1 Əfye, fye ɓə fyifyiyi nu fyi n kwnukwnuiya n ofye n aleifyii; 2 shi fye ɓə zhni fyei gyianyì n wu, əsa n fye ɓə wna anyì ye zokwo ɓədo n begyiyi əse əbemi nya, zafnu n wo zhni tnutnu nsaiye fyi n aza yi ń ɓa ta vyi ɓəgbetu m. 3 Əyi vnyanya ce, yi ɓə kwu anyì gyi fyi n ɓa, dna ń saho, yii dagbma fyi n pwawonukwoi əyi nayi nya, jesnu yii vyi əyi aɓəpwawo ɓədo n aɓonubwozhnii. Ngye azaje n ɓa ce nyi, yi ɓə kwnuce ya gwo minagyi napyei nu. 4 Ama ntu əwo yeye yaakwo ɓo ga yi, Shekwoyi, ń əwo snusnugye mwalo nyi, 5 waa yi kwukazhi n wyewyeyi n kwnusnu ń Kirisitii, kwo əsa n yi ɓə fyifyiyi fyi n əyi kwnukwnuiya n ofye; n ɓəmanai nu n a la fye gnyi. 6 Njesnu Shekwoyi wa kwu yi kala zhi n kwnusnu n Kirisitii, wa kwu yi sase kpe ń kwnusnu n woi fyi n ashebmana dna n Kirisiti Yeisu. 7 Nabai nge cala n kwo ɓəlo n abye nyi, n wo ɓə myi wa wu nyaɓwa əwo shebmyashi nya n a taa myi a mwukwodo m, n wo kwu kwo wu yi dna n əwo shebmyashi dna n Kirisiti Yeisu. 8 Ntuge n ɓəmanai nu ń a la fye gnyi, ntu gaiciyaga ɓo; jesnu dəye to zhni əfye ɓəzhni nu m, kwo zhni Shekwoyi nyaga nu. 9 Toge ntu ń atnutnuzhni ɓo nu m, nabai ń zahozahoyi taa gyigbe m. 10 Ntuge yi zhni Shekwoyi aɓwa tńutńu nu, n wo ɓə zhni dna n Kirisiti Yeisu, ya zhni atnutnu amanai, ado n Shekwoyi ɓə la ɓa zhnizhi ga yi n sapa, nge ya zhni nyi.

11 Ntucenu, fye pa ge n sapa, əfye n a ɓə ma fye n zhni Abyedo nyi, jesnu aza yi n ɓa yi əɓahni nge anyaznuyii, ɓai yi fye nge, "atnanyaznuyii" (ənya n a zhni dna n nayi n azanyikwoci aɓwai). 12 Fye pá nge dna nsayii, fye ɓə kpmikpmiiya n Kirisiti, n kwnukwnuiya ń Israila əbyé, jesnu n zhni aɓəgbeshi azhiɓeyi, ntna awyetu, jesnu ntna Shekwoyi fyi n anyì. 13 Ama nsaiye, dna n Kirisiti Yeisu, əfye n fye ɓə mwakpa n woi nsaho nyi, a kwu ɓe n fyei vyivyiwyi ntu Kirisiti ami ɓo.

14 Ntuge Kirisiti n əwohni tukwoi nu zhni əyi bwugbafu, n wo la akwu ngwnu-aba yeɓədo, jesnu wo kwu abagwu-zokwo zhniagbma, ənya n kwo ɓe n nuwnu nyakwnupa ajegnai. 15 Wo kwu owa zo dna n əwo nayi ɓədo n əkwo awyidnai n əkwo aɓəgbekpei. Əwo ɓəmwi nu ɓə nyì nge, wa zhni əza woiwoi dna n wohni, woi gbmi n aza ngwnu-aba nabai a ɓwa bwugbafu. 16 Njesnu dna n nayi gbmanyi, wa kwu ɓa je yeɓədo n kwnusnu ga Shekwoyi n znudui, zokwo n wo ɓə wu əɓa nuwnu ncei nyi. 17 Wa ɓe wa zhni waazi bwugbafu nya ga fye, n fye ɓə taya zhi n kpaai nyi, jesnu bwugbafu ga aza n ɓa ɓə wo vyivyiwyi nyi. 18 Ntuge dna n əwo nu n əyi ngwnu-aba yi la zokwo ɓwa lo Dada aba n Zafnu gbmanyii.

19 Ntu dəye ɓo, fye to ye zhni aknyidoda nu, kwo azhiɓeyi m, ama aknyida n kwnusnu n Shekwoyi azai, jesnu Shekwoyi apwuwada. 20 A n fyei mikpe n atnutnuyi shnipa nu ɓədo n asheɓəgwognayi nyai, ń Kirisiti Yeisu əwohni tukwo nu zhni nyaknuɓwakwonu kwuta tukwo nyi. 21 Dna n əwo nù n nyakwnu vnyanya yeɓədo n aba gbmanyi, kwoi mwagwnu kwaa zè dagayipwuwa gyigyiyi dna n Dagayi. 22 Njesnu dna n əwo nu ce, ń a gnyi ai mi fye ɓədo fya kwu zè aseseba, aba n Shekwoyi sase dna n əwo Zafnu.