1 Isiqalekiso esimayelana leDamaseko:

"Khangela iDamaseko kayisayikuba lidolobho

kodwa izakuba yinqumbi yamanxiwa.

2 Amadolobho ase-Aroyeri azatshiywa,

etshiyelwa imihlambi ezalala phansi

kungekho ozayenza yesabe.

3 Idolobho elivikelweyo lizanyamalala ko-Efrayimi

lamandla obukhosi eDamaseko;

insalela ka-Aramu izakuba

njengodumo lwabako-Israyeli,"

kutsho uThixo uSomandla.

4 "Ngalolusuku udumo lukaJakhobe luzakwehla;

amafutha asemzimbeni wakhe azancipha.

5 Kuzakuba njengalapho umvuni evuna amabele amiyo

evuna amabele ngengalo yakhe,

njenganxa umuntu edobha izikhwebu zamabele

eSigodini saseRefayi.

6 Ikanti ezinye izikhwebu zizasala,

njengalapho isihlahla se-oliva sibhuliwe,

kusale ama-oliva amabili loba amathathu

ezingatsheni eziphezulu kakhulu,

amane loba amahlanu ezingabeni zezithelo,"

kutsho uThixo, uNkulunkulu ka-Israyeli.

7 Ngalolosuku abantu bazathembela kuMenzi

wabo amehlo abo aphendukele koNgcwele ka-Israyeli.

8 Abayikuthembela ema-alithareni,

umsebenzi wezandla zabo,

njalo kabayikuzinanza izinsika zika-Ashera

lama-alithare empepha enziwa yiminwe yabo.

9 Ngalolosuku amadolobho abo aqinileyo, abawatshiyayo ngenxa yama-Israyeli azafana lezindawo ezatshiyelwa izixukwana lezihlahlanyana. Konke kuzakuba yincithakalo.

10 Selimkhohliwe uNkulunkulu uMsindisi wenu,

kalilikhumbulanga iDwala, inqaba yenu.

Ngakho lanxa ligxumeka izihlahla ezinhle,

lihlanyele lamavini avela ezizweni,

11 lanxa lingawenza akhule ngelanga

elizawagxumeka ngalo,

loba liwenze ahlume

ngekuseni eliwahlanyele ngayo,

kodwa isivuno sizakuba yize

ngosuku lwesifo lobuhlungu obungelaphekiyo.

12 Maye, ukuhlokoma kwezizwe ezinengi,

zihlokoma njengokuhlokoma kolwandle!

Yeka ukuxokozela kwezizwe,

zihuba njengokuhuba kwamanzi amanengi!

13 Lanxa izizwe zihuba njengokugubhuza kwamanzi,

nxa ezikhuza zibalekela khatshana,

njengamakhoba ephetshulwa ngumoya emaqaqeni,

lanjengothuli olubangwa yisivunguzane.

14 Kusihlwa kuba lokuthuthumela.

Kungakasi, kabasekho.

Lesi yiso isabelo salabo abasikhuthuzayo,

isabelo salabo abasihlaselayo.