1 N dəye avnu, jesnu ma shiawye, ma gye əshemi abwokwnumi n gwuya gnyi n əmi abye. Bəgye ń mi ɓə kpmi wo kwoi daɓo n mii ngye mwayi nyi kwa gna, "Gwnuzhi ɓe ń ya, ma wu ho aɓo n ɓa zhni ɓəshishi nu ɓa zhni n dəye avnu." 2 N əsagbmanyii, ma gye mi dna n Zafnu, jesnu ma gye əbeshnikpegye dna n əshemi n gnyi n əmi abye n əzahoi sasetu n kwo. 3 Əza n wo sasetu n kwo nyi, wo ɓə wu ngye akwuta amanai ho pya ń ayi ge jaspa ɓədo n rubyii. Shnanyipmana n kwo bmyana n wu ngye emyeral kwuta; n shegwnu əbeshnikpegye yi. 4 Abeshnikpegye aje shiiba-ceanyi ɓə shé əbeshnikpegyei gwnu, n azakwoyi shiiba-ceanyi n sase kpe n ɓa. Ba ɓə n aje abwuibwui nu kpe jesnu n afnunyi azinali nyai kwnu n əɓa tukwo. 5 Əgbmanabmya ɓə gnyi kwoi kwnu kwoi bmyana, jesnu əgbma awyisa n əgbma awyijei kwoi gwoawyiya n əbeshnikpegye abye. Apyitila ngwnu-tnaaba ɓə zhi ɓai gwo əná. Adəye nu zhni azafnu ngwnu-tnaaba Shekwoyi nya.

6 Nlonu cè, gnyi n əbeshnikpegye yi abye, ənya ho ɓə wu ngye shikwo maganyi, ngye əza ɓa gye əwohni n kwo.

N atasni, anya awyewyeyi ɓəə zhi ngwnu-anyi, n shé əbeshnikpegye yi gwnu, jesnu ɓa ɓə n awyekwnunui pwi laɓa; n awyeɓwa n avnuɓwai.

7 Ənya wyewyeyi kpmisnuyi ɓəə wu ngye gaba nu, baayi ɓəə wu ngye nakwo-nugba, taayi ɓəə n awyebai wu ngye zanyikwoci, nyiiyi ɓəə wu ngye znukwo nu kwoi gyeafu.

8 Anya wyewyeyi ngwnu-anyi ye, dəhodəhoi n aɓwasei gyilo ngwnu-tnanyi, jesnu n awyekwnunui shegwnu n əɓa anayi, du n əkwo aɓwasei əmii. N nyipyei ɓədo n sukwoi ɓa to ɓə fa ɓəda ɓo m, ɓai gna:

" ‘Gyigyiyi, gyigyiyi, gyigyiyi nu n

Dagayi Shekwoyi Kaláda Duduyi vnyanyai,’

n wo ɓəə nyi, n wo lo nyi, jesnu ń wo ɓə ɓe nyi."

9 Əsahosahoi n anya wyewyeyi ye ga wo mwamwa n latui n amisai, əwo n wo sasetu n əbeshnikpegye nyi, jesnu n wo nyi nyalonyalo nyi, 10 azakwoyi shiiba-ceanyi yi ɓa knyiakwokwo zhi n əwo abye, n wo sasetu n əbeshnikpegye nyi, jesnu ɓa ga wo mwamwa n wo nyì nyalonyalo nyi. Ɓai ya əɓa afnunyi zhi n əbeshnikpegye yi abye ɓai gna:

11 "Ho kwnuce lo, əyi Dagayi n Shekwoyii,

ha gwo latu n mwamwai n kalái,

ntuge əho nu ɓəə zhni anya vnyanya,

jesnu ntu əho ɓəye nu n a ɓəə zhni ɓa

jesnu ɓai ɓwa əɓahni."