1 Yahuda, Yeisu Kirisiti tnutnuloyi njesnu Jemyis zado.

Kwo lo da aza yi nu, n a la ɓa yi nyi, aza n a ye ɓa fyi n Shekwoyi Dada jesnu n azai n a ncei zhi ntu n Yeisu Kirisiti ɓo.

2 Snusnugye, bwugbafu ɓədo n yeyewui ɓa kwu zhni əfye anya n mwa kwokwo.

3 Əmi anugwnudo ayeyeyi, kwo shikwonyi mi ɓə faafa shi nu ma kanya ga fye ntu gnyignyi ɓo n yi ncei kwnusnu nyi, kwo ɓə la mi zè ɓəshishi nu ma kanya, ma tna fye aɓwa nge fye snukwnú ntu gaiciyaga ɓo, ədo n a ɓə la kwo ga dna n Shekwoyi aza agyigyiyi akwnu nyi. 4 Ntuge azaho ń əɓa knyiznu ɓə ka shi aye bəgyé n ɓa la duya nyi, ɓa kwu lofyi n fye mi fyaa. Ɓa zhni atnashekwodnawoyi nu, n ɓa pmyi əyi Shekwoyi shebmyashi əɓwa lo nayi shakpe cegye nya, ɓədo n anagbáizhnii, jesnu ɓai na Yeisu Kirisiti aɓo n əwo nu ɓwa əyi Begyiyi duduyi zhni n Dagayi nyi. 5 Kwo shikwonyi fye kpe aɓo ye ye lo vnyanya, mi ncei pmalo ma ce fye ɓəpá nge Dagayi ɓə la əwo aza gnyi n Masar dna nsaho, ama n dəye avnu wo ɓə kwu aza yi wu n ɓa to ɓə ga wo gaiciya nyi m. 6 Njesnu amaləka n ɓa to ɓə kpefyi n ikwo əɓa tnutnu nya nyi m, ama ɓa kwu əɓa azhiba hnihnii ya; wo kwu adəye yafyi n wyegbma, n papai n agbma nyalonyalo nyai, ntu n owada nyipyei yaakwo nya ɓo. 7 Dna n zokwo ye pya, Sodom n Gwomworai n azhii n ɓa ɓə shekna ɓa nyi, ɓa kwu ɓahni ga anagbáizhni ɓədo n aɓəkasazhnii. Ɓa kwu zè aɓədogbe ga aza yi n ɓa ɓə gwo tata n əná nyalonyalo nyai nyi. 8 N ɓwajesnu n zokwo gbmanyigbmanyi ye, fyi n akalá əɓa ananu nya, atnashekwodnawoyi ye, ɓa wnu əɓa anayi ya, ɓai na aikwoda aɓo, ɓai knyi ashemida akpmi. 9 Ama kwo amaləka tukwoda Mikailu, əsa n ɓa ɓə zhi ɓai naɓo kpeaje n Shetam yii ntu n Mwusa nayi ɓo, wo to ɓə ye əwohni wa da ɓəda nukwoi əknyiznu nya tu n Shetam tukwo m, ama wa gna, "Dagayi gnaknyi ho lo!" 10 Dudulonu, aza ye da aɓəda nukwoi dəhodəhoi n ɓa to n kwo awyegai lo m, ado n ɓa n kwo awyegai lo ɓa zhni ɓa nubwo fyi n nayi nu; shi anyakpa atnanubwozhnii zhni nyi; anya ye nu lo n ɓai n əɓa agbmazhni. 11 Owii n ɓai! Ɓa kwu wna Kayinu zokwo; ɓa la bwusi lo Balaam abaɓwi gyiba, a kwu ɓa zhniagbmaya fyi n Kora tukwo kalákpe. 12 Aza ye zhni acegyeda nu fyi n yezhi yeye nyagyi nya aba, ɓai kwnu nyagyigyi n fyei n tna ədna kwo cewyi. Aknyiknayi n ɓa ɓwa əɓahni nu nyagyi ga. Ɓa zhni anyi nu n tna ogbma, n əse kwu ɓaya nyi; amikegye shnuwna, n tna ənya gyigyiyi jesnu n shishiiya n agbegye; n fyifyiyi aɓwa ngwnu-aba. 13 Ɓa zhni anuwnadokwo anyaceyi shikwo nya nu, ɓai pwuafugya əɓa vnyinyikwo nya; ngye akpasi aznaznayi, ntu n əɓa ɓo nu n a n wyegbma ciciricii zhni shi lo nyalonyalo. 14 Enok, əza tnaabayi n Adamwu, ɓə kwu sheɓəgwognada ntu aza ye ɓo: "Gyewye Dagayi ɓe lo n əwo aza gyigyiyi, adugwu kpe n adugwu 15 woi da zahozahoyi owa, jesnu woi kwu əɓəgyi atna shekwodnawoyi vnyanya ntu əɓa tnashekwodnawo aɓəzhni ɓo n ɓa ɓə kwu zhni fyi n əɓa tnashekwodnawo nyi, jesnu ntu aɓədagbma akasai ɓo n atnashekwodnawoyi aleifyizhniyi ɓə kwu da tu n əwo tukwo." 16 Aza ye zhni agwnunugwnunudayi nu jesnu aɓəgyi znashniyi; ɓa vyi əɓahni ɓəmwi nukwoi, ɓai gyigbe ga əɓahni jesnu ɓai ci azaje, ɓai ga ɓa mwamwa ntu n ɓahni gyiba ɓo.

17 Ama, anugwnudo ayeyeyi, fye pa əɓo n atnutnuloyi əyi Dagayi Yeisu Kirisiti nya ɓə kwu pma da. 18 Ba ɓə kwu gna fye, "Dna n asa akpmaknai aɓəkwuyayi ɓəi ɓe, n ɓa ɓə vyi əɓahni tnashekwodnawo aɓəmwi." 19 Aza ye nu gna fye ajeya, n ɓa vyi zanyikwoci azanga alu, ama n tna Zafnu. 20 Ama əfye, anugwnudo ayeyeyi, fye kwu əfyehni mi fyi n əfye gaiciyaga gyigyiyi duduyi jesnu n aduwazhnii fyi n Zafnu Gyigyiyi, 21 fye kwu fyehni wnafyi n Shekwoyi yeye əsa n fye zhilo fyei pmi snusnugye əyi Dagayi Yeisu Kirisiti nya kwoi ɓe n fyei fyi n wyewyeyi nyalonyalo nya. 22 Fye gye aza yi snusnu n ɓa n abwugbai fyilo ngwnu-aba. 23 Fye gnyi azaje ngye fye gwo ɓa ya n əná, ga azaje fye wu ɓa snusnugye, n gbmiaje n ədnai; fye wnu kwo aje nu n nayi wnuwnuiya la kwo tucegye.

24 Ga əwo n wo ɓa myi wa kna fye n bwonyice jesnu wa ɓe n fyei n əwo latu abye n tnaɓətu n bwugbabwui yaakwoi; 25 Latu, mwamwa duduyi, kalá n ikwoi ɓa zhni Shekwoyi gbmanyi kəto nya nu n əyi Gnyiyii, dna n Yeisu Kirisiti əyi Dagayi, n wo ɓe nyi n asa vnyanya abye, nsaiye jesnu nyalonyalo! Aamyi.