Ang mga Ipinangakong Pagpapala para sa Jerusalem
1 Nagpahayag ang Panginoon ng mga Hukbo kay Zacarias.
2 "Labis ang aking pagmamalasakit sa Zion. At dahil sa labis kong pagmamalasakit, matindi ang galit ko sa mga kaaway nito.
3 "Babalik ako sa Zion, ang lungsod ng Jerusalem, at maninirahan doon. Ang Jerusalem ay tatawaging Tapat na Lungsod at ang bundok8:3 bundok: Ang Bundok ng Zion, na kung saan naroon ang templo. ng Panginoon ng mga Hukbo ay tatawaging Banal na Bundok."
4 Ito ang sinasabi ng Panginoon ng mga Hukbo: "Mauupong muli sa mga plasa ng Jerusalem ang matatandang nakatungkod dahil sa katandaan. 5 At mapupuno ang mga plasa sa lungsod ng mga batang naglalaro."
6 Sinabi pa ng Makapangyarihang Panginoon, "Maaaring imposible itong mangyari sa isip ng mga natitira kong mga mamamayan, pero hindi ito imposible sa akin," pahayag ng Panginoon ng mga Hukbo.
7 Ito ang sinasabi ng Panginoon ng mga Hukbo: "Ililigtas ko ang aking mga mamamayang binihag at dinala sa mga lupain sa silangan at sa kanluran. 8 Dadalhin ko sila pabalik sa Jerusalem at patitirahin doon. At minsan pang magiging mga mamamayan ko sila at ako ang kanilang magiging tapat at makatarungang Diyos."
9 Sinabi pa ng Makapangyarihang Panginoon, "Ang mga mensaheng ito ay sinabi rin ng mga propeta noong itinayong muli ang pundasyon ng aking templo. At ngayong napakinggan ninyo itong muli, magpakatatag kayo upang matapos ninyo ang pagpapatayo ng templo. 10 Noong hindi pa sinisimulan ang muling pagpapatayo ng Templo, walang pambayad sa mga taong nagtatrabaho at pang-upa sa mga hayop na ginagamit sa pagtatrabaho, at mapanganib kahit saan dahil pinag-aaway-away ko ang mga tao. 11 Ngunit ngayon, ako, ang Panginoon ng mga Hukbo, ay nagsasabi na hindi ko na gagawin iyan sa inyong mga natitira.
12 "Mapayapa kayong magtatanim.8:12 Mapayapa kayong magtatanim: O Malusog na tutubo ang mga binhing itinanim. Magbubunga ang inyong mga tanim na ubas, aani ang inyong mga bukirin, at magkakaroon na ng hamog. Ibibigay ko ang lahat ng ito sa inyo na mga natira. 13 Mga taga-Juda at taga-Israel, kung nooʼy naging sumpa kayo sa ibang mga bansa, ngayoʼy ililigtas ko kayo at gagawing pagpapala. Kaya huwag kayong matakot; sa halip ay magpakatatag kayo."
14 Sinabi pa ng Panginoon ng mga Hukbo, "Noong ginalit ako ng inyong mga ninuno, napagpasyahan kong parusahan kayo at huwag kahabagan. 15 Ngunit ngayon, napagpasyahan ko na muling maging mabuti sa Jerusalem at Juda. Kaya huwag kayong matakot. 16 Ito ang dapat ninyong gawin: Magsabi kayo ng totoo sa isaʼt isa. Humatol kayo nang tama sa inyong mga hukuman para sa ikabubuti ng lahat. 17 Huwag kayong magbalak ng masama laban sa inyong kapwa, at huwag kayong susumpa ng kasinungalingan dahil ang lahat ng iyan ay aking kinapopootan."
18 Nagpahayag ang Panginoon ng mga Hukbo kay Zacarias.
19 Ito ang sinasabi ng Panginoon ng mga Hukbo: "Ang pag-aayuno sa ikaapat, ikalima, ikapito at ikasampung buwan ay magiging masayang araw ng pagdiriwang para sa mga taga-Juda. Kaya pahalagahan ninyo ang katotohanan at kapayapaan.8:18-19 kapayapaan: O magkaroon ng mabuting relasyon sa bawat isa."
20 Ito ang sinasabi ng Panginoon ng mga Hukbo: "Maraming tao ang darating sa Jerusalem mula sa ibaʼt ibang lungsod. 21 Ang mga mamamayan ng isang lungsod ay pupunta sa isang lungsod at sasabihin nila, ‘Pupunta kami para dumulog at manalangin sa Panginoon ng mga Hukbo. Halikayo, sumáma kayo sa amin.’ 22 Maraming taong mula sa makapangyarihang mga bansa ang pupunta sa Jerusalem upang dumulog at manalangin sa Panginoon ng mga Hukbo."
23 Ito ang sinasabi ng Panginoon ng mga Hukbo: "At sa araw na iyon, sampung dayuhan na galing sa ibang mga bansa na may ibaʼt ibang wika ang lalapit sa isang Hudyo at sasabihin, ‘Gusto naming sumama sa inyo, dahil narinig namin na ang Diyos ay kasama ninyo.’ "