1 "Kanya, kwa lo da maləka Ikilisiya nya dna n Afyisus:

Aɓədagbma nu nyi n əwo, ń wo n akpasi ngwnu-tnaabai shi n əwo ɓwaizhe ɓwa jesnu n wo znazna dna n apyitila-kwnuyi azinali nya ngwnu-tnaaba atasni.

2 "Mi kpe əfye atnutnu əye lo, əfye tnutnu shnawoi ɓədo n əfye əmìfyii. Mi kpəlo nge fye ta ye lo n akpizhniyii m, nge fye kwu aza yi tumwi n ɓa gna nge ɓa zhni atnutnuloyi nyi, ama ɓa to zhni əɓa nu m, jesnu fye kwu gye nge ɓa zhni akwocednayi nu.

3 "Fye kwu əmìfyi jesnu fye lá bwugbaɓwa azhnìgye nya ntu əmi əye ɓo, jesnu a too ɓe fye m.

4 "Dudulonu mi n ɓəyei shi lo tu n əfye tukwo: Fye lá yeye ya n fye ɓəə ncei n kpmisnuii nyi.

5 "Fye pa asna ɓo aba n fye ɓə kaya nyi! Fye yeabwi fya zhni aɓo n fye ɓə shnizhni n kpmisnui nyi. N fye to yeabwi m, mi ɓa ɓe əfye aba ma lá əfye pyitila-kwnuyi n əkwo aba.

6 "Fye la bmyashi ɓwa ntu ɓəye ɓo kwoi da mi: Fye ta ye lo n Anikwolatiyayi aɓəzhnii m, əmihni ta ye ɓa lo ce m.

7 "Əza n wo n atnubwai lo, akpəge wo wo əɓo n Zafnu gna aikilisiya nyi. Ga əza n wa gyi nasala, mi ɓa ga wo shnuwna gyigyi wyewyeyi nya wa gyi, n kwo nu zhni paradisi Shekwoyi aza nya."

8 Kanya, kwa lo da maləka Ikilisiya nya dna n Simyina:

Aɓədagbma nu nyi n əwo, ń wo nu zhni Kpmisnuyi n Kpmaknayii, əza n wo ɓə la fyí, waa laka gnyi n wyewyeyi njesnu.

9 "Mi kpé əfye azhnìgye əye lo ɓədo n əfye əsnagyii; dudulonu fye n nyaɓwai lo! Mi kpe aye nukwoi əye lo n aza yi yi fye ncei, n ɓa gna nge ɓa zhni Ayahudiyi nu, ɓanyi to zhni əɓa nu m, ama ɓa zhni Ayahudiyibwokwnu Shetam nya nu.

10 "Fye to wodna ntuge fye ye fya gyeazhnì m. Əmi nu gna fye, Shetam ɓə kwu azaho fyi n fye ń zhalu, nabai wa mwi fye, jesnu wa wu fye awyesnugbegye aɓo anyipyei ngwnu-awo. Fye kwu myizhi n gaiciyaganunui, kwo kwoi ɓə la lo əfyi nya nu, jesnu mi ɓə ga fye wyewyeyi, kwoi la zè əfye nasalagyi fnunyi.

11 "Əza n wo n atnubwai lo, akpe wo wo əɓo n Zafnu gna aikilisiya nyi. Ga əza n wa gyi nasala, əfyi baayi to ɓə gye wo əwye m kpeekpe.

12 "Kanya, kwa lo da maləka Ikilisiya nya dna n Pyegamwu:

"Aɓədagbma nu nyi n əwo, ń wo əbeyaakwo agbe-abadai gyigyiyiidai lo.

13 "Mi kpe aba əye lo n fye fyi, aba n Shetam əbeshnikpegye dna nyi. Dudulonu fye kwu kpefyi n gaiciya dna n əmi əye. Fye too na əfye gaiciyaganunui ɓo dna n mi, kwo dna n Antipas anyipyei m, əmi ɓəgbmiyi gbenuii, əza n a ɓə wu n əfye əzhiyaakwo, aba n Shetam dna nyi.

14 "Kwo shikwonyi, mi n aɓoi lo fyewyi kpe n fye: Fye n azai fyilo n əfye atasni n ɓa n Balaam nyawui shiɓwa lo, əza n wo ɓə wu Balak nge wo dna Aisrailayi kwoce ɓa zhni leifyi n ashna nyagyi gyii jesnu ɓa zhni asisiɓo. 15 Nlonu ce əhohni ho n azai lo n ɓa n Anikwolatiyayi nyawui shiɓwa lo.

16 "Fye yeabwi ntu nce! Ntolonu m, mi ɓa ɓe əfye aba n pyeepye jesnu ma snukwnú n ɓai n əbeyaakwo əmi əgbe nyai.

17 "Əza n wo n atnubwai lo, akpəge wo wo əɓo n Zafnu gna aikilisiya nyi. Əza n wo ɓə gyi nasala, mi ɓə ga wo manna ho n kwo sosoishì. Njesnu mi ɓə ga wo kwuta bwuibwui n əye woiwoyii ka tu n kwo, əza n wo ɓə gwo kwo nyi, əwo nu ɓə ɓwa kwo əyekpé.

18 "Kanya, kwa lo da maləka Ikilisiya nya dna n Tiyatira:

"Aɓədagbma nu nyi Shekwoyi Nugwnu nya, əza n əwo awyebyegyè wu ngye əná-gwogwoi nu jesnu əza n əwo apitabwada wu ngye snuknabyei bmyibmyii nagyii nu.

19 "Mi kpe əfye atnutnu əye lo, əfye yeye ɓədo n gaiciyaganunui, əfye tnutnuzhni ɓədo n əmìfyii, jesnu nge fye zhni aɓo lo nsaiye n du əsa kpmisnuyi.

20 "Dudulonu, mi n ɓəyei shi lo tu n əfye tukwo: Fye ga nyikwo ye, Jezebyel aba lo, n wo yi əwohni nge sheɓəgwognayi nyi. Wo zhni əmi atnutnuyi lo ɓai kwnuya n ofye, lo asisiɓozhni n əwo nyawui jesnu ɓai gyi ashna nyagyi. 21 Mi la əsa ga nyikwo ye wa yeabwi n əwo asisiɓozhni, ama wo kwu kpakalá. 22 Ntulonu mi ɓə la wo sheyatu n akpákwoi n gədo azhnìgye nya, jesnu mii zhni aza, n ɓa zhni anagbái n woi nyi, ɓai gyeazhnì zhamzhamii, akpəge ɓa yeabwi n ɓa zhni n woi nyi. 23 Mi ɓə zhni nyikwo ye aɓyi ɓa fyí. Nlonu n aikilisiya vnyanya ɓə kpe nge əmi nu dna aza adu awye ɓədo n aza bwugba pmigyei, jesnu mi ɓə gba zahozahoyi əta n fye, ənya n fye kwu zhni nyi. 24 Nsaiye mi gna əfye n fye ce fyi n Tiyatira nyi, əfye n fye too gwo nyikwo yi nyawu, jesnu fye too tu aɓo mwì, n a yi ge Shetam aɓo ɓwuɓwui ashnishnii nyi m, ‘Mi taa tu fye akaya ashnawoi do m, 25 akpəge fye gwodu fyaa ənya shiɓwa n fye ncei lo nyi, nya əsa n ma ɓe.’

26 "Əza n wo ɓə gyi nasala jesnu woi zhni əmi ɓəye lo azoba, mi ɓə ga wo ikwo tu n abye tukwo; 27 əwonu ɓə gyibe tu n əɓa tukwo n bwusi snukna nyai.

"Njesnu woi vyiɓaya zhi n əknyi wyiwowyiwo ngye shakwnu-mimii; n ɓwasnu ngye she mi la ikwo gwo n əmi Dada nyi. 28 Mi ɓə ga zadəyi kpasi laabmi nya ce. 29 Əza n wo n atnubwai lo, akpəge wo wo əɓo n Zafnu gna aikilisiya nyi.