1 Tumise kwaa kwnukpe n shikwo əgbe. Jesnu ma gye nyawnanyawna kwoi kwnuɓe n shikwo. Kwo ɓə n amwayii gyi ngwnu-awo n atukwoi gyi ngwnu-tnaaba, n afnunyii kwnu n əkwo amwayi, jesnu tu n tukwo dəhodəhoi, kwo ɓə n əye atukwopmi ɓədai ka tu. 2 Nyawnanyawna n mi ɓə gye nyi, kwo ɓə gbe nakpmi, ama kwo ɓə n apitai wu ngye nyafwanya n a yi ge byiya, jesnu n əgbei wu ngye gaba. Tumise kwa ga nyawnanyawna əkwo kalá yaakwo əbeshnikpegye nya. 3 Nyawnanyawna yi əkwo tukwo gbmanyi, ɓə wu ngye kwo ɓə lá əci yaakwo ɓwa, ama əci yaakwo yi ɓəə la ɓyi. Anyì vnyanya ɓə nunui gnyi n ɓəwowoi jesnu ɓa vyi nyawnanyawna yi. 4 Aza ɓa ga tumise yi mwamwa, ntuge wo ɓə lá ikwo ga nyawnanyawna yi, jesnu ɓa ga nyawnanyawna yi mwamwa ce, ɓa nyaɓo, "Nyika nu lo ngye nyawnanyawna ye a? Nyika nu ɓa myi wa snukwnú n əkwoi a?"

5 A ɓə la əgbe ga nyawnanyawna wa da tukwomwa aɓədagbma n atukwopmi nyai, jesnu wa wu əwo ikwo apya ngwnu-shinyiceaba. 6 Kwa kpe əkwo əgbe ya nabai kwa da atukwopmi ɓəda kpe Shekwoyi jesnu kwa wnu əwo əye ya n əwo asesebai ɓədo n aza yii n ɓa fyi n əshemi nyi. 7 A ɓə la kalá ga kwo nabai kwa snukwnú n Shekwoyi aza gyigyiyii jesnu kwa gyi nasala tu n ɓa. Njesnu a ɓə la ikwo ga kwo tu n əbyé dəhodəhoi, ń azai, n anyitalai, n əknyii. 8 Aza vnyanya n ɓa fyilo n anyì nyi, ɓa ɓə ga nyawnanyawna yi mwamwa; aza yi vnyanya n a to n əɓa ayei kafyilo n Kwugyasnáyi pafyi wyewyeyi nya m, Kwugyasnáyi n a ɓə la wo znusha tunyi n anyì zhnizhni əsa.

9 Zahozahoyi n wo n atnubwai lo, akpəge wo wo.

10 Ngye əzaho lo n a ɓa wna lo ncei n əknyido nu,

əknyii nu n a ɓa wna wo lo ncei.

Ngye əzaho lo n a ɓa wu wo n əbeyaakwoi nu,

əbeyaakwo nu ɓa wu wo.

Dəye wu ge Shekwoyi aza ɓa ɓwa bwugba əmìfyi nya jesnu n gbenui.

11 Nlonu ma gye nyawnanyawna baayi kwoi gbmiɓe n əknyi. Kwo ɓə n amwayii gyi ngwnu-aba ngye Kwugyasnáyi, ama kwa daɓo ngye tumise. 12 Kwo ɓə kwu ikwo vnyanya nyawnanyawna kpmisnui nya pya wu n əkwo apitaɓwi, jesnu kwa zhni aza vnyanya fyi n anyì, ɓa ga nyawnanyawna kpmisnui mwamwa, ń əkwo əci yaakwo ɓə la ɓyi nyi. 13 Nlonu kwa kwu aznù ayaakwo wu, kwaa si kwoi yi əná kwoi kaya shnizhi n əshemi zhi n əknyi n aza awye pəipəi. 14 Ntu n aznù ɓo n a ɓə ga kwo ikwo ge kwo zhni n nyawnanyawna kpmisnui apitaɓwi nyi, kwa kwu aza n ɓa fyi n anyì nyi dnakwoce. Kwa ga ɓa əgbe nge ɓa la ənyadogbe shignyi ntu nyawnanyawna ɓo n a ɓə tu kwo əci n əbeyaakwoi, kwaa dudu kwaa gnyi n wyewyeyi nyi. 15 A ɓə la kalá ga nyawnanyawna baayi kwa ga nyawnanyawna kpmisnui nyadogbe əsnu, nabai n nyadogbe yi ɓa myi kwa daɓo, jesnu kwa zhni aza vnyanya n ɓa to ɓə ye ɓa ga nyadogbe mwamwa nyi m, a kwu ɓa wu. 16 Njesnu kwaa kwo zhni ɓəshishi nu, n aza vnyanya aba; əza yaakwo n anawyii, gyiwyeda n əsnayii, loloiya n fyenuyi, ɓa gwo atuzè n əɓa əɓwa ɓwaizhe nya, kwo n nyikwnumi, 17 nabai n zahozahoyi taa myi wa si ənya kwo wa kwnu ənya m, akpəge wo n atuzèi tu lo, n kwo nu zhni əye nyawnanyawnai nya kwo nyadokwu əwo əye nya nyi.

18 Dəye wu ge a la wyemwa ɓwa. Akpəge əza n wo n awyegai lo, wa kwu nyawnanyawna namba aje, ntuge kwo zhni zanyikwoci namba nu. Namba yi nu nyi, atagyi-tnanyi-cei-shiitnanyi-ceitnanyi (666).