1 Ami Pita, abọsịd Yisọs Krais, ñwet ñwed ami nnọ esọk mbon a-Abasi amekke, mme adidʌñ, e-esuanake eyọhọ Pọntus, Kalesia, Kapadosia, Esia ye Bitinia, 2 mbon a-Abasi Ete amaakemek, asañake akekem ke ifiọk Abasi Ete, ato ke adiyet asana ake Sịbidịd, nọ esuuk iwuod enọ Yisọs Krais enyʌñ esiime ammọ iyiib amọ ke idem.

Yak mfọn ye emem aba ye ndufo eduek-eduek.

3 Itooro anie Abasi ye Ete Abọọñ ñnyịn Yisọs Krais! Ke ekamba mbọm amọ, anye a-anam ñnyịn imana ufa idʌk ke uwem idodanyen ato ke adised Yisọs Krais ke ñkpa, 4 ye udeeme i-imiidiibiarake, itakka, inyʌññọ ikpəho uduud. E-enịm udeeme ami ke hefịn inọ ndufo. 5 Mbuọdidem ifʌk ndufo ke adudu Abasi tutu adisịm ini e-ediiyaara adinyaaña e-enịmme ebet akpatre ini. 6 Ke ntoro, ndufo inekke idaara, akpesʌkado idahami, ke etək ini, nsio-nsio idomo eyaenam ndufo eba ke mfʌhọ. 7 Mme ñkpọ ami etịppe nọ mbuọdidem ndufo e-eduuñọke ekịt ke ado akpanikọ, a-asọññọ udua akan kold, a-abiarake akpesʌkado edommo ke ikañ, akpekappa ado ñkpọ itooro, ye ubọọñ ye ukpono ke emaeyaara Yisọs Krais. 8 Akpesʌkado a-ndufo imiikịtte anye, ndufo emema anye, ñko akpesʌkado a-ndufo imiikịtte anye idahami, ndufo emenịm anye ke akpanikọ enyʌñ eyọhọ ye idadesịd ake inua imiikanna itañ a-anyʌññọ ayọhọ ye ubọọñ. 9 Sia ndufo ebọ utịb mbuọdidem ndufo a-adooho adinyaaña ukpọñ ndufo.

10 Ke abaña adinyaaña ami, mme prọfed e-eketañña prọfesi ebaña mfọn e-ediinọ ndufo emaetekke idem eduuñọ, 11 eyem adidiọọñọ ini a-mme ñkpọ Sịbidịd Krais a-akebaaha ke esịd ammọ aketañ abaña ndutʌhọ Krais ye ubọọñ a-adiidi. 12 Emaeyaara ewọt ammọ ke ammọ ikinamma ñkpọ adinwam idem ammọ, ado ke ekinwam ndufo ke ini ammọ eketañña ukem ikọ emaeketatañ inọ ndufo ato ke inua mbon e-ekwọrọke eti etob inọọ ndufo ke Adisana Sịbidịd e-ekenọọhọ ato hefịn. Mme enyere ke idem ammọ e-enie udọñ adinyuuñọ nse mme ñkpọ ami.

13 Ke ntoro, ibeeñe esịd ndufo ayọhọ-ayọhọ inyʌñ iwuuk idodanyen ndufo ke mfọn e-ediinọ ndufo ke emaeyaara Yisọs Krais. 14 Nte nditọ nsuukiwuod, ikiiyak idem ndufo inọọ idiọọk udọñ a-ndufo ekenieghe, ke ini a-ndufo imiikinieghe ifiọk. 15 Ado kpa naña andikood ndufo ado adisana, ndufo ñko inịm idem ndufo asana ke afịd ñkpọ se ndufo enam. 16 Sia e-ewet ete: "Isana, sia ami ndo adisana."

17 Sia ndufo ekoodo Ete i-imiifegheke awo anyen, ado abiide ikpe anọ awo akeene adinam amọ, idu uwem ndufo ke uteeñe Abasi nte isenawo ke ederimbod. 18 Sia ndufo emediọọñọ ke awo ikidatta uyaha mbiaña ñkpọ nte silfa me kold ifak ndufo isio ke idiọọk eduuwem a-aketooho mme eteete ndufo isịm ndufo, 19 ado ekedat nsọñudua iyiib Krais ifak ndufo, nte iyiib abaak edọñ, a-ananake ndo. 20 Emaemek anye enịm mbemiso ebot ederimbod, ado ediyaara anye ke akpatre ini ami ke ntak ndufo. 21 Ato ke anye, ndufo enịm Abasi ke akpanikọ, a-akenamma anye aset ke ñkpa anyʌñ anọ anye ubọọñ. Ke ntoro mbuọdidem ye idodanyen ndufo aba ke Abasi.

22 Idahami, sia ndufo imaikinam idem ndufo asana ke adisuuk iwuod nnọọ akpanikọ nọ ndufo ekan enie ataa ima enọ nditọeka ndufo ke Krais, ima emọ-emọ ye ntotəño ima a-atooho awọñesịd ndufo. 23 Sia ndufo emaemaana emana ufa, itooho ñkpasi akemeke adikpa, ado emana edʌk ubon i-imiidiibiarake, ato ke ikọ Abasi a-aduuho uwem anyʌñ aba ke nsi-nsi. 24 Sia,

"Afịd awo eba nte mbid,

afịd ubọọñ ammọ anyʌñ abit ñkpokpoñ ke inwañ;

mbid asaat, uyai ñkpokpoñ ayeeme anyʌñ abeghe,

25 ado ikọ Abasi aba ke nsi-nsi."

Ndin ami ado ikọ e-ekekwọrọke inọọ ndufo.