Lucas 7

31 Nao Jisas i gohed i talem se, "?Bambae mi save talem wanem tok, blong makem fasin blong ol man blong tede? Ol man ya oli narafala olgeta. 32 Olgeta oli olsem ol pikinini ya we oli stap sidaon long open ples long vilej, oli stap singaot i go long ol fren blong olgeta se,

‘Mifala i stap bloem bambu

blong yufala i danis,

be yufala i no save danis.

Mifala i stap singsing

long sing blong ded,

be yufala i no save krae.’

33 Taem we Jon Baptaes i kam, hem i stap livim kakae blong mekem wosip, mo hem i no dring waen. Nao yufala i stap talem se, ‘Man ya i gat wan devel i stap long hem.’ 34 Be taem we mi, mi Pikinini* blong Man, mi kam, mi stap kakae, mi stap dring. Nao yufala i stap talem se, ‘Yu luk. Man ya i man blong kakae tumas, mo i man blong drong. Hem i stap fren long ol man blong tekem mane blong takis, mo ol man nogud.’ 35 Be olgeta man we oli stap folem waes blong God, oli stap soemaot we waes ya i tru."

Wan woman we i woman nogud

36 Nao wan long ol Farisi* we nem blong hem Saemon, hem i singaot Jisas blong i go kakae long haos blong hem. Mo Jisas i go insaed long haos blong Farisi ya, i go sidaon blong i kakae. 37 ✝7.37: Mat 26.7; Mak 14.3; Jon 12.3Nao wan woman blong taon ya we i wan woman nogud, hem i harem we Jisas i stap kakae long haos blong Farisi ya, nao hem i go karem wan botel senta, i kam long ples ya. Botel ya, oli wokem long wan ston, nem blong hem alabasta.