Nahabag ang Diyos sa Juda at sa Israel
1 Humiling kayo sa Panginoon ng ulan
sa panahon ng tagsibol,
sapagkat siya ang gumagawa
ng mga ulap.
Binibigyan niya ng ulan ang mga tao
at ang bawat tanim sa parang.
2 Ang mga diyos-diyosan
ay nagsasalita nang mapanlinlang;
ang mga manghuhulaʼy bulaan ang pangitain,
ang mga panaginip na kanilang
sinasabiʼy pawang kasinungalingan,
ang aliw na ibinibigay ay walang kahulugan.
Kaya ang mga taoʼy lumalaboy
tulad ng tupa,
dahil walang pastol silaʼy nagdurusa.
3 Sinabi ng Panginoon,
"Galit na galit ako sa mga namumuno
sa aking mga mamamayan.
Talagang parurusahan ko sila.
Sapagkat aalalahanin
ng Panginoon ng mga Hukbo
ang kanyang kawan,
ang mga mamamayan ng Juda.
Gagawin ko silang tulad
ng mga kabayong matagumpay
sa digmaan.
4 Sa kanila magmumula ang mga pinuno
na ang katulad ay batong-panulukan,
tulos ng tolda, at panang ginagamit
sa digmaan.
5 Magkakaisa ang mga taga-Juda
at magiging katulad sila
ng mga sundalong malalakas
na tatalo sa mga kanilang mga kalaban
na parang putik
na tinatapak-tapakan sa lansangan.
Makikipaglaban sila
dahil kasama nila ang Panginoon,
at tatalunin nila ang mga mangangabayo.
6 "Palalakasin ko ang mga mamamayan
ng Juda at ililigtas ko
ang mga mamamayan ng Israel.
Pababalikin ko sila sa kanilang lupain
dahil naaawa ako sa kanila.
At dahil ako ang Panginoon na kanilang Diyos,
diringgin ko ang kanilang mga dalangin,
na parang hindi ko sila itinakwil tulad ng dati.
7 Ang mga mamamayan ng Efraim
ay magiging katulad
ng mga malalakas na kawal.
Magiging masaya sila
na parang nakainom ng alak.
Ang tagumpay na itoʼy maaalala
ng kanilang mga kaapo-apohan
at matutuwa sila
dahil sa ginawa Panginoon.
8 Tatawagin ko ang aking
mga mamamayan
at titipunin ko sila.
Palalayain ko sila,
at dadami sila tulad nang dati.
9 Kahit na ikinalat ko sila
sa ibang bansa,
maaalala pa rin nila ako roon.
Mananatili silang buhay
pati ang kanilang mga anak,
at babalik sila sa kanilang lupain.
10 Pauuwiin ko sila
mula sa Ehipto at Asiria,
at patitirahin ko sila
sa Gilead at Lebanon.
Magiging masikip sila sa kanilang lupain.
11 Tatawid sila sa dagat na maalon
ngunit magiging payapa ang mga alon.
At kahit ang Ilog ng Nilo
ay matutuyo.
Ang ipinagmamalaki ng Asiria
ay babagsak
at ang kapangyarihan ng Ehipto
ay mawawala.
12 Palalakasin ko ang aking mga mamamayan
dahil nasa akin sila,
at susundin nila ako saan man sila magpunta,"
sabi ng Panginoon.