1 Ol brata mo sista. Long saed blong ol defdefren kaen paoa we Spirit blong God i stap givim long yumi, mi mi wantem blong yufala i mas savegud. 2 Bifo, taem we yufala i stap long hiten yet, ol narafala god ya we oli no laef, oli stap pulum yufala i go long olgeta, we yufala i no save lego olgeta. 3 From samting ya, mi wantem yufala i savegud mining blong tok ya blong mi. Man we Spirit blong God i stap lidim hem, hem i no save talem se, "Jisas i rabis." Mo man we Tabu Spirit i no stap lidim hem, hem i no save talem se, "Jisas i Hae God, i Masta* blong mi."

4 ✝Yumi gat ol defdefren kaen paoa, be i gat wan Spirit ya nomo blong God we i stap givimaot olgeta. 5 I gat ol defdefren kaen wok we yumi stap mekem, be i gat wan Masta ya nomo blong yumi, we yumi stap wok blong hem. 6 I gat ol defdefren kaen fasin blong mekem ol wok ya, be i gat wan God ya nomo we i stap wok insaed long olgeta man, blong oli gohed long ol wok ya. 7 God i givim Spirit blong hem long yumi wanwan, blong yumi evriwan i save givgivhan long yumi. 8 Long sam man, Spirit ya i stap givim tok blong waes, mo long sam narafala man, sem Spirit ya nomo i stap givim tok blong save. 9 Long sam man, sem Spirit ya i stap givim strong bilif long olgeta, mo long sam narafala man, hem i stap givim ol paoa, blong oli mekem ol sikman oli gud bakegen. 10 Long sam man, hem i stap givim paoa blong mekem ol merikel, mo long sam narafala man, hem i stap givim paoa blong talemaot ol tok we God i givim, mo long sam narafala man bakegen, hem i stap givim paoa blong luksave ol spirit we i gud mo ol spirit we i nogud. Long sam man, hem i stap givim paoa blong tok long ol narafala lanwis, mo long sam narafala man, hem i stap givim paoa blong tanem ol narafala lanwis ya, blong ol man oli save. 11 Be sem Spirit ya nomo i stap mekem ol wok ya. Hem i stap givim ol defdefren kaen paoa ya long evri man, stret olsem we hem nomo i wantem.

12 ✝Bodi blong man, hem i wan nomo, be i gat plante haf blong hem. Ol haf ya oli no sem mak, be oli joen gud blong mekem wan bodi nomo. Nao long Kraes* i olsem nomo. 13 Yumi evriwan, we fastaem yumi laen* blong Isrel*, no yumi no laen blong Isrel, yumi slef* no yumi friman, be naoia, yumi olsem wan bodi nomo. Yumi baptaes finis, mo long baptaes ya, Spirit ya we i wan nomo, hem i joenem yumi evriwan finis long bodi ya. Mo God i givim sem Spirit ya nomo long yumi evriwan, blong yumi gat laef long hem.

14 Bodi blong man i no gat wan haf nomo, i gat plante haf blong hem. 15 Sipos leg i talem se, "From we mi mi no han, mi no wan haf blong bodi," tok ya i no save mekem we leg i no moa wan haf blong bodi. 16 Mo sipos sora i talem se, "From we mi mi no ae, mi no wan haf blong bodi," tok ya i no save mekem we sora, i no moa wan haf blong bodi. 17 Sipos bodi blong mi i ae nomo, bambae mi no save harem wan tok. Mo sipos bodi blong mi i sora nomo, bambae mi no save harem wan smel.

18 Be i no olsem. God i mekem bodi blong man we i gat ol naranarafala haf blong hem, olsem we hem i wantem. 19 Sipos olgeta haf blong bodi ya oli sem mak nomo, bambae i no gat bodi blong man. 20 Bodi blong man i gat plante haf blong hem, be bodi ya i wan nomo. 21 Nao ae blong mi i no save talem long han blong mi se, "Mi mi no wantem yu." Mo hed blong mi i no save talem long leg blong mi se, "Mi mi no wantem yu."

22 Hem i no olsem. Ol haf blong bodi ya blong yumi we yumi stap ting se oli no gat paoa, be olgeta ya oli mas stap. 23 Mo ol haf blong bodi ya blong yumi we yumi stap ting se oli no flas, yumi stap flasemgud olgeta. Mo ol haf blong bodi ya blong yumi we yumi sem long olgeta, yumi stap putum klos long olgeta. 24 Be ol narafala haf blong bodi ya blong yumi we yumi no sem long olgeta, yumi livim olgeta olsem. God i mekem plan finis blong olgeta haf blong bodi blong yumi. Nao ol haf blong bodi ya blong yumi we yumi ting se oli nating nomo, be God i givim wok long olgeta we i stret long olgeta. 25 Nao long fasin ya, ol haf blong bodi blong yumi oli no save seraot. Evri haf blong bodi oli mas lukaot gud blong givhan long ol narafala haf blong hem. 26 Sipos wan haf blong bodi blong mi i harem nogud, be bambae olgeta bodi blong mi i mas harem nogud. Sipos man i presem wan haf blong bodi blong mi, be bambae olgeta bodi blong mi i mas harem gud.

27 Nao yufala evriwan, yufala i bodi blong Kraes. Mo yufala wanwan, yufala i haf blong bodi blong hem. 28 ✝Nao long jos, God i mekem ples blong olgeta man. Faswan, i gat ol aposol. Sekenwan, i gat ol profet. Namba tri, i gat ol tija blong jos. Mo bakegen, i gat ol man blong mekem merikel, mo ol man we oli gat ol paoa blong mekem ol sikman oli gud bakegen. Mo i gat ol man we oli stap givhan long ol man, mo ol man we oli stap lukaot long ol bisnes blong jos, mo ol man we oli gat paoa blong tok long ol narafala lanwis. 29 Taswe i no olgeta evriwan we oli aposol, no we oli profet, no we oli tija blong jos. I no olgeta evriwan we oli man blong mekem merikel, 30 no we oli gat ol paoa blong mekem ol sikman oli gud bakegen. I no olgeta evriwan we oli gat paoa blong tok long ol narafala lanwis, no blong tanem ol narafala lanwis ya, blong ol man oli save.

31 From samting ya, yufala i mas putum tingting blong yufala i strong moa blong kasem ol paoa ya we oli gudfala moa. Be naoia, mi wantem soemaot long yufala wan fasin we i nambawan blong folem, i winim ol narafala fasin.