1 Vuthelani icilongo eZiyoni;

hlabani umkhosi entabeni yami engcwele.

Bonke abahlala elizweni kabathuthumele,

ngoba usuku lukaThixo luyeza.

Selusondele, selufikile,

2 usuku lomnyama lokudana,

usuku lwamayezi lobumnyama.

Njengokusa kusendlaleka phezu kwezintaba,

liyeza ibutho elikhulu elilamandla

elingazange libe khona endulo

kumbe libe khona eminyakeni ezayo.

3 Phambi kwabo umlilo uyatshisa,

ngemva kwabo amalangabi ayavutha.

Phambi kwabo ilizwe linjengensimu yase-Edeni

ngemva kwabo yinkangala elugwadule,

akukho okubaphunyukayo.

4 Bakhangeleka benjengamabhiza;

bamatha njengamabhiza empi.

5 Ngomsindo onjengowezinqola zempi,

beqa phezu kwezingqongo zezintaba,

njengamabibi omlilo etshisa inhlanga,

njengebutho elilamandla selilungele impi.

6 Ekubaboneni nje, izizwe zizwa ubuhlungu;

ubuso bonke buyadana.

7 Bahlasela njengamaqhawe;

bakhwele imiduli njengamabutho.

Bonke bahamba beludwendwe

bengaphambuki endleleni yabo.

8 Kabasunduzani;

lowo lalowo uhamba eqonde phambili.

Badabula phakathi kwezivikelo

kungekho kwehlukana kubo.

9 Baya ngesiqubu edolobheni;

bagijima besekele umduli.

Bayakhwela bangene ezindlini;

bangena ngamawindi njengamasela.

10 Umhlaba uyanyikinyeka phambi kwabo;

umkhathi uyaqhaqhazela,

ilanga lenyanga kube mnyama,

lezinkanyezi kazisakhanyisi.

11 UThixo uyakhwaza

phambi kwebutho lakhe;

amabutho akhe angeke abalwe,

njalo balamandla labo abalalela ukulaya kwakhe.

Usuku lukaThixo lukhulu;

luyesabeka.

Ngubani ongalumela na?

12 "Lakhathesi," kutsho uThixo,

"phendukelani kimi ngenhliziyo zenu zonke,

ngokuzila langokukhala lokulila."

13 Dabulani inhliziyo zenu

hatshi izigqoko zenu.

Buyelani kuThixo uNkulunkulu wenu,

ngoba ulomusa lesihawu,

uyaphuza ukuthukuthela, ulothando olukhulu,

njalo uyaxola ukuthumela umonakalo.

14 Ngubani owaziyo? Engxenye angaphenduka abe lesihawu

atshiye isibusiso,

iminikelo yamabele leminikelo yokunathwayo

kaThixo uNkulunkulu wenu.

15 Vuthelani icilongo eZiyoni,

memezelani ukuzila okungcwele,

bizani ibandla elingcwele.

16 Buthanisani abantu,

ngcwelisani ibandla;

hlanganisani abadala,

buthanisani abantwana

labo abamunyayo.

Umyeni katshiye indlu yakhe

lomlobokazi atshiye ikamelo lakhe.

17 Abaphristi abakhonzayo phambi kukaThixo,

kabakhale bephakathi laphakathi kwentuba le-alithari.

Kabathi, "Awu Thixo, zwela abantu bakho.

Ungenzi ilifa lakho libe yinto yokuhlekwa,

isiga phakathi kwezizwe.

Kungani phakathi kwezizwe kumele bathi,

‘Ungaphi uNkulunkulu wabo?’ "

18 Lapho-ke uThixo uzakuba lobukhwele ngelizwe lakhe

abe lesihawu ebantwini bakhe.

19 UThixo uzabaphendula athi:

"Ngiyalithumela amabele lewayini elitsha lamafutha,

okwaneleyo ukulisuthisa ngokugcweleyo;

angiyikuphinda futhi ukulenza

into yokuhlekisa ezizweni.

20 Ibutho lasenyakatho ngizalixotshela khatshana lani,

ngilifuqele elizweni elomileyo elilugwadule,

amaviyo alo aphambili esiya olwandle lwasempumalanga

lawo angemuva esiya olwandle lwasentshonalanga.

Iphunga lalo elibi lizakuya phezulu,

umnuko walo uzaphakama."

Ngempela wenze izinto ezinkulu ezimangalisayo.

21 Ungesabi, wena lizwe;

thaba uthokoze.

Impela uThixo wenze izinto ezinkulu.

22 Lingesabi, lina zinyamazana zeganga,

ngoba amadlelo asesiba luhlaza.

Izihlahla sezithela izithelo zazo;

imikhiwa lemivini kuthela kakhulu.

23 Thabani, lina bantu baseZiyoni,

thokozani kuThixo uNkulunkulu wenu

ngoba ulinike izulu lekwindla

ngokulunga.

Ulilethela izulu elinengi

kanye lezulu lekwindla lelentwasa, njengakuqala.

24 Iziza zizagcwala amabele;

izikhamelo zizaphuphuma iwayini lamafutha.

25 "Ngizalihlawula okwaleyo minyaka lokho okwadliwa zintethe,

lesikhonyane lobuyane,

ezinye izintethe kanye lemitshitshi yezintethe,

ibutho lami elikhulu engalithumela kini.

26 Lizakuba lokudla okunengi lize lisuthe,

njalo lizadumisa ibizo likaThixo uNkulunkulu wenu,

olenzele izimangaliso;

abantu bami kabayikuphinda bayangeke futhi.

27 Ngakho lizakwazi ukuthi ngiko-Israyeli,

lokuthi mina nginguThixo uNkulunkulu wenu,

kanye lokuthi kakho omunye;

abantu bami kabayikuphinda bayangeke futhi."

28 "Emva kwalokho,

ngizathululela uMoya wami kubo bonke abantu.

Amadodana lamadodakazi enu azaphrofitha,

izinsizwa zenu zizabona imibono,

lamaxhegu enu azaphupha amaphupho.

29 Lasezincekwini zami, ezesilisa lezesifazane,

ngizawuthulula uMoya wami ngalezonsuku.

30 Ngizabonakalisa izimangaliso emazulwini

lasemhlabeni,

igazi lomlilo lezikhatha zentuthu.

31 Ilanga lizaphendulwa libe yibumnyama

lenyanga ibeligazi

phambi kokuba kufike

usuku olukhulu lukaThixo, olwesabekayo.

32 Njalo wonke obiza

ibizo likaThixo uzasindiswa;

ngoba eNtabeni iZiyoni laseJerusalema

kuzakuba lokukhululwa,

njengoba uThixo etshilo,

iloba phakathi kwabasindileyo

labo ababizwa nguThixo."