1 Ma shiawye, shi Kwugyasnáyi ɓə gwu tuzè kpmisnui ya ń atuzè ngwnu-tnaaba yi. Nsayi ma wo gbmanyi n anya wyewyeyi ngwnu-anyi yi, kwoi daɓo n bəgyei ngye əgbmawyije, "Ɓe!" 2 Ma shiawye ma gye dokwo bwubwui gnyi n əmi abye! Əkwo gwnuyi ɓə ń tayii shi, jesnu aa fnunyi ga wo, wa gbmiya tu lo ngye okwnu nasalagyiyi n bwugbai dna wa gyi nasala n okwnu.

3 Əsa n Kwugyasnáyi ɓə gwu atuzè baayi ya, ma wo ənya wyewyeyi baayi kwoi gna, "Ɓe!" 4 Nlonu dokwo do kwa gbmiɓe, byeibyei cuu. A ɓə la akalá ga əkwo gwnuyi, nge wo la bwugbafu gbmiya ń anyìi, jesnu wa zhni aza ɓa wu aje. Aa əbeyaakwo dnagbmai ga wo. 5 Əsa n Kwugyasnáyi ɓə gwú tuzè taayi ya, ma wo ənya wyewyeyi taayi kwoi gna, "Ɓe!" Ma shiawye ma gye dokwo zhii nu gnyi n əmi abye! Əkwo gwnuyi ɓə gnyi n anyamwinya adoloi shi ngwnu-aba n əwo akwnu. 6 Nlonu ma wo ngye bəgye n kwo gbmi n anya wyewyeyi ngwnu-anyi yi atasni, kwoi gna, "Alikama n nyamwinyai ngwnu-aba nu zhni nyipyei gbmanyi tnutnu gyiwye, jesnu bale nyamwinyai ngwnu-tnanyi nu zhni nyipyei gbmanyi tnutnu gyiwye, jesnu fye to kwu omi zhniagbma n anamnuwnai m!"

7 Əsa n Kwugyasnáyi ɓə gwú tuzè nyiiyi ya, ma wo bəgye ənya wyewyeyi nyiiyi nya kwoi gna, "Ɓe!" 8 Ma shiawye, ma gye dokwo zhniwnazhniwnai n gnyi! A ɓə n əkwo gwnuyi tuye nge Əfyi, jesnu Akwu ɓə vyi kwo n avnu vyivyiwyi. A ɓə lá ikwo ga ɓa nabai ɓa wu okwu gbmanyi n akwu ngwnu-anyi n əbeyaakwoi, myikwnu nazhii n ogwnùi, jesnu n anyawnanyawna anyì nyai.

9 Əsa n wo ɓə gwu tuzè tnuuyi ya, ma gye n bəgədi snuta aza wyewyeyi n a ɓə la ɓa ceashaya ntu Shekwoyi ɓəda ɓo, n ɓəgbmiyi n ɓa ɓə kwu shiɓwa nyi. 10 Ɓa yi n bəgyei latu, "Dagayi Kaláda Duduyi, gyigyiyi n gaiciya, kwo ɓá la əsa aknyii nu, ha da anyì owa jesnu ha gba əyi ami əta a?" 11 Nlonu a ga zahozahoyi n ɓa, əje bwuibwui kpadalai, jesnu a gna ɓa nge ɓa ye kwu pmi əsa fyewyi kpa, nya əsa n əɓa atnutnuyi aje azanugbai n anyikwozai, n a ye a wu nyi, ɓai kwu nu ń bəgyé n ɓwasnu shi a ɓə wu ɓa nyi.

12 Ma shiawye shi wo ɓəə gwu tuzè tnaanyii ya. Anyì jeashna yaakwo ɓə kwu zhni. Nyipyei kwa pmyi n wu zhiizhiyii ngye əjekwokwoi, ń a zhni kwo n əna-əyii nyi, əpya vnyanya kwa pmyibma wu byeibyei ngye ami, 13 jesnu akpasi n anyìbmana ɓa kaya zhi n əknyi ngye shi əgbà gyigyi kaya n əgbà shnuwna nyi; əsa ń ase kaláda shna kwo ashna. 14 Ashebmana ɓa yefyi ngye shi a kpmi əpakpmikpmii, jesnu əpe dəhodəhoi n amwusei aa ɓa kwuya n əɓa aba.

15 Nlonu asu anyì nya, abeɓyi, akwnudawazha, anyaɓwayi, akaláda, n zahozahoyi, afyenu n aloloiyai, ɓa kwu ɓwufyi n abmi jesnu fyi n akwuta ape nya. 16 Ɓa yi ape n akwutai, "Fye myiya kpe n əyi, jesnu fya kwu yi ɓwu n əza yi awyeba n wo sasetu n əbeshnikpegye nyi, n minagyi napyeii Kwugyasnáyii nya!

17 "Ntuge nyipyei yaakwo əɓa minagyi napyei nya kwo la ɓe, jesnu nyika nu ɓa pwo kwo a?"