1 Maləka gbmanyi n əɓa ngwnu-tnaaba n ɓa ɓə n ashnapa tnaabai shi nyi, wa ɓe wa gna mi, "Ɓe, ma wu ho tata, kaluwa yaakwo nya, n wo sase ma n anuwna bəgyé nyi.

2 "N nyikwo yei nu n asu ń ɓa fyi n əknyi nyi ɓəə zhni anagbái, jesnu azanyikwoci n ɓa ɓə fyi n əknyi nyi, ɓa ɓə jejei zhi zam ntu anamnuwna əwo anagbáizhni nya n ɓa sni nyi."

3 Nlonu maləka wa la mi lo ncei dna n Zafnu lo zhabwikawu. N abaayi ma gye nyikwoza n sasetu n nyawnanyawna byeibyei n kwo ɓə shi n pwuanya shi n atukwopmi ɓədai jesnu n atukwoi gyi ngwnu-tnaaba n amwayii gyi ngwnu-awo.

4 Nyikwoza yi ɓə n aje bmyinabmyinai nu kpe ɓədo n byeibyei, jesnu kwoi bmyana n zinalii, akwuta anakwoi ɓədo n anya amanaii. Wo ɓə n bwoɓyi zinali nyai shi n əwo akwnu, n nunui n asisiɓoi ɓədo n anya nukwoi əwo anagbáizhni nya.

5 Əye n kwo ɓə ka tu ń əwo nyikwnumi nyi kwo ɓə zhni asigyi nu:

Babyila Yaakwo Akaluwa Əya Ɓədo n Asisiɓoi n Əknyi.

6 Mi ɓə gye nyikwo ye n fyije nu shi, n Shekwoyi aza gyigyiyi amii, aza yi ami, n ɓa ɓə gbmi Yeisu əɓo nyi. She mi ɓə gye nyikwo ye, kwaa mi zè ɓəwowo n mwa zam.

7 Nlonu maləka wa gna mi: "Knyiyi nu zhni cei wo ho a? Mi ɓa ga ho awyega asigyi əɓo, nyikwo ye nya, ɓədo n nyawnanyawnai n wo gwnu kwo nyi, n kwo n atukwoi gyi ngwnu-tnaaba n amwayii gyi ngwnu-awo nyi. 8 Nyawnanyawna n ha gye kwo nyi, kwo ɓə nyi, ama nsaiye kwo to ye lo m, jesnu kwo ɓə gbmi gwnuzhi n ɓwokwnu loloyi nu, kwoi lo əkwo agbmazhniba. Aza n ɓa fyilo n əknyi n a to n əɓa ayei kafyilo n pafyi wyewyeyi nya, ənya n kwo ɓə laka n anyizhni əsa m, ce ɓo wo ɓa əsa n ɓa ɓə gye nyawnanyawna əwye, ntuge əsa lo n kwo ɓəə nyì, ama nsaiye kwo to ye lo m, ama kwo ɓə jezeɓe.

9 "Dəye ye ge a ɓwa bwugba wyemwa nya nu. Atukwo ngwnu-tnaaba ɓa zhni apekwnukwnu ngwnu-tnaaba nu, ado n nyikwo ye sasetu n ɓa nyi. 10 Əɓa nu je asu zhni ngwnu-tnaaba. Ngwnu-atnu ɓá kwu fyí, gbmanyi ye lo, əza n wo ce nyi, wo too ɓe kpa m; ama əsa n wo ɓə ɓe ncei, ɓəshishi nu wo ɓə ɓwa anyìgyi əsa fyewyi nu. 11 Nyawnanyawna n wo ɓə nyì nsaho, ama nsaiye n wo to ye lo nyi m, əwo nu zhni əsu nyimwanyimwayi. Wo dnalo n əɓa ngwnu-tnaaba yi, wo gnyi woi lo əwo agbmazhniba nu.

12 "Amwayi ngwnu-awo n ho ɓə gye nyi, ɓa zhni asu ngwnu-awo nu, n ɓa too gwo əɓa abemi kpa m, ama dna n snukna gbmanyi nu n ɓa ɓə gwo ikwo ncei n zhni asu ń kwnusnu n nyawnanyawnai. 13 Əɓa ɓətukwo gbmanyi nu jesnu ɓa ɓə kwu əɓa kalá n ikwoi ga nyawnanyawnai. 14 Ba ɓə snukwnú n Kwugyasnáyi, ama Kwugyasnáyi ɓə la myi n əɓa ɓo, ntuge wo zhni adagayi aje Dagayi nu, jesnu asu aje Əsui: jesnu əwo aza ayiyiyi ɓə kwnusnu n woi, əwo avyiyi aknyiknyiyi n agbenuyii."

15 Nlonu maləka wa gna mi, "Anuwna n ha gyewye nyi, aba n kaluwa sasetu nyi, ɓa zhni aza nu, deeji yaakwokwo, abye ɓədo n anyitalai. 16 Nyawnanyawna ɓədo n amwayi ngwnu-awoi n ha gyewye nyi, ɓa ɓə wnunu n kaluwa yii. Ɓa ɓə kwu wo zhniagbma jesnu ɓai fa wo gnyi n ɓwotoloyii; ɓa ɓə gyi əwo nayi jesnu ɓai kpe wo əná. 17 Ntuge Shekwoyi wo la kwo dna n əɓa ədu ɓa nu əwo ɓəmwi, əsa n ɓa kwu ye nge ɓa ɓá kwu əɓa begyi ikwo ga nyawnanyawnai, nya əsa n Shekwoyi aɓədagbma ɓə kwu nu. 18 Nyikwoza yi n ho ɓə gye wo əwye nyi, əwo nu zhni əzhiyaakwo n kwo gyi əbe tu n asu anyì nya."