1 A ɓə la nuwnaje ga mi ngye abamwi-bwusi jesnu a gna mi, "Lo ho mwi bəgədi Dagayipwuwa Shekwoyi nya ɓədo n əkwo amwamwagayii.

2 "Ama la akpeda əbmyi nya knaya; to mwu kwo m, ntuge a lá kwo ga Abyedo. Ɓa ɓə kpe əzhiyaakwo gyigyiyi apita apya shiinyi-ceaba nu.

3 "Njesnu mi ɓə knyí əmi aɓəgbmiyi ngwnu-aba, ɓa ɓə da sheɓəgwogna anyipyei dugwu-gbmanyi n tagyi-abacei-shiitnanyi. (1,260) n ajekwokwoi kpe."

4 Əɓa nu zhni zaitu "ashnuwnagnayi ngwnu-aba" n apyitila-kwnuyii ngwnu-aba, jesnu "ɓa gnyiagnyi zhi n Dagayi əknyi nya abye nu." 5 Zahozahoyi n wa zhniatna ge wa wu ɓa, əná kwa kwnu n əɓa agbe kwa gyi əɓa anuwnuyi. Zokwo nu nyi n zahozahoyi n wo ɓa ye wa zhni ɓa əkpí, ɓəshishi nu wa fyí nlai.

6 Ɓa n kalái lo ɓa gwu ashebmana nabai to əgbma kwa zhi dna n əsa n ɓa zhi ɓai da ɓəwyegye nyi m; jesnu ɓa n kalái lo ɓa pmyi nuwna bma kwaa zè ami jesnu ɓa ɓe əknyi n agwnù dəhodəhoi pyai n əsahosahoi n ɓa ncei pma.

7 Əsa n ɓa ɓə pwo n əɓa ɓəgbmi, nyawnanyawna n kwo gbmiɓe n ɓwokwnu loloyi nyi, kwo ɓə snukwnú n ɓai, jesnu kwoi gyi ɓa əsnu, kwoi kwu ɓa wu.

8 Əɓa anayi ɓə kwu zhi n aduba ayaakwo əzhiyaakwo nya, n a yi kwo n ɓədazeshii nge Sodom ɓədo n Masar nyi, aba n a ɓə tu əɓa Dagayi n znudu nyi.

9 A ɓwa anyipyei ngwnu-ata n tokwnui, azahozahoyi ɓai kwnu n əbyé, nyitala ɓədo n əknyii ɓa kwu zhi ɓai shi əɓa anayi awye jesnu to ɓa ye nge a byi ɓa m.

10 Aza n ɓa fyi n əknyi nyi, ɓa ɓə ma ɓa asna jesnu ɓai nya agbmada ɓai tnu aje n anyaga agbmada nyai, ntuge sheaɓəgwognayi ye ngwnu-aba ɓa kwu azhnìgye wu aza n ɓa fyi n əknyi nyi.

11 Ama n anyipyei ngwnu-ata n tokwnuyi avnu, əsnu wyewyeyi nya kwoi kwnu n Shekwoyi aba kwa kwu lofyi ɓa, jesnu ɓa kwukazhi n agnyi, aza n ɓa ɓə gye ɓa nyi, ɓa kwu fyifyiya zhi n ədnai.

12 Nlonu ɓa wo bəgye kaláda kwoi gbmi n əshemi kwoi gna ɓa, "Fye gwnuzhi ɓe ń ya." Nlonu ɓa gwnulo əshemi fyi n ənyìi, əsa n əɓa anuwnuyi ɓə zhi ɓai shiawye.

13 Nsayii əknyi ajeashna yaakwo kwa jeashna jesnu okwu gbmanyi n akwu ngwnu-awo əzhiyaakwo yi nya kwaa laya. Aza adugwu-tnaaba ɓa kwu fyí fyi n əknyi ajeashna yi, aza n ɓa ɓə cezhi n wyewyeyi nyi, ədna kwa wo ɓa jesnu ɓa ga Shekwoyi mwamwa n wo dna n əshemi nyi.

14 Owii baayi kwo la duya; owii taayi ɓe lo wolowolo.

15 Maləka tnaaba yi wa bye əwo mwayi, jesnu a wo abəgye awyiɓeyi latui fyi n əshemi n ɓa ɓə gna:

"Əbemi anyì nya kwo la zè

əyi Dagayi nya ɓədo n əwo Kirisitii,

jesnu wo ɓə gyibe nyalonyalo."

16 Nlonu azakwoyi shiiba-ceanyi, n ɓa ɓə sase kpe n abeshnikpegye n Shekwoyi abye nyi, ɓa yazhi ɓa ga Shekwoyi mwamwa, 17 ɓai gna:

"Yi sa ho ami lo, Dagayi Shekwoyi Kaláda Duduyi Vnyanya,

Əza n wo nyi, jesnu n wo ɓəə nyi,

ntuge ho la əho kalá yaakwo gwo,

jesnu ho la ya hoi gyibe.

18 Abye ɓə kwu minagyi gyi,

əho minagyi napyei kwo la ɓe.

Əsa la si a da afyífyiyi owa,

jesnu a ga əho atnutnuyi sheaɓəgwognayi gyiba ɓədo

n azai n ɓa ga əho əye mwamwa n ɓa wo əho əye ədna,

aza ayaakwo ɓədo n anawyii,

ntuge ho ɓa zhni aza yi agbma n ɓa ɓə zhni əknyi agbma nyi."

19 Nlonu dagayipwuwa Shekwoyi nya dna n əshemi kwaa gwuya gnyi, jesnu dna n əwo dagayipwuwa yi a gye akwati Shekwoyi ɓəgbeshi nya əwye. Njesnu əgbmana kwa bmyana, kwoi sáwyi, kwoi jeawyi kwoi gwoya, anyì ashnaje ɓədo n əgbmashni yaakwoi.