1 Izuk zhɔk ai ki yiŋ ndi ta yimɛ neyi, Kristi nɛ ta ta zhɔk! ndi aner abǝ zuk shur, tǝ kǝr izhin bǝ na kam yi agɛn ba.

2 Wɔ zhin! Nga, Bulus, me bla zhin, izhin te duŋ a kɔk zhin zǝk Kristi ba tei yi kinuŋ bɔbɔk bane abɛ zhin ba. 3 Duŋ M na gbaaŋ kɔtǝ ŋɔ atɔŋ iwaŋ ndi ate duŋ abɛ kɔgu zǝk tǝ wa abe zǝ ibla cɛr yi Musa bɔbɔk. 4 Anuŋ amin abaŋ ndi awɔbtǝ bɛ duŋ ba na ki anenen bǝn Arik nǝ zǝ icɛr yi Musa izhin nǝ sɛr kluk bǝn Kristi. Izhin yi nɛ abɛm nǝ ta zhɔk ye Arik. 5 Atei taba, zhɔk susun mɔr yi Arik atei nyak ta nǝ ŋɔkli maa; fe waŋa ai ki ndi ta ŋubǝ nǝ mgbyamgbyaŋ kɛ Izhu ye Arik ndi azǝn na ndum nǝ tanyɛmɛ mɔr. 6 Ndi ta tǝ yi nǝ min kǝ Kristi Yesɔ, kai kɔk zǝk kɔ kai iyaŋ kɔk zǝk banǝ sɛn ba bɔbɔk; Iki ngɔŋɔ yi ai tanyɛmɛ ndi ina ndum nǝ nyɛr.

7 Izhin ne klu iklu didik! tǝ ai ŋɔwa nɛ yar zhin na zubɔi? Nɛ na kikin tɛ cok zhin? 8 Ba yi Arik wa nɛ nai amɛ ba, ŋɔwa nɛ zhɔ zhin. 9 <<Mbumbur atuntu watsɔb iyi duŋ mumuŋ yi ca wun,>> ndi abla. 10 Mnǝ tanyɛmɛ bǝn abɛ zhin ne sak kɛ Ŋgɔŋ, ba zhin tei zǝ lɛ kɛ nuŋ te duŋ muŋ ba. Iwaŋ ndi alɔm zhin, kɔ abe yi ŋɔwa, atei sagu iya. 11 Ama ate yi nga, akpa amuŋ, te yi ndi men nǝk du lɛ kɛ kɔk zǝk, te anii duŋ me nak ri yik iya i? Ndi iye me zumimin iyi ne kpaŋ Yesɔ ne kuŋkun kɛ gen ne tyagǝ a hrie. 12 Ate yi abaŋ ndi ne lɔm zhin netu ayi kɔk zǝk, ne yik muŋ abɛ ru ate sɔŋ kpla!

13 Izhineba ba, akpa amuŋ, ne ta zhin azhɔk te izhin bǝ yi sha. Ne me kǝr zhin bɛ zǝ iki yiŋ ndi kpa min wɔ bǝ ba, duŋ nyɛr bǝ duŋ zhin yi agɛn nɛ akpa. 14 Tǝ icɛr yi Musa nǝ nǝk kɛ bɔbɔk iyi mbwab zhiin: <<Nyɛr kpami ndi u nyɛr mi.>> 15 Izhin te ta ina kɛ akpa min, waŋa ayi ankɔŋ anǝ ŋlɔk akpa min.

16 Iki yiŋ ndi mbla ma: izhin bǝ duŋ Izhu tsetser itsar zhin itsǝn didik, tǝ ba zhin tei zǝ kiki yiŋ ndi kpa min awɔbǝ ba. 17 Tǝ ize iki yiŋ ndi ikpa wɔ bǝ akyak akpa yi ben izhu tsetser. izhu tsetser akyak akpa yi ben iki yiŋ ndi ikpa wɔ bǝ. Te a kyak kpa yi, te kǝr ubɛ na ki yiŋ ndi uwɔbǝ ba. 18 Te yi ndi izhu tsetser igli zhin tsǝne, ndɔmi ba yi ne zǝ lɛ keŋ ndi nɛ nǝk kɛ nǝ cɛr yi Musa ba.

19 Iki yiŋ ndi kpa neshir nai iyi ndende. Izǝ amba bǝn alulum, ibubu tiŋ, bǝn wɔb na kiki iyi shisha; 20 izǝkur mkpɔk kuŋkun, itɛn.Aneshir akam atǝ zɔr tɛ tsik mgbu; tɛ akam atɛ ankiŋki, mfu, bǝn nyɛr tu. Asɔŋ kaaŋkaŋ bǝn ntǝntǝk; 21 a kyak akpa ayi, ahwa, isɔ ki rǝrǝ, bǝn na kiki nuŋ ndi yiŋe: Mgbaŋ zhin atɔŋ azǝzaŋa ndi mnǝ na men bla zhin: abaŋ ndi ana kiki yiŋe batei yi nǝ gadu nǝ kɔb kɛ Arik ba.

22 Fe abɛ yi ne Izhu tsetser atanyɛmɛ ne kpa, inyɛr akpa, bǝn isɔŋ kǝ sǝk, bǝn vuŋ susun, ina ki didik, bǝn bu ŋɔk, bǝn tanyɛmɛ, 23 bǝn zi tu zhɔk, bǝn vuŋ kpa. Ambuk nǝ cɛr yi Musa ba yimɛ nǝ ir kiki yiŋe ba. 24 Abaŋ ndi ayi abɛ Yesɔ Kristi neka ru kiki yiŋ ndi kpa wɔbǝ bǝn kiki iyi tik ayi netu iku kɛ Yesɔ. 25 Ate yi ndi ta tsǝn nǝ Izhu Tsetser ta bǝ duŋ Izhu Tsetser bɛ gli ta tsǝnɛ. 26 Kǝr ta bǝ yi abǝ lǝk atu nǝ shu ba, bǝn abǝ wɔb akla, bǝn abǝ kyak akpa ayi.