1 Ilizwi likaThixo lafika kimi lisithi, 2 "Hamba umemezele iJerusalema lisizwa uthi:

Lokhu yikho okutshiwo nguThixo:

‘Ngiyakukhumbula ukuzinikela kwasebutsheni bakho,

ukungithanda kwakho njengomlobokazi

ungilandela enkangala,

phakathi kwelizwe elingahlanyelwanga.

3 U-Israyeli wayengcwele kuThixo,

eyizithelo zakuqala zesivuno sakhe,

bonke abamtshwabadelayo baba lecala,

behlelwa yincithakalo,’ "

kutsho uThixo.

4 Zwana ilizwi likaThixo, we ndlu kaJakhobe,

lani lonke sendo lwendlu ka-Israyeli.

5 UThixo uthi:

"Yibubi bani okhokho benu ababubona kimi,

baze bedukele khatshana kangaka lami?

Balandela izithombe eziyize,

labo ngokwabo baba yize.

6 Kababuzanga ukuthi, ‘Ungaphi uThixo,

owasikhupha elizweni laseGibhithe

wasikhokhela emagangeni alugwadule

phakathi kwelizwe lezinkangala lezindonga,

ilizwe lokoma lobumnyama,

ilizwe elingahanjwa muntu lelingelamuntu ohlala kulo?’

7 Ngaliletha elizweni elivundileyo

ukuba lidle izithelo zalo lezilimo ezinhle.

Kodwa lina lafika langcolisa ilizwe lami,

lenza ilifa lami langakhwabitheki.

8 Abaphristi kababuzanga ukuthi,

‘Ungaphi UThixo?’

Labo abaphatha umthetho abangazanga;

abakhokheli bangihlamukela.

Abaphrofethi baphrofetha ngoBhali

balandela izithombe eziyize.

9 Ngakho-ke ngilethesa amacala futhi,"

kutsho uThixo.

"Labantwana babantwana benu ngizabethesa amacala.

10 Welani liye ngasemakhunjini aseKhithimi likhangele,

thumelani eKhedari lihlolisise kuhle,

libone langabe sekwake kwaba lento enjengale:

11 Isizwe sake santshintsha onkulunkulu baso na?

(Belo bavele kabasibo onkulunkulu.)

Kodwa abantu bami bantshintshe inkazimulo yabo

ngenxa yezithombe eziyize.

12 Mangalani lokhu, lina mazulu,

lithuthumele ngokwesaba okukhulu,"

kutsho UThixo.

13 "Abantu bami benze izono ezimbili:

Bangidelile,

mina mthombo wamanzi okuphila,

bagebha eyabo imithombo,

imithombo evuzayo engagcini manzi.

14 Kambe u-Israyeli yisisebenzi, isigqili ngokuzalwa na?

Pho kungani eseyimpango na?

15 Izilwane zibhongile;

sezihwabhile kuye.

Zilichithile ilizwe lakhe;

amadolobho akhe atshisiwe, atshiywa engaselamuntu.

16 Njalo, labantu baseMemfisi leThahiphanesi

baphuce ikhanda lakho.

17 Lokhu kawukwehliselanga phezu kwakho

ngokudela uThixo uNkulunkulu wakho

lapho ekukhokhela endleleni na?

18 Khathesi kungani usiya eGibhithe

ukuba unathe amanzi eShihori na?

Njalo kungani usiya e-Asiriya

ukuba unathe amanzi eYufrathe na?

19 Ububi bakho buzakujezisa;

ukutshedela kwakho emuva kuzakukhuza.

Ngakho cabanga ubone ukuthi kubi

njalo kubuhlungu kanjani

lapho udela uThixo uNkulunkulu wakho

njalo ungelavalo ngami,"

kutsho iNkosi uThixo uSomandla.

20 "Endulo wephula ijogwe lakho,

waquma izibopho zakho;

wathi, ‘Kangiyikukukhonza!’

Lakanye, phezu kwamaqaqa wonke

langaphansi kwazo zonke izihlahla eziluhlaza

walala phansi njengesifebe.

21 Ngikuhlanyele njengevini elikhethiweyo

elohlobo oluqinileyo loluthembekileyo.

Pho kwenzakala njani ukuba ungiphendukele

ube livini elibolileyo, leganga?

22 Lanxa ugeza ngesepa

usebenzisa lesepa enengi,

ichatha lobubi bakho

lilokhu likhona phambi kwami,"

kutsho uThixo Wobukhosi.

23 "Ungatsho kanjani na uthi, ‘Kangingcolanga,

kangibalandelanga oBhali’?

Khangela ukuthi waziphatha njani esigodini,

khumbula osukwenzile.

Ulikamela elisikazi elilesiqubu

eligijima lapha lalaphaya,

24 ubabhemi weganga ojwayele inkangala,

ophembela umoya enkanukweni yakhe,

ngubani ongamenqabela

ekukhanukeni kwakhe?

Abaduna abamxotshayo bangazidinisi ukuxotshana labo;

bazamthola ngesikhathi sezinsikazikhwela.

25 Ungagijimi inyawo zakho zize zihlubuke

lomphimbo wakho uze wome.

Kodwa wena wathi,

‘Akusizi lutho!

Ngiyabathanda onkulunkulu bezizweni,

kumele ngibalandele.’

26 Njengokuyangeka kwesela nxa selibanjiwe,

ngokunjalo abantu bako-Israyeli bayangekile,

bona kanye lamakhosi abo lezikhulu zabo,

abaphristi babo labaphrofethi babo.

27 Bathi esigodweni, ‘Wena ungubaba wami,’

elitsheni bathi, ‘Nguwe owangizalayo.’

Bangifulathele,

hatshi ngobuso babo nje;

kodwa nxa sebehlupheka bathi,

‘Woza usihlenge.’

28 Pho bangaphi onkulunkulu elazenzela bona?

Kabeze nxa bengakuhlenga

lapho usuphakathi kokuhlupheka!

Ngoba wena Juda ulabonkulunkulu abanengi

njengobunengi bamadolobho akho.

29 Kungani lingethesa umlandu?

Lonke lingihlamukele,"

kutsho uThixo.

30 "Ukubajezisa kwami abantu bakho kwaba yize;

kabakuvumanga ukuqondiswa.

Inkemba yakho isibatshwabadele abaphrofethi bakho

njengesilwane esiphangayo.

31 Wena owalesisizukulwane, khumbula ilizwi likaThixo:

Ngibe ngiyinkangala ku-Israyeli

kumbe ilizwe lomnyama omkhulu na?

Kungani abantu bami besithi,

‘Sikhululekile ukuba sizulazule;

kasiyikuza kuwe futhi’?

32 Intombi ingazikhohlwa iziceciso zayo na,

lomlobokazi akhohlwe izembatho zakhe na?

Kodwa abantu bami bangikhohliwe,

okwensuku ezingeke zibalwe.

33 Yeka ukuhlakanipha kwakho ekufuneni uthando!

Labesifazane ababi kakhulu

bangafunda ezindleleni zakho.

34 Ezigqokweni zakho

abantu bathola igazi lokuphila elabayanga

abangelacala lanxa ungababambanga befohlela phakathi.

Kodwa kukho konke lokhu

35 uthi, ‘Kangilacala;

kangithukuthelelanga.’

Kodwa mina ngizakwahlulela,

ngoba uthi, ‘Angonanga.’

36 Kungani uqhubeka kangaka,

untshintsha izindlela zakho?

IGibhithe izakuyangisa njengalokhu

owakwenziwa yi-Asiriya.

37 Uzasuka kuleyondawo

izandla zakho zisekhanda lakho,

ngoba uThixo ubalahlile labo obathembayo;

kabayikukusiza."