1 Ɓəkpəkpəyawu n kwo kwnu n Yeisu Kirisiti, ədo n Shekwoyi ɓə wu Yohana, n kasnu Yohana wa wu əwo atnutnuyi, əɓo n kwo zhni ɓəshishi nu kwa zhni ntna əsa mwai. Yeisu ɓə zhni a kpe kwo əɓo, əsa n wo ɓə tnu n Maləkai nu lo Yohana aba əwo tnutnuyi. 2 Yohana nu ɓə gbmiɓo ɓəhoɓəhoi nya n wo ɓə kwu gyewye; əkwo nu zhni Shekwoyi ɓədagbma n ɓəgbmii Yeisu Kirisiti nya. 3 Anabəlikada nu n əza yii n wo ba Sheɓəgwogna aɓədagbma ye n bəgye latui, jesnu anabəlikada nu n aza yii n ɓa wo kwo jesnu ɓa kwu əɓo n kwo kafyi nyi wnafyi n ədu, ntuge əsa kwo la wo vyivyiwyi.

4 Yohana.

Kwo lo da aikilisiya ngwnu-tnaaba nu n ɓa fyi n Asiya əknyi nyi.

Shebmyashi n bwugbafui kwo ɓe da fye kwoi gbmi n wo aba n wo nyì, n wo ɓəə nyì, jesnu n wo ɓe lo nyí, jesnu kwoi gbmi n azafnu ngwnu-tnaaba, n ɓa zhi n əwo əbeshnikpegye abye nyi; 5 kwo gbmi n Yeisu Kirisiti nu, n wo nu zhni ɓəgbmiyi gaiciyazhninunui nyi. Əwo nu zhni kpmisnui n wo ɓə laka n əfyi, jesnu əwo nu zhni begyiyi tu n asu anyì nya vnyanya.

Ga əwo n wo wu yi yeye jesnu n wo ɓə loyiya ń əyi aleifyi n əwo amii nyi, 6 jesnu wo la yi zhni əbemi ɓədo n apirisitii, ya zhni əwo Shekwoyi tnutnu n əwo Dadai; latu zhni əwo nya nu n kalái nyalonyalo nyai! Aamyi.

7 "Gyewye, wo ɓe lo n kwnusnu n anyìi,"

jesnu "əwye dəhodəhoi ɓə gye wo əwye,

kwo aza yii ń ɓa ɓə fnyi wo ənya nyi";

jesnu n azai vnyanya fyi n anyì "ɓə wnubwugba ntu n əwo ɓo."

Nlonu nu n kwo ɓə la zè! Aamyi.

8 "Əmi nu zhni Kpmisnuyi n Kpmaknayii" ənya nu n Dagayi Shekwoyi da lo, "Əza n wo nyì, jesnu əza n wo ɓəə nyì, jesnu əza n wo ɓe lo, Kaláda Duduyi Vnyanya."

9 Əmi, Yohana, əfye zado jesnu ɓwadodnayi dna n azhnìgye dna n Shekwoyi əbemi, ɓədo n bwugbaɓwa əmìfyi nyai, n ɓa zhni əyi anya nu dna n Yeisu nyi, mi ɓə tu n Patmos mwuse nu ntu n Shekwoyi ɓədagbma ɓədo n ɓəgbmii Yeisu nya. 10 N Dagayi Nyipyeii, mi ɓə dna n Zafnu, ma wo bəgye latui n əmi avnu ngye mwayi, 11 kwoi gna: "Kanya kpe n əpa əɓo n ha gyewye jesnu ha tnu aikilisiya ngwnu-tnaaba n kwoi: Afyisus, Simyina, Pyegamwu, Tiyatira, Sadis, Fyiladefyiya n Lawudisiyai."

12 Ma pmyiawye ntuge ma gye bəgye n kwo ɓə gnyi kwoi daɓo n mii nyi. Shi mi ɓə pmyi ma gye apyitila-kwnuyi azinali nya n zhi ngwnu-tnaaba, 13 jesnu dna ń apyitila-kwnuyi əzaho ɓə dna n wu ngye əza nugwnu n əje kpadalaii kpe kwoi si əwo apitabwada ɓədo n əjeɓyii zinali nyai wna n əwo agwu. 14 Əwo tukwoyi ɓə fnafnai ngye lulu, n fnafnai ngye əgbmakwuta, jesnu əwo awyekwnunu ɓə wu ngye əná-gwogwoi nu. 15 Əwo apitabwada ɓə wu ngye snuknabyei nu dna n əná-gwogwoi, jesnu əwo bəgye ɓə wo ngye avava əɓwi nu.

16 Wo ɓə n akpasii shi ngwnu-tnaaba, n əwo ɓwaizhe ɓwa, jesnu əbeyaakwo gyigyii agbe-abada kwoi gbmiɓe n əwo əgbe. Əwo awyeba ɓə wu ngye nyipyei nu n kwo fnu n əkwo kalái vnyanya.

17 Shi mi ɓə gye wo əwye, ma myiya shi n wo apita aba ngye mi la fyí. Nlonu wa tu əwo ɓwaizhe ɓwa n əmi, wa gna: "To wodna m. Əmi nu zhni kpmisnuyi n kpmaknayii. 18 Əmi nu zhni əza n wo n wyewyeyii lo; mi ɓəə la fyí, ama gyewye mi n wyewyeyi lo nyalonyalo! Njesnu əmi nu n anyagwunyai shi əfyi nya ɓədo n Akwu nyai.

19 "Ntucenu, kanya n ho kwu gyewye, əɓo n kwo lo nsaiye n əɓoi n kwo ɓa zhni n abye. 20 Əɓəɓwuɓwui akpasi tnaaba nya n ho ɓə gyewye n fyi n əmi ɓwaizhe ɓwa nyi, jesnu n zinali apyitila-kwnuyi ngwnu-tnaaba nu nyi: Akpasi ngwnu-tnaaba nu zhni amaləka aikilisiya ngwnu-tnaaba nya, jesnu apyitila-kwnuyi ngwnu-tnaaba nu zhni aikilisiya ngwnu-tnaaba."