1 Zakwoyi.

Kwoi lo da nyikwoza n Shekwoyi la wo knyi n əwo aɓyii, əza n mi ye wo dna n gaiciyanunui; əmi nu to ɓwasnu gbmanyi m, ama aza vnyanya ce n ɓa kpe gaiciyanunui əye, 2 ntu gaiciyanunui ɓo n kwo dna n əyi nyi, jesnu n kwo ɓa kwnusnu n yii nyalonyalo nyi.

3 Shebmyashi, snusnugye n bwugbafui n ɓa kwnu n Shekwoyi Dada aba n Yeisu Kirisiti, Dada Nugwnu, ɓa ɓá kwu kwnusnu n yii fyi n gaiciyanunui ɓədo n yeyei.

4 Kwo la mi ga agbmada yaakwo she mi gye əho aɓyi ho əwye ɓai znazna fyi n gaiciyanunui, n ɓwasnu ngye she Dada ɓə tu yi əgbe nyi. 5 Njesnu nsaiye, nyikwo yeyei, mi ta ka ɓəgbetu woiwoyi nu ga ho m, ama ədo n yi ɓe gwo n kpmisnui nyi. Mi gna nge yi ye n ajei. 6 Njesnu dəye nu zhni yeye: nge ya znazna fyi n ɓəɓwashi əwo gbetu nya. Ngye shi ho ɓə kwu wo n kpmisnui nyi, əwo gbetu əkwo nu nge yi znazna fyi n yeye.

7 Mi da dəye ntuge akwocednayi bəgye n ɓa too ye nge Yeisu Kirisiti ɓə lá ɓe dna n nayi m, ɓá kwu lofyi n anyi. Əza yi pya zhni kwocednayi nu ɓədo n Kirisiti nuwnuyii. 8 Fye la əwyewna nabai to fyei ɓwu ənya nuwna n yi kwu əkwo tnutnu zhni nyi m, ama nabai n fye ɓə myi fya gwo gyiba ń nunui. 9 Zahozahoyi n wo ɓa gwodu lo n abyei, ama to wa gwodu dna n Kirisiti nyawu m, wo to n Shekwoyii lo m; zahozahoyi n wa gwodu dna n nyawu, wo n Dadai lo ɓədo n Nugwnui. 10 Ndei əza wa ɓe əho aba jesnu to wa ɓe n nyawu yei shi m, to gwo wo dna n əho pwuwa, kwo ha zhni wo amamba m. 11 Zahozahoyi n wa zhni wo amamba, wo la əɓwa dnado nu n əwo əkpí tnutnu.

12 Mi n aɓoi lo n mwa bəgyé n mi ɓa ka ga ho, ama mi taa ye ma zhni apma n əpai ɓədo n nyakanuwna nyai nu m. N əkwoɓwi, mi n awyetui lo ma ɓe ho gnaɓyi njesnu yii daɓo n awyei ceaje, nabai n əyi agbmada ɓə kwu nu.

13 Əho mapwi aɓyi, əza n Shekwoyi la wo knyi nyi, wo tnu ho gnaɓyi lo.