1 Nlonu ma shiawye, ma gye Kwugyasnáyi gnyi n əmi abye, n gnyiagnyi tu n Siyona Əpe, aza adugwu-tagyi-cei-shiinyi-ceanyi (144,000) ɓə kwnusnu n woi, n ɓa ɓə n əwo əye ɓədo n əwo Dada nyai kakpe n əɓa anyikwnumi.

2 Jesnu ma wo kəsnu n əshemi ngye nuwna ɓeɓeyi aɓoci, jesnu ngye əgbmawyije yaakwo. Aɓoci n mi ɓə wo nyi kwo ɓə wo ngye amwulo snáyi nu ɓə zhi ɓai agyi amwulo.

3 Njesnu ɓa kwoanyi woiwoyi zhi n əbeshnikpegye abye jesnu zhi n anya awyewyeyi ngwnu-anyi abye ɓədo n azakwoyii. Zahozahoyi to ɓə myi wa tu anyí ye mwi m akpəge aza 144,000 ye n ɓa kwu shnashna ɓwa ń anyì nyi.

4 Aza yi nu nyi n ɓa to ɓə kpe əɓahni cegye n anyikwozai m, ntuge ɓa ɓə kwu myizhi n kwului. Ɓa vyi Kwugyasnáyi abahobahoi n wa lo. A ɓə si ɓa fyi n azanyikwoci atasni nu jesnu ɓa kwu ɓa ga ngye anya-gyigyiyi kpmisnui n Shekwoyi aba ɓədo n Kwugyasnáyi.

5 A to ɓəə wna ɓa n akatai m. Ɓa zhni a tnaɓəkpeyi aza nu.

6 Nlonu ma gye maləka do woi gyeafu tu lo n anyìbmana atasni, jesnu wo ɓə n nabagyi manai nyalonyalo nyai shi nabai wa da aza n ɓa fyi n anyì nyi; ga əknyi dəhodəhoi, əbyé, nyitala ɓədo n azai.

7 Wa daɓo n bəgyei latu, "Fye wo Shekwoyi ədna jesnu fya la wo tu, ntuge əsa n wo ɓa da owa nyi kwo la si. Ga əza mwamwa n wo ɓə zhni ashemi, anyì, shikwo ɓədo n anuwna-pyipyii nyi."

8 Maləka baayi wa vyi ɓe jesnu wa gna, " ‘Kwo la myiya! Kwo la myiya! Babyila Yaakwo kwo la myiya,’ əkwo nu ɓə zhni aknyi vnyanya ɓa sni əkwo əje nyacei anagbáizhni nya."

9 Maləka taayi wa vyi ɓa ɓe jesnu wa daɓo n bəgyei latui: "Zahozahoyi n wa ga nyawnanyawna mwamwa ɓədo n ənya-jiji əwo dogbe nyai, jesnu wa gwo əznù n əwo nyikwnumi kwo n əwo əɓwa, 10 əwohni ce, wo ɓə sni əje Shekwoyi minagyi nazhii nya, n a la zeya fyi n nunui n əbwe əwo minagyi napyei nya. A ɓə tu wo n zhowozhowoi n solufo nagyii n amaləka agyigyiyi awyeba, ɓədo n Kwugyasnáyi. 11 Njesnu awú əɓa zhowozhowo nya ɓə kwuka gwnulo nyalonyalo. Snusnu to lo n nyipyeii kwo n sukwoi, ntu aza yi ɓo n ɓa ɓə ga nyawnanyawna mwamwa ɓədo n ənya-jiji əwo dogbe nyai nyi m, kwo ntu əzahozahoyi ɓo n wo ɓə la atuzè əwo əye nya gwo m." 12 Dəye wu ge Shekwoyi aza ɓa ɓwa bwugba əmìfyi nya; əɓa n ɓa n Shekwoyi ɓəda ɓəgbetui shiɓwa, jesnu n myizhi n agbenui dna n Yeisu.

13 Nlonu ma wo bəgye kwoi gbmi n əshemi kwa gna, "Kanya ye: Anabəlikada nu n azafyifyiyi n ɓa fyí fyi n Dagayi, ənya n kwo laka nsaiye kwoi lo n abye nyi." Zafnu da lo, "Əə, ɓa ɓə kwu snu ń əɓa atnutnu, ntuge əɓa atnutnu ɓəə vyi ɓa."

14 Mi ɓə shiawye, ma gye ənyìi bwuibwui n gnyi n əmi abye, jesnu əza n wo ɓə sasetu n ənyìi nyi, wo ɓə wu ngye əza nugwnu nu n fnunyi zinali nyai kwnu n əwo tukwo n lumizhegye gyigyíi shi n əwo akwnu.

15 Nlonu maləka do wa gbmiɓe n Dagayipwuwa, wa yì əza n wo ɓə sasetu n ənyìi nyi, "La əho lumizhegye ha gbe, ntuge əsa nyagbe nya kwo la si, ntuge anyì dòdò əsa kwo la si."

16 Ntulonu əza n wo ɓə sasetu n ənyìi nyi, wa dna əwo lumizhegye n anyì, waa anyì dò.

17 Maləka ədo wa gbmiɓe n Dagayipwuwa, n əshemi, əwohni ce ɓə n lumizhegye gyigyíi shi.

18 Dudulonu maləka, n əná ɓə fyi n əwo akwnu nu nyi, wa gbmiɓe n bəgədi wa yì əza n bəgyei latu n wo ɓə n lumizhegye gyigyíi shi nyi, "La əho lumizhegye gyigyíi, ha ye anam gyigyi agada zhi n anyì ha ɓe ncei, ntuge əkwo agyigyi kwu ɓyi."

19 Maləka wa du əwo lumizhegye dna n anyì, wa ye əkwo agyigyii zhi jesnu wa sheɓaya fyi n Shekwoyi anamnuwnapyiba yaakwo əwo minagyi napyei nya.

20 A dna jemwunyi byei fyi n anamnuwnapyiba n kwo gbmiya gnyi n əzhiyaakwo nyi, jesnu ami ɓa zhè n əgbmapyi aba, ń lawu n asná ngye dokwo aluzhamyi asná, n əkpaai ngye Kyilomita 300.