1 UThixo wembese iNdodakazi yeZiyoni

ngeyezi lolaka lwakhe!

Ubutaklazele phansi ubunkanyankanya buka-Israyeli

busuka ezulwini busiya emhlabeni;

kasinakanga isenabelo sakhe

mhla wentukuthelo yakhe.

2 UThixo kabanga lozwelo lapho eginya

yonke imizi kaJakhobe;

ngolaka lwakhe udilizele phansi

izinqaba zeNdodakazi kaJuda.

Usewuchithile umbuso wakhe,

lababusi bawo wababhuqa phansi, baba lehlazo.

3 Ngolaka lwakhe olwesabekayo,

usegumule zonke impondo zika-Israyeli.

Usegodle isandla sakhe sokunene

lapho kuqhamuka isitha.

Utshise koJakhobe njengelangabi

elihangula konke okuseduze.

4 Usethiye idandili lakhe njengesitha;

isandla sakhe sokunene sesiqaphile.

Njengesitha usebabulele bonke

ababebahle ebusweni;

usethele ulaka lwakhe olungumlilo

phezu kwethente leNdodakazi yeZiyoni.

5 UThixo unjengesitha;

usemginyile u-Israyeli.

Useziginyile zonke izigodlo zakhe,

wabhidliza zonke izinqaba zakhe.

Usekwandisile ukukhala lokulilela

iNdodakazi kaJuda.

6 Usetshaye wakhukhula umuzi wakhe njengensimu;

usebhidlize indawo yakhe yokuhlanganela.

UThixo usenze iZiyoni yakhohlwa

imikhosi yayo emisiweyo lamaSabatha ayo;

olakeni lwakhe olwesabekayo,

ukhukhulele khatshana oyinkosi longumphristi.

7 UThixo uselikhalele i-alithari lakhe,

wafulathela indlu yakhe engcwele.

Usenikele imithangala yezigodlo zakhe

ezandleni zesitha;

seziklabalala endlini kaThixo

sengathi lilanga lomkhosi omisiweyo.

8 UThixo wazimisela ukudilizela phansi

umthangala ohonqolozele iNdodakazi yeZiyoni.

Welula intambo yesilinganiso sakhe,

akaze agodla isandla sakhe esibhidlizayo.

Wenza izinsika lemithangala kwalila;

kanyekanye kwatshabalala.

9 Amasango akhe asegqibelekile;

izinti zawo zephulwe zabhidlizwa.

Inkosi yayo lamakhosana ayo achithizelwe kwabezizwe,

umthetho kawusekho,

labaphrofethi bakhe kabasayamukeli

imibono evela kuThixo.

10 Abadala beNdodakazi yeZiyoni

bahlezi emhlabathini bathule zwi;

bazithele ngothuli emakhanda abo,

bazembathisa amasaka.

Izintombi zeJerusalema

zimbozele amakhanda azo phansi.

11 Amehlo ami ayehluleka ngokukhala,

ngiyatsha ngaphakathi kwami,

inhliziyo yami idabukile,

ngoba abantu bakithi babhujisiwe,

njalo abantwana lensane ziyaqaleka

emigwaqweni yomuzi.

12 Zithi kubonina,

"Singaphi isinkwa lewayini?"

zilokhu ziqaleka njengamadoda alimeleyo

emigwaqweni yomuzi,

ziphela umphefumulo

ezandleni zabonina.

13 Kambe ngingathini kuwe na?

Ngingakulinganisa lani,

wena Ndodakazi yaseJerusalema?

Kambe ngingakufanisa lani

ukuze ngikududuze,

wena Ndodakazi eGcweleyo yaseZiyoni?

Inxeba lakho lizike njengolwandle.

Ngubani ongakwelapha na?

14 Imibono yabaphrofethi bakho

yayikhohlisa ingasizi lutho;

kabasivezanga obala isono sakho

ukuze ungehlelwa yikuthunjwa.

Ukuvumisa abalenzela khona

kwakungamanga, kulikhohlisa.

15 Bonke abedlula eceleni kwakho

batshaya izandla ngawe;

bahleka iNdodakazi yaseJerusalema

baze banikine amakhanda besithi,

"Kambe yiwo yini umuzi lo

owawuthiwa yibuhle obupheleleyo,

igugu lomhlaba wonke jikelele?"

16 Zonke izitha zakho zikukhamisele imilomo;

ziyakuhleka zikugedlela amazinyo

zisithi, "Sesimnqobile.

Selize lafika ilanga esasililindele;

kade salilindela."

17 UThixo usekwenzile ayekuhlosile;

useligcwalisile ilizwi lakhe,

alikhuluma kudala.

Ukuwisile engakuzweli usizi,

uvumele isitha santela phezu kwakho,

uluphakamisile uphondo lwezitha zakho.

18 Inhliziyo zabantu

ziyakhala eNkosini.

Awu, mthangala weNdodakazi yaseZiyoni,

kazigeleze njengomfula inyembezi zakho,

ebusuku lemini;

ungaziphi ikhefu,

lamehlo akho ungawaphi ukuphumula.

19 Phakama, nqongoloza ebusuku,

lapho kuqalisa imilindo yebusuku;

thulula inhliziyo yakho njengamanzi

phambi kukaThixo.

Phakamisela izandla zakho kuye,

uncengela impilo yabantwabakho,

abaqalekiswa yindlala

ekuqaliseni kwemigwaqo yonke.

20 Ake ukhangele, Thixo, ube lozwelo:

Ngubani osewake wamphatha kanje?

Abesifazane badle inzalo yabo yini,

abantwana ababondlileyo na?

Umphristi lomphrofethi

babulawe endlini engcwele kaThixo na?

21 Abatsha labadala babhazalele ndawonye

ebhuqwini lwemigwaqo;

izinsizwa zami lezintombi

zibulewe ngenkemba.

Ubabulele ngosuku lokuthukuthela kwakho;

awaze waba lesihawu lapho ubabulala.

22 "Njengokunxusela idili,

wanginxusela izitha inxa zonke.

Ngosuku lolaka lukaThixo,

kakho owaphunyukayo loba owasilayo;

bonke engangibanakekela lengabondlayo

babulewe yisitha sami."