1 Mi ncei pma fya kpe she mi snukwnú lo n əwyei bmyibmyii nsnu ntu n fye ɓo ɓədo n aza yii n ɓa fyi n Lawudisiya nyi, jesnu aza vnyanya n ɓa too shni mi wyegye nyi m.

2 Əmi ɓəmwi nu nyi nge ɓa myizhi ń ədu, jesnu ɓaa nyimaaje fyi n yeye, nabai n ɓa ɓá ɓwa nyaɓwa nunui gənyikpe nya vnyanya, ntuge ɓa myi ɓa kpe asigyi Shekwoyi nya ye, n wo nu zhni Kirisiti nyi. 3 Dna n əwo nu ń nyaɓwa wyemwa nya vnyanya n ɓəyekpei sofyi. 4 Mi gna fye dəye nabai to əzaho wa myi wa dna fye kwoce ǹ aɓədagbma adadai n aɓənakpajei m. 5 Kwo shikwonyi mi to kwnusnu lo n fyei dna ń nayi m, ama mi kwnusnu lo n fyei dna n zafnu, jesnu agbmada mi lo shi mi gye fye n əfyehnii tatai jesnu she əfye gaiciyaganunui n myignyi lo dna ń Kirisiti.

6 Ntulonu, n ɓwasnu shi fye ɓə gwo Kirisiti Yeisu n zhni Dagayi nyi, fye gyiabye fya gyi əfye anyì fyi n wo, 7 n agbegyei sasayi, fya kwu fyehni mikpegwnu dna n wo. N akalái fyífyii fyi n gaiciyaganunui ngye shi a ɓə wu fye nyi, amisa ɓai kwnuɓe ciici fyi n əfye.

8 Fye to ye əzaho wa wna fye fyi ń kwocedna n ɓəyekpe yaakwo tna-loloyii m, ədo n kwo kpema n zanyikwoci kwnunu nu ɓədo n ase nukwoi akwnuyii anyì ye nya, toge n kpema n Kirisiti m. 9 Ntuge dna n Kirisiti nayi nu n Ikwoda Duduyi vnyanya dogbe gyianyì dna n nunui, 10 jesnu dna ń Kirisiti nu ń a kwu ɓe n fyei fyi n nunu. Əwo nu zhni tukwoda tu n kalá dəhodəhoi ɓədo n ikwoi. 11 Njesnu dna n əwo nu n a ɓə znu fye anya, toge nyaznui n a zhni kwo n zanyikwoci aɓwai m. A ɓə la əza kwokwoi leifyizhni nya znuya n kwo ɓə zhni kwoi gyibe tu n əfye nayi əsa n a ɓə znu fye ənya dna n Kirisiti nyi. 12 Shi a ɓə kwu fye kwnubyi n woi dna n batizima, njesnu aa fye kwnu kalakwu n woi dna n əfye gaiciyaga dna n Shekwoyi tnutnuzhni, ń wo ɓə la wo kala ń əfyi nyi.

13 Əsa ń fye ɓə fyifyiyi fyi ń əfye aleifyi jesnu dna n əfye nayi tnanyaznui, Shekwoyi wa ga fye wyewyeyi n kwnusnu n Kirisitii. Wa zo yi əyi aleifyi vnyanya. 14 Woi la əyi ətashishi leifyi owa nya wnuya, n kwo ɓə tu gnyi n yi, jesnu kwaa yi znuknyi; wo la kwo ya, waa kwo kwnu kwusa tu n znudu. 15 Njesnu shi wo ɓə la akwnukaya gwo n azafnu akalá nya n aikwoi, waa ɓa dna vnyinkwo pəipəi, woi gyi nasala tu n ɓa n znudui.

16 Ntucenu fye to ye zahozahoyi wa da fye owa ntu n ənya ɓo n fye gyi kwo n fye sni m, kwo ntu n awyefna shekwoznashni nya m, Əpya Woiwoyi awyefna, kwo Asibyiwyi m. 17 Aɓo ye zhni jejelukwo nu aɓo nya n ɓa ɓə ye ɓa ɓe nyi, ama a ɓwa əɓo hnihnii shi dna ń Kirisiti nu. 18 Fye to ye zahozahoyi n wo dagbma dna n tukwogba kwocedna nya ǹ amaləka mwamwagai, wa ci fye aɓoya m. Aza yi pya jesnu zhni ɓa da aɓobəgyé ntu aɓo ɓo n ɓa kwu gyewye nyi; ɓa mwa əɓahni tukwo fyi n aɓənubwozhni gbəloi tnazafnu nya. 19 Ɓa la kaya n dəgyi n tukwoi, aba n kwo ɓwa bmazhni jesnu n nayi yegwnuaje n abagbmanyi n əkwo ajii ɓədo n asnukwnui, kwoi mwa, shi Shekwoyi zhni kwo kwoi mwa.

20 Shikwonyi fye ɓə kwu fyí ń kwnusnu n Kirisitii n zafnu akwnuyi anyì nya ye nyi, knyiɓei nu zhni ngye fye ye zhni anyì nya nu, fyei vyi əkwo agbetu: 21 "To shiɓwa m! To towo m! To toɓwa ma a"? 22 Aɓəknyi ye pya n ɓa todo lo n anyai vnyanya n əɓa apma duya nyi, ɓa ɓwa kpmima n zanyikwoci azanga aɓocekpe nu n nyawui. 23 Aɓəknyi ye pya wulo ngye ɓa n wyemwai lo, ntu əɓahni gaga fyi n mwamwaga əɓa ɓəye nya, n tukwogba akatá nyai, njesnu ɓai tu əɓahni nayi azhnì, ama ɓa to n kalái lo n kwo ɓa kpma ɓa nayi shakpe wo m.