1 Be yumi ya, God i givim promes long yumi finis, se bambae yumi save spel olsem we hem i talem. Be yufala i mas lukaot. I nogud wan long yufala i no save kasem spel ya. 2 Yumi harem gud nius finis, stret olsem we olgeta ya bifo oli harem. Olgeta ya oli harem tok, be tok ya i no givhan long olgeta, from we oli harem, be oli no bilif long hem.

3 ✝Be yumi ya we yumi bilif, bambae yumi save kasem spel ya we God i stap tokbaot, we i talem se,

"Mi mi kros gud long olgeta,

nao mi mekem wan strong tok,

mi talem se, ‘Olgeta ya,

neva bambae oli go insaed long graon ya

we mi mi wantem givim long olgeta blong oli go spel long hem.’ "

God i tok olsem, be taem hem i mekem wol ya, wok ya blong hem i finis olgeta. 4 ✝I gat wan tok long Baebol we i talem se,

"Long namba seven dei blong hem,

God i spel long ol wok blong hem."

5 ✝Be tok ya i tokbaot spel ya bakegen se,

"Olgeta ya,

neva bambae oli go insaed long graon ya

we mi mi wantem givim long olgeta

blong oli go spel long hem."

6 Olgeta ya we oli harem gud nius ya fastaem, oli no kasem spel ya, from we oli no bilif long God. Nao i klia we i mas gat sam narafala man we oli save kasem spel ya, 7 ✝from we God i putum wan narafala dei we i talem se "Tede". Plante yia i pas, nao hem i yusum Deved blong talemaot samting ya long tok ya we mi talem finis, we i talem se,

"Tede,

sipos yufala i harem tok blong God,

bambae yufala i no moa mekem stronghed."

8 ✝Bifo, sipos Josua i bin givim spel long olgeta olsem we God i bin promes, bambae God i no save talem wan narafala dei bakegen. 9 Nao from we hem i talem wan narafala dei, i gat janis i stap yet blong ol man blong hem oli go spel, long sem fasin ya we hem i spel long wok blong hem bifo, long namba seven dei. 10 ✝Olgeta we bambae oli kasem spel ya, bambae oli save spel long ol wok blong olgeta, long sem fasin ya we God i spel long ol wok blong hem bifo. 11 From samting ya, yumi mas traehad blong kasem spel ya. I nogud wan long yumi i folem fasin blong olgeta ya bifo we oli no obei long God, nao hem bambae i no save kasem spel ya.

12 Tok blong God i wan samting we i laef, mo i stap wok, mo i sap we i sap, i winim naef blong faet ya we i sap tu saed. Hem i save go insaed long ples we tingting blong man i joen long laef blong hem, olsem we naef blong faet i save go insaed olgeta long bun, i kasem wota blong hem. Tok blong God i save jajem olgeta tingting blong man, mo ol samting we man i wantem long tingting blong hem. 13 I no gat wan samting nating long wol ya we God i mekem, we i save haed long fes blong hem. Olgeta samting oli stap long klia ples nomo, stret long fes blong hem. Mo long fes blong hem nomo, yumi evriwan i mas talemaot ol fasin blong laef blong yumi.

14 Yumi mas holemtaet fasin ya blong bilif we yumi talemaot finis se hem i bilif blong yumi. I tru, yumi gat wan nambawan Hae Pris* blong yumi, Jisas ya, Pikinini blong God, we hem i go insaed long heven finis, stret long fes blong God. 15 Hae Pris ya blong yumi, hem i savegud we yumi no gat paoa, nao hem i gat sore long yumi, from we olgeta samting blong traem yumi oli traem hem finis. Be wan samting nomo, hem i no mekem sin. 16 Nao from samting ya, i gud yumi mekem tingting blong yumi i strong, nao yumi kam long fes blong God we hem i stap givhan long yumi long gladhat blong hem. Nao hem bambae i sore long yumi, mo long gladhat blong hem, hem bambae i givhan long yumi, stret long taem we yumi trabol.