1 She wo ɓə kpe tuzè tnaaba yi nya ya, əshemi kwaa gnyi pyipyipyi ngye əsa snukna tokwnu nya. 2 Jesnu ma gye amaləka ngwnu-tnaaba n ɓa zhi n Shekwoyi abye, jesnu a ga ɓa amwayi yaakwo ngwnu-tnaaba.

3 Maləka ədo, n wo ɓə n zinali shakwnu nyasnidaí ənakpe nyai shi nyi, wa ɓe wa gnyiagnyi gnyi n bəgədi aba. A ga wo nyasnidai n mwa wa ga nyaga, ɓədo n aduwazhnii n Shekwoyi aza vnyanya ɓə zhni kpe n zinali bəgədi n əbeshnikpegye abye nyi. 4 Awú anyasnida nya, ɓədo n aduwazhnii Shekwoyi aza nyai, ɓa gwnulo Shekwoyi aba ɓai kwnu n maləka akwnu. 5 Nlonu maləka wa la shakwnu nyasnida nya, waa kwo nu n ənái n wo ɓə cé n bəgədi, wa zè kwo ya kpe n anyì; jesnu əgbma kwa jeawyi kwoi gwoya laɓa, kwa sáwyi, əgbmana kwa bmyana laɓa ɓədo n anyì ashnajei.

6 Nlonu amaləka ngwnu-tnaaba n ɓa ɓə n amwayi ayaakwo tnaabai shi nyi, ɓa ye əɓahni nabai ɓa bye ɓa. 7 Maləka kpmisnui wa bye əwo mwayi yaakwo, jesnu agbmakwuta n ənái gbmiaje n amii ɓa ɓe, a kwu ɓa sheya kpe n əknyi. Əknyi okwu gbmanyi, ń akwu ngwnu-ata ɓa kwu gyina, ashnuwna okwu gbmanyi n akwu ngwnu-ata, ɓa kwu gyina, jesnu agbegbe shnipwui vnyanya ɓa kwu gyina.

8 Maləka baayi wa bye əwo mwayi yaakwo, jesnu nyaho ngye əpeyaakwo, kwoi gyina vnyanya, a she kwo ya dna n shikwo. Shikwo okwu gbmanyi n akwu ngwnu-ata kwaa zè ami, 9 anya awyewyeyi okwu gbmanyi n akwu ngwnu-ata fyi n shikwo ɓa kwu fyí, aya nuwnanya okwu gbmanyi n akwu ngwnu-ata ɓa kwu zhniagbma.

10 Maləka taayi wa bye əwo mwayi yaakwo, jesnu kpasi yaakwo, kwoi fnu ngye naɓwi, kwa kaya n əshebmana tu n okwu taayi adna nya n anyaɓwo-nuwnai, 11 kpasi yi əye nu nge Bədobədo, anuwna okwu gbmanyi n akwu ngwnu-ata ɓa kwu wo n liliyii, jesnu aza bəgyé ɓa kwu fyí ntu nuwna ɓo n kwo ɓəə la zè bədobədo nyi.

12 Maləka nyiiyi wa bye əwo mwayi yaakwo, jesnu nyipyei okwu gbmanyi n akwu ngwnu-ata aa kwo znunya, nlonu ce, əpya n okwu gbmanyi n akwu ngwnu-ata, ɓədo n akpasi okwu gbmanyi n akwu ngwnu-ata, nabai okwu gbmanyi n əɓa akwu ngwnu-ata, ɓa kwu fyi wyegbma. Nyipyei okwu gbmanyi n akwu ngwnu-ata to ɓə n bwuznagnai, nlonu, sukwo ce, okwu gbmanyi n akwu ngwnu-ata. 13 She mi ɓe dnawye, ma wo znukwo n kwo ɓə tu lo kwoi gyeafu n anyìbmana kwoi yi n bəgye kalái: "Owii! Owii! Owii n azai n ɓa fyi n anyì, ntu mwayi yaakwo byebye ɓo, n kwo ye kwa kwnuɓwi ya n amaləka aje ngwnu-ata aba nyi!"