1 Wɔ zhin, izhineba ba abɛ yi ne adudunki izhin bǝ wɔ, izhin bǝ zhin te na ŋur ruru te iyah itei vuŋ zhin. 2 Adudunki amin ne bɔ, aputuk atei lii. 3 Zinariya ben Azurfa min ne bla, ibla mǝne itei tsar ki na min, itei li kpa min klɛ ndi lu. Izhin ne biŋ adudunki nyak atu amin ne kpaŋ kɛ klɛ tu. 4 Izhin ne kyak ya idǝk kɛ abaŋ ndi ne nazhin ndum ndi zhin ne kyak ya ba ne gli zhin te gar amkpa ane te ambuk. Izhin iyi abɛ na zhin ndum gar ben Arik. 5 Izhin ne sɔŋ ne gɔŋmimi kǝŋe ne wɔ men. Izhin ne li te sɔ kiki min, izhin ne yɔk atu min ankyak, izhin te angɔŋgɔŋ ndi inarum ŋub bɛr yak. 6 Izhin ne te abɛ yaŋ lalɛ ambuk te ŋlɔk ba, ba ne na zhin ki mimin ba.

7 Ne me, izhin bɛ vuŋ zhin asusun, amunya te ŋub iber yi nyɛ Arik. Izhin bǝ tɔ ir keŋ ndi iner ne lɔn avuŋ susun te asɔŋ aŋub iki yiŋ ndi ne ti bǝ te sɛr. 8 Izhineba ba minyi, izhin bǝ vuŋ asusun te kli gbamgbaŋ te nyɛ Arik ne te gbahir. 9 Kǝr izhin bǝ wɔb akpa ne kla ba, amunya, te kǝr abɛ te zhin ambuk ba. Ine te ambuk aklɛ kli ne anɔkɔŋ!

10 Amunya, izhin bɛ tɔ ir keŋ ndi abɛ bla lɛ kɛ Arik ne vuŋ susun ne sak kɛ Arik. 11 Ndi zhin ne zhi, te di izhin yi abɛ nek anu adidik ne vuŋ susun min. Izhin ne wɔ ir keŋ ndi Ayuba ne vuŋ susun agli gbamgbaŋ, tei na wɔ ir keŋ ndi Arik ne nǝgu ikiki didik tetɛk ne klɛ tu, Arik alɔ susun tei na vuŋ susun.

12 Ankyak bɔbɔk, amunzumɔr bǝn amunvamɔr, kǝr izhin bɛ she arim ne gbarshu bǝn mimi ba kɔte ikinuŋ. Ikiyiŋ ndi izhin te nak di yi ankyak, iyi amɛ kɔ ba yi amɛ ba. Ikinuŋ te kama amɛ Arik atei te zhin ambuk.

13 Te yi ndi inuŋ ne miŋ min ayik ya, abɛ ben Arik. Inuŋ ate yik iki didik yi nyɛr, abɛ duk asem te gbara Arik asak. 14 Inuŋ te lɔ, abɛ zhɔ angɔŋgɔŋ abɛ akabaŋkɔŋ te bɛ benu Arik te shuru anyɛ ne tu ne sak kɛ Arik. 15 Iben Arik ne ita nyɛmɛ ne susun itei duŋ ner ne lɔ are; ŋgon ate duŋ ba lu akli te yi ndi ne na zumimin, atei zu gu azhɔk. 16 Ne me, izhin bǝ bla akpamin zumimin min te ben zhin akpa Arik atei duŋ zhin rɛ. Iben Arik iyi iner ne yi tsetser ne mgbyamgbyaŋ te na ndum.

17 Iliya ne yi neshir ndi mɔr. Ne ben Arik ne susun zhin te kǝr alu abɛ kuh ba, alu bane kuh ba har asi tar ne nki. 18 Ne na ben Arik te alu abɛ kuh, alu ne kuh, kɔte ŋɔwa ne sǝr ikpu maa.

19 Amunya, te yi ndi inuŋ te lalɛ mimin inuŋ abɛ gliu akama nyak ankɔŋɔ, 20 bɛ zhi te waŋ ndi te Gli ne na lalɛ mimin aŋyak ankɔŋɔ ne tau azhɔk ne kuh, ina amɛ itei ta aneshir tetɛk shur ne lalɛ mimin men.