1 N dəye avnu, ma gye maləka ədo woi gbmi shnizhi ɓe ń əshemi. Wo ɓə n ikwo yaakwoi, jesnu anyì ɓaa nu gnyi n bwuznagnai ntu əwo fnufnu yaakwo ɓo. 2 N bəgye kaladai wa fyiakwu:

" ‘Kwo la myiya! Kwo la myiya! Babyila Yaakwo kwo la myiya!’

Kwo la zè ase nukwoi afyiba

jesnu zafnu ajegbmiyi dəhodəhoi adnaba,

əlú cegye nya dəhodəhoi pya adnaba,

adnaba ntu afwanya tnagyii wnuwnuiya dəhodəhoi pya.

3 Ntuge abye vnyanya ɓa kwu anamnuwna nyacei nya sni,

əwo əje nyacei anagbáizhni nya.

Asu əknyi nya, ɓa kwu anagbái zhni n woi,

jesnu agnyikwognyiyi əknyi nya, ɓa kwu nyaɓwa ɓwaɓe n mwa, n kwo kwnu n əwo agbmada wyidui."

4 Nlonu ma wo bəgye ədo kwoi gbmi n əshemi kwoi gna:

" ‘Əmi aza, fye la kwnuya n wo,’

nabai n fye taa dnaɓwa n əwo aleifyi m,

nabai n fye taa gwo əwo əgwnu dəhodəhoi m;

5 ntuge a la əwo aleifyi takpeaje gwnulo, nya əshemi,

jesnu Shekwoyi wo kwu əwo aɓəkasa aɓo pa.

6 Jezelo ho ga wo shi a ɓə la ga wo nyi;

a gba wo əta aɓwa aba ntu əɓo ɓo n wo kwu zhni nyi.

A zè ənya fyi wo aɓwa ngwnu-aba, n kwo fyi n əwohni bwoɓyi nyi.

7 A tu wo azhnì zhowozhowo yi jesnu a ga wo bwugbawnu aɓwa aba

ngye latu n agbmadai wyidui n wo ɓə ga əwohni nyi.

Dna n əwo bwugba, wo gyigbe lo,

‘Mi sasetu n əbeshnikpegye nu n zhni əsu nyikwo.

Mi to zhni nyigbayi nu m,

jesnu mi taa zhni bwugbazhii m nanyinanyi.’

8 Ntucenu ń nyipyei gbmanyi nu n əwo agwnù ɓə losa wo:

əfyi, bwugbazhii n myikwnujilai.

Əná ɓə kwu wo zhniagbma,

ntuge Dagayi Shekwoyi n wo da wo owa nyi, wo zhni ikwoda nu.

9 "She asu əknyi nya, n ɓa ɓə zhni anagbái n woi nyi jesnu ɓa kwu aɓwafyi n əwo agbmada wyidui nyi, ɓə gye awú əwo ənakpe nya, ɓa ɓəə ciɓwi jesnu ɓai zhni bwugbazhii ntu əwo ɓo. 10 Ǹ vnyivnyii ntu ń zhowozhowoi ɓo n wo wo nyi, ɓa ɓə kwu gnyiagnyi zhi n kpaai jesnu ɓa ciɓwi:

" ‘Owii! Owii n əho aba, əzhiyaakwo,

əho əzhiyaakwo dnagbmai Babyila nya!

Dna n snukna gbmanyi, əho agbmazhni kwo la ɓe!’

11 "Agnyikwognyiyi əknyi nya ɓa ɓə ciɓwi jesnu ɓai zhni bwugbazhii ntu əwo ɓo, ntuge əzaho to ye si əɓa akaya lo m; 12 akaya zinali nya, azulufa, akwuta anakwoi n anya manaii; alulu manai, jebwàda, əje luweluwei n əje byeii; sitiron shnuwna dəhodəhoi pya, anya azhnizhnii dəhodəhoi pya n a zhni ɓa n adagba nyiknai, ashnuwna anakwoi, snukna byeii, snukna zhii n akwuta abalu nyai; 13 akaya sinnamon nya n anyàgba nyai, n anyasnidaii, myiri n frakisensii, anamnuwna n zaitu omii, wyilukwu ɓyiɓyii n alikamai; anakwo n aknyii; adokwo n akayakwu nyai; n azanyikwocii n a kwnu ɓa n zhni afyenu.

14 "Ba ɓə gna, ‘Ənya gyigyiyi n ho ɓə gnyi n əkwo fnafnai nyi, kwo la pəya n əho aba. Əfye nyaɓwa vnyanya ɓa la bwusiya, jesnu fye taa shna ɓa wyegye m nanyinanyi.’ 15 Agnyikwognyiyi n ɓa ɓə kwnú anya ye, ɓa ɓwa əɓa nyaɓwa n wo nyi, ɓa ɓə gnyiagnyi zhi n tagnyi, n vnyivnyii ntu əwo azhnìgye zhowozhowo ɓo. Ba ɓə ciɓwi jesnu ɓai zhni bwugbazhii 16 jesnu ɓai ciɓwi n kalái:

" ‘Owii! Owii n əho aba, əzhiyaakwo,

n alulu manai ajei kpe, jeɓwada, n byeibyeii,

kwoi bmyana n zinalii, akwuta manai n a Pearii!

17 Dna n snukna gbmanyi nyaɓwa yaakwo ye kwo kwu zhniagbma!’

"Shikwo tukwoda dəhodəhoi, n azai vnyanya n ɓa znazna n əya nuwnanyai, ayadnayi, jesnu n azai vnyanya n ɓa ɓwa nyagyi n əya nuwnanya tnutnu nyi, ɓa ɓə gnyagnyi zhi n kpaai. 18 She ɓa ɓə gye awú əkwo ənagyi nya, ɓa ɓə gna, ‘Əzhiyaakwo ədo ɓə shnisnu ngye əzhiyaakwo dnagbmai ye?’ 19 Ɓa ɓə kwu aɓwutukwnu kpe n əɓa atukwo, jesnu ɓai ciɓwi ɓai zhni bwugbazhii ɓai gna:

" ‘Owii! Owii n əho aba, əzhiyaakwo,

aba n aza vnyanya n ɓa ɓə n ayanuwna nyai kpe n shikwo

ɓa kwu agyiwye ɓwa n əkwo nyaɓwa!

N snukna gbmanyi a kwu wo zhniagbma!’

20 "Fye nya agbmada tu n kwo, ashemi!

Nya agbmada, əfye, Shekwoyi aza!

Fye nya agbmada atnutnuloyi n sheaɓəgwognayii!

Shekwoyi wo kwu owa da wo,

n owai, n nyikwo yi ɓe znutu fye nyi."

21 Nlonu maləka yaakwo wa la kwuta dnagbmai nsnu ngye ata wyigwo nya jesnu wa she kwo ya dna n shikwo, wa gna:

"N akalaɓəzhni ye pyai nu

n a ɓa she əzhiyaakwo Babyila ya shi n əknyi,

jesnu to ai je əkwo əwyegye m kpeekpe.

22 Amwulo snáyi, anyagyiyi, n amwayi bye yii,

a taa je ɓa wo dna n ho m kpeekpe.

A taa je aɓwaze tnutnuyi dəhodəhoi nya

gye dna n ho m kpeekpe.

A taa je atá wyigwo nya ashna wo dna n ho m kpeekpe.

23 Bwuznagna pyitila nya

taa je fnu dna n ho m kpeekpe.

A taa je bəgye mwulaɓa n mwulanyikwo nyai wo

dna n ho m kpeekpe.

Əho aɓwazeyi nu ɓə zhni anyì vnyanya aza dnagbmai.

N əho ashigbe zhniyi nu n abye vnyanya ɓə ɓwuaba.

24 Dna n kwo nu n a ɓə gye asheɓəgwognayi ami n Shekwoyi aza agyigyiyi nyai,

aza vnyanya n a la ɓa gbeashaya fyi n anyi."