1 Zakwoyi.

Kwo lo da Gayus nu, əmi nugwnudo yeyei, əza n mi ye wo dna n gaiciyanunui.

2 Nugwnudo yeyei, mi zhniaduwa nge ha wo agbmada nayida nya, jesnu nge n aɓo vnyanya ɓa lo ho n bmya, n ɓwasnu shi əho wyewyeyi gyiabye lo n bmya nyi. 3 Kwo ɓə la agbmada yaakwo ga mi, shi avyiyi ho ɓə ɓe ɓa gbmiɓo ntu əho gbenunu ɓo ga gaiciyanunui, ɓai wu yi shi ho gwodu lo hoi znazna dna n kwo. 4 Mi to n agbmada yaakwo ədoi lo, a fa ədo n mi ɓa wo nge əmi aɓyi znazna fyilo n gaiciyanunui nyi m.

5 Nugwnudo yeyei, ho zhni gbenuyi nu ntu əɓo ɓo n ho zhni ga əyi azaje n amapwii nyi, kwo shikwonyi ɓa zhni azhiɓeyi nu n ho aba. 6 Ɓa kwu əho yeyewu ɓo da ikilisiya. Sukwu gna ɓa ami dna n zokwo n kwo ɓa ga Shekwoyi mwamwa. 7 Ntu Əye yi ɓo nu n ɓa ɓə kwnuya lo to ɓai gwo bmazhni n ashnagbayi m. 8 Ntucenu yi gwo ya wu aza yi pya yeye, nabai n yi ɓa zhni tnutnu ɓədo ntu gaiciyanunui ɓo.

9 Mi ɓə kwu ka ga ikilisiya, ama Diyotrefyis, n wo ye waa gyi n abye nyi, wo to ɓə gwo yi m. 10 Ntulonu, əsa ń mi ɓəə ɓe, mi ɓə wu ho aɓo ń wo zhni lo, woi gná aɓənukwoi atnatukwogyii myí tu n əyi ɓo. Wo ta ɓwa Cenuzhni m, ama kwo kirisitiavyiyi aje wo ta gwo ɓa lo m. Njesnu wo kpma azaje azhiɓeyi gwo n ɓa ncei pma ɓa gwo, jesnu woi kwnu ɓa ya n ikilisiya.

11 Nugwnudo yeyei, to shna ɓənukwoi m, ama əɓo n kwo bmya. Əzahozahoyi n wo zhni əɓo n kwo bmya, wo gbmi n Shekwoyi aba nu. Əzahozahoyi n wo zhni ɓənukwoi, wo too gye Shekwoyi əwye m. 12 Zahozahoyi da Demyetus əɓo manai lo, kwo gaiciyanunui n əkwohni tukwo. Əyi ce, yi da wo əɓo manai lo, njesnu fye kpəlo nge əyi ɓəgbmi kwo zhni gaiciya nu.

13 Mi n aɓoi lo n mwa bəgyé ma ka ga ho, ama mi to ncei pmalo ma zhni apma n nyaka nyai ɓədo n nyakanuwna nyai nu m. 14 Mi n awyetui lo nge mi ɓa gye ho əwye dna n əsa fyewyi, yii daɓo n awyei ceaje.

15 Bwugbafu kwo kwnusnu n fyei.

Anugwnudo n ɓa fyi n ya nyi, ɓa tnu ho gnaɓyi lo. Ɓyi anugwnudo əgna əzahozahoyi n əwo əyei.