1 Nlonu maləka wa wu mi əlà nuwna wyewyeyi nya, n wu təgetəge ngye maganyi, kwoi zhe n Shekwoyi əbeshnikpegye ɓədo n Kwugyasnáyii 2 kwoi shnizhi n atasnii dnadna yaakwo nya n əzhiyaakwo yi. Ma ń əlà-akpma ngwnu-aba-aba nya, shnuwna wyewyeyi nya ɓə gnyi, kwoi ga anyanunu gyigyi awoceaba, kwoi ga əkwo gyigyi n əpya dəhodəhoii. Njesnu shnuwna yi əkwo afnyitolo ɓə zhni shigbe kágna nya nu ntu abye ɓo. 3 A to ɓə je knyitu dəhodəhoi wyegye m. Ntuge Shekwoyi əbeshnikpegye n Kwugyasnáyi nyai kwo ɓə dna n əzhiyaakwo, jesnu əwo atnutnuyi ɓa ɓə zhni wo tnutnu. 4 Ba ɓə gye əwo awyeba əwye, jesnu a ɓə kwu əwo əye kakpe n əɓa anyikwnumi. 5 Sukwo to ɓə jezhni m. Ba to ɓə shna pyitila bwuznagna apma ɓwa, kwo nyipyei bwuznagna m, ntuge Dagayi Shekwoyi ɓə ga ɓa bwuznagna. Jesnu ɓa ɓə gyibe nyalonyalo nya.

6 Maləka wa gna mi, "Aɓədagbma ye n kwnuce a shiɓwa jesnu gaiciya nu. Dagayi, Shekwoyi n wo dna sheaɓəgwognayi bwugbakala n zafnu nyi, əwo nu ɓə tnu n əwo maləkai wa wu əwo atnutnuyi aɓo n ɓa zhni ɓəshishi nu ɓa zhni n tna əsa wnuyai."

7 "Shiawye, mi ɓe lo n tna əsa wnuyai! Anabəlikada nu n əzai n wa shi aɓədagbma sheaɓəgwognayi nya n ɓa kafyi n əpakpmikpmii ye nyi."

8 Əmi, Yohana, əmi nu ɓə wo jesnu ma gye aɓo ye əwye. Əsa n mi ɓə kwu aɓo ye wo jesnu mii kwu ɓa gyewye, ma yashi nabai ma ga maləka mwamwa n wo ɓə gnyi woi wu mi aɓo ye nyi.

9 Ama wa gna mi, "To zhni ce m! Mi zhni tnutnuyi nu ce n kwnusnu n hoi ɓədo n əho sheɓəgwognayi ajei ɓədo n azai vnyanya n ɓa shi aɓədagbma əpakpmikpmii ye nya əɓwa nyi. Ga Shekwoyi nu mwamwa!"

10 Nlonu wa gna mi, "To la aɓədagbma sheɓəgwogna əpakpmikpmii nya ye tuznu m, ntuge əsa la wo vyivyiwyi. 11 Fa əza n wo zhni ɓəkasa wo gwodu n əwo ɓəkasazhnii; əza n wo wnuwnuiya wo gwodu dna n əwo wnuwnuya; əza n wo zhni ɓəfyece wo gwodu n əwo ɓəfyecezhnii; jesnu əza n wo gyigyiyi wo gwodu dna n əwo gyigyi."

12 "Shiawye, mi ɓe lo n tna əsa wnuyai! Əmi gyiba shilo n mii, jesnu mi ɓə ga zahozahoyi kwo she wo ɓə zhni əwo atnutnu n wu. 13 Əmi nu zhni, kpmisnuyi n kpmaknayii, Ayayaba n Azobai.

14 "Anabəlikada nu n aza yii n ɓa zhna əɓa aje, nabai n ɓa ɓə myi ɓa ɓwa ikwo ɓa ɓwa shnuwna wyewyeyi nya jesnu ɓai lofyi n əzhiyaakwo abwokwnumi. 15 Amwi nu zhi n əbmyi, aza n ɓa snu-ashna, asisiɓozhniyi, azawuyi, ashnagbayi ɓədo n azai vnyanya n ɓa ye jesnu ɓai ceakata.

16 "Əmi, Yeisu, mi la tnu n əmi maləkai wa ga fye ɓəgbmi ye ga aikilisiya. Əmi nu zhni Gbegye ɓədo n Dawuda Yawyii. Əmi nu zhni Mwukwo Kpasi Laabmi nya."

17 Zafnu ɓədo n mwula nyikwoi gna lo, "Ɓe!" Njesnu fa əza n wo wo lo, wo gna, "Ɓe!" Zahozahoyi n nuwna myikwnu wo wo lo, wo ɓe, jesnu əza n wo ncei pmalo, wa gwo nyaga nuwna wyewyeyi nya wo ɓe wa gwo n adaada.

18 Mi ga zahozahoyi ɓəkwnu n wo wo aɓədagbma sheɓəgwogna əpakpmikpmii ye nya: əza n wa ɓe ənya n ɓa, Shekwoyi ɓə ɓe əza yi ogwnu n a ncei kafyi n əpakpmikpmii ye. 19 Njesnu ndei əzaho wa kwnu aɓədagbma ya n ɓa fyi n əpakpmikpmii sheɓəgwogna ye nya, Shekwoyi ɓə gbmi nyahonyahoi ya n əza yi ɓə kwnu gwo n shnuwna wyewyeyi nya ɓədo n Əzhiyaakwo Gyigyiyii, shi a ncei kafyilo n əpakpmikpmii ye nyi.

20 Əza n wo gbmiɓo tu n aɓo ye nyi, wo gna, "Əə, mi ɓe lo ntna əsa wnuyai." Aamyi. Ɓe Dagayi Yeisu.

21 Shebmyashi Dagayi Yeisu nya ɓa kwnusnu n Shekwoyi azai. Aamyi.