1 Nao man ya i talem se,

"Daling,

yu yu woman blong mi.

Mi mi kam insaed finis

long gudfala ples ya blong mi.

Naoia mi stap tekem mir

mo ol lif we i gat gudfala smel.

Naoia mi stap kakae hani mo bed blong hem,

mo mi stap dring waen mo melek."

Nao ol woman ya oli talem se,

"Tufala,

yutufala i gohed,

yutufala i kakae,

yutufala i dring,

gogo yutufala i drong long fasin ya we yutufala i stap mekem."

2 Nao woman i talem se,

"Mi mi stap slip,

be mi stap tingbaot man ya blong mi,

nao mi drim,

mi luk se hem i stap kilkilim doa blong mi,

mo i stap singaot i kam.

Hem i talem long mi se,

‘Daling,

yu yu woman blong mi.

Maeswitat,

yu yu naes we yu naes.

Plis yu letem mi mi kam insaed.

Hed blong mi i wetwet long wota blong naet

mo hea blong mi i wetwet gud from.’

3 Be mi mi talem long hem se,

‘Mi mi tekemaot klos blong mi finis

blong mi slip,

mi no save putum bakegen.

Mi wasem leg blong mi finis,

mi no wantem mekem i doti bakegen.’

4 "Nao daling blong mi i pusum han blong hem

i kamtru long hol blong doa,

mo mi mi harem gud tumas long hem.

5 Nao mi girap blong letem hem i kam insaed.

Taem mi holem handel blong doa ya,

han blong mi i wetwet gud long mir,*

mo ol fingga blong mi oli fulap gud

long wota blong mir.

6 Mi openem doa blong hem i kam insaed,

be hem i go finis.

Mi wantem tumas blong harem voes blong hem.

Mi lukaot hem,

be mi no faenem hem.

Mi traem singaot hem,

be hem i no ansa.

7 "Ol polis we oli stap wokbaot long taon ya

mo we oli stap gad long bigfala stonwol blong hem,

oli kilim mi,

oli mekem mi mi karekil,

mo oli pulumaot kot blong mi.

8 Ol woman Jerusalem,*

plis yufala i mekem wan promes long mi,

se sipos yufala i faenem man blong mi,

bambae yufala i talemaot long hem

we mi mi stap wantem hem tumas,

gogo mi kam slak from."

9 Nao ol woman ya oli talem long hem se,

"Yu yu naes moa

i winim ol narafala woman,

be man blong yu i no naes moa

winim ol narafala man,

hem i sem mak nomo long olgeta.

?From wanem mifala i mas mekem

promes olsem long yu?"

10 Nao hem i talem long olgeta se,

"Man blong mi, hem i strong,

mo i naes we i naes.

Long ten taosen man,

hem nomo i naes olsem.

11 Fes blong hem i braon mo i smut.

Mo hea blong hem i blak we i blak

mo i sofsof gud.

12 Ae blong hem i naes we i naes,

olsem sotleg* we oltaem i stap klosap long reva.

Ae blong hem i klin gud,

mo i saen olsem flas ston long ring.

13 Fes blong hem i naes tumas,

i olsem garen we i fulap gud long ol plan

we lif blong olgeta i gat gudfala tes.

Mo maot blong hem i red gud,

olsem gudfala flaoa ya lili,

mo i wetwet gud long senta ya mir.

14 Han blong hem i strong mo i naes,

mo hem i stap putum ol ring

we oli flasem long gudfala ston.

Bodi blong hem i saen olsem tut blong elefen

we oli ravem i saen gud,

mo oli flasem long ol flas ston ya safaea.*

15 Leg blong hem i olsem tufala pos

we oli wokem long gudfala ston ya alabasta,*

we stamba blong tufala oli wokem long gol.

Taem mi luk hem,

mi stap tingbaot ol bigbigfala hil ya long Lebanon,

wetem ol sida* blong ples ya we oli longlongfala.

16 Maot blong hem i swit tumas blong kisim,

mo evri haf blong bodi blong hem,

mi mi laekem tumas.

"Ol woman Jerusalem,

tru, man ya blong mi,

hem i stret olsem we mi mi talem."