1 Njesnu ma gye maləka woi gbmi shnizhi n əshemi, n ɓwokwnu loloyi anyagwunyai shi jesnu n agbma yaakwoi shi n əwo akwnu. 2 Wa wna tumise fnyakwnufnyakwnu, owa sapa nya, əwo nu zhni gwuzhenyi, kwo Shetam, waa wo pa aye dugwu-gbmanyi. 3 Waa wo sheya dna n ɓwokwnu loloyi, jesnu waa kwo gwu, waa kwo tuznù, nabai to wa fyi aknyi kwoce njesnu m, nya aye dugwu-gbmanyi zozo. N dəye avnu, ɓəshishinu ai la wo loya n ɓwasnu n əsai fyewyi.

4 Ma kwu gye abeshnikpegye, aza yi n ɓa ɓə sase kpe n ɓa, a ɓə kwu ikwoi ga ɓa, ɓa da owa. Njesnu ma gye aza yi wyewyeyi əwye n a ɓə la ɓa kpmiatukwo ntu əɓa ɓəgbmi ɓo tu n Yeisu tukwo jesnu n Shekwoyi ɓədagbmai. Ɓa to ɓə ga nyawnanyawna mwamwa kwo əkwo dogbei m, jesnu ɓa to ɓə gwo əkwo aznù tu n əɓa nyikwnumi kwo n əɓa aɓwa m. Ɓa kwu əɓa wyewyeyi jeɓwa, jesnu ɓa gyibe n kwnusnu n Kirisitii aye dugwu-gbmanyi. 5 (Azafyí n ɓa ce nyi, ɓa to ɓə shna wyewyeyi ɓwa m, nya əsa aye dugwu-gbmanyi zozo.) Dəye nu zhni kalakwu kpmisnuyi. 6 Anabəlikada nu njesnu agyigyiyi nu, n aza yii n ɓa ɓə kwu fyi n kalakwu kpmisnuyi. Əfyi baayi to n kalái lo tu n ɓa m, ama ɓa ɓə kwu zhni Shekwoyi apirisiti nu ɓədo n Kirisiti nyai jesnu ɓai gyibe n kwnusnu n woi aye dugwu-gbmanyi.

7 Əsa n aye dugwu-gbmanyi ɓə la duya, a ɓə gbmi Shetam ya n əwo zhalu 8 Njesnu wo ɓə gbmiya laɓa woi fyi abye kwoce n anyì aɓwakwonu ngwnu-anyi, Gwog n Magogii, woi ye ɓa zhi ntu okwnu ɓo. N namba, əɓa bəgyé wulo ngye amwi nu, kpe n shikwo əgbe. 9 Ɓa tufye lo nya anyìpata jesnu ɓa kwu she Shekwoyi aza apyiznudna gwnu, əzhiyaakwo n wo ɓə ye kwo nyi. Ama əná kwa kwnuɓe n əshemi kwa gyi ɓa ɓwutuu. 10 Njesnu gwuzhenyi, n wo ɓə dna ɓa kwoce nyi, aa wo sheya dna n əná-znudna n kwo gyina n solufoi, aba n a ɓə n nyawnanyawna ɓədo n sheɓəgwognayi katái nyai sheya fyi nyi. Ɓa ɓə kwu fyi n zhowozhowoi n nyipyei n sukwoi nyalonyalo.

11 Nlonu ma gye əbeshnikpegye bwuibwui yaakwo jesnu n əzai n wo ɓə sasetu n kwo nyi. Əknyi ɓədo n əshei ɓai bwusiya n əwo awyeba, jesnu to ɓa ɓwa azhi ba m. 12 Njesnu ma gye azafyifyiyi, azayaakwo n anawyii, n gnyiagnyi zhi n əbeshnikpegye abye, jesnu a kpe apafyi ya. A kpe pafyi ədo ya, n əkwo nu zhni pafyi wyewyeyi nya nyi. A da azafyifyiyi owa vyi ənya n ɓa ɓə kwu zhni ngye she kwo ɓə kafyi n apafyi nyi. 13 Shikwo kwa ga əkwo azafyifyiyi n ɓa ɓə fyi n kwo nyi, jesnu əfyi ɓədo n akwui ɓa ga əɓa azafyifyiyi n ɓa ɓə fyi n ɓa, jesnu a da zahozahoyi owa vyi əɓo n wo ɓə kwu zhni. 14 Nlonu əfyi n akwui a sheɓaya fyi n əná-znudna. Əná-znudna nu zhni əfyi baayi. 15 Zahozahoyi n a to ɓə gye əwo əye əwye n ka dna n pafyi wyewyeyi nya m, a ɓə la wo sheya dna n əná-znudna.