib, abɛ lu te vuŋ kpa te na ndum kɛ aŋɔk amaa, tɛ dik anǝk abɛ yi ne iya. 29 Kǝr izhin bǝ duŋ lɛ mimin ru rɛ anu amin ba, izhin bǝ duŋ lɛ didik kɛ men keŋ ndi tei duŋ neshir aflu, abɛ na lɛ nǝ mkpaŋ didik ndi abɛ wɔ kɛ atai nyɛr. 30 Kǝr izhin bǝ duŋ laa Izhu Tsetser ayɛ Arik susun ba; tǝ Izhumɔ ai ngir maa kɛ akiki nɛ tu min, ayi nǝk ndi ibere itei nyɛ yi zuk zhin zhɔk. 31 Izhin bɛ te shaan nǝ lɛk susun bǝn susun ŋaŋar, ben mfu, ben te antam iyiŋ ndi yi kpa tiŋ zumimiŋ. 32 Izhin bǝ na akpa min ki didik, te na wɔ lɔ susun iye akpa te na zuk akpa min shur ndi Arik ne na zuk zhin ashur ne ankɔŋ ayou Kristi.