1 Amunya, ndi abɛ zi Ŋgɔŋ amɔr Yesɔ Kristi ne ŋgon maa, kǝr izhin bǝ tsar sɔŋ kaŋkaŋ ka. 2 Te yi ndi ner nuŋ ne nyɛ amkpa ne biŋ atu amin te su ivǝn ankawun yi rɛ ŋgon ben ikluklu didik, inǝ su akpok aki ne yik iyah te na nyɛ mayi. 3 Izhin te kam tɔ ne su iki didik waŋa te di, <<Tɔ iki sɔŋ didik yiŋ ne nyagu ne yi,>> ama te di ne yik iyah waŋa, <<kli adidik amɔ>> kɔ <<zi sɔŋ ne mimi ne aza muŋ,>> 4 izhin ne tsar yaŋ tanyɛme ne akpa te akpa ambuk ne asusun mimin.

5 Wɔ zhin amunya: Arik ne hria abɛ yik iyah ne ayi aneshir abɛ gɔŋmimi te bɛ yi abɛ adudunki ne tanyɛme ne asusun te bǝ yir kɔb keŋ ndi ne me kɛ aŋyak abɛ tanyɛme ben bɔu. 6 Ama izhin ne yik ne iyah yaŋ shak ayi. Aba abɛ yi ne adudun ki ba sak zhin iyah. Tena Gli zhin te gar amkpa ane te ambuk kai? 7 Aba na cɔk isak kɛ Arik awaŋ ndi izhin zeu ala.

8 Atei yi ndi izhin zǝ lɛ kɛ Arik ndi ne cɛr kɛ,<<izhin bǝ tanyɛme ben akpa min ndi atu amin,>> izhin te na amɛ izhin ne na anenen. 9 Ama izhin tsar tanyɛme ne atu amin ankyak, izhin ne la lɛ te ne yi abɛ yaŋ zǝ cɛr yi Musa. 10 Neme inuŋ atei di wa azǝ cɛr iyi Musa te ate kluk izhin ne kluk yi bɔbɔk. 11 Arik ne di, <<kǝr izhin bǝ zǝ amba ben alulum ba,te na di, <<kǝr abɛ ŋun neshir ba.>> Atei yi ndi bau ne zǝ amba ba ama une ŋun neshir une kluk zǝ cɛr iyi Musa. 12 Izhin bǝ lɛ te na iki yiŋ ndi ne blai ndi abaŋ me ndi atei te ba ambuk te duŋ neshir ayi sha, 13 te Arik atei te ambuk yaŋ lɔ susun ben iwaŋ ndi ba lɔ susun ba. Ilɔ susun ne te ambuk ba yime ba!

14 Anii ai iki didik, amunya, te neshir te tanyɛme ne susun maa te ba na ikinuŋ ka? Itanyɛme yiŋɛ ba te tau zhɔk ba. 15 Ate yi ndi izumɔr kɔ iva mɔr ba yi ne iki yi su ba ben iki li ba. 16 Tǝ inuŋ ne miŋ min adi, <<tsin kɔmɔ, ubǝ yir kɔb keke, Arik abɛ nugu iki li ben iki su,>> te ba ne na ikinuŋ ne atu ayi iyah maa ba, ba rɛ amɛ ba. 17 Amɛ itanyɛme ne susun te yaŋ na ndum, ai ki sha.

18 Fe anuŋ adi, <<une tanyɛme ne susun, nga me na ndum.>>

Tsar me tanyɛme imi yaŋ na ndum, nga M tei tsa ru ta yimɛ ne susun muŋ ne na ndum. 19 Izhin ne tanyɛme te di Arik ayi zhiin. Ne remɛ! kɔ anerim menyi ne tanyɛme amɛ ne rǝ kpa.

20 Uwa ne yi bliblik, itanyɛme ne susun yaŋ na ndum ai iki sha. 21 Ibrai waŋ ndi ayi tsǝntsem amɔr ne baŋu ai ner ne yi tsetser ndi ne baŋ vǝvǝn amaa Ishaku anǝk Arik. 22 Izhin ne yik itanyɛme iyi susun maa ben iki na maa ne tsik biŋ, te itanyɛme maa ne shaga ne na ndum maa. 23 Neme icɛre ne shaga ndi ne di, <<Ibrai ne tanyɛme ben Arik, ne duŋ adiu te ai nɛr ne yi tsetser,>> ne na zhɔu te kpa maa Arik. 24 Izhin yik Arik ata neshir ne ki na maa ba ne tanyɛme ne susun maa ankyak ba.

25 Neme, Rahab ndi ne yi ne zǝ alulum ne yigu ai tsetser ne iki yiŋ ndi ne nai ndi ne ta abɛ nyɛ ŋɔk ntun yi Jerikɔ tɔ te na su ba ayir te duŋ ba zǝ ankɔŋ Anuŋ akɔmɔ. 26 Indi ikpa keŋ ndi ba yi izhu ba ai ikum, neme tanyɛme ne susun yaŋ na ndum uyi ndi ikum.