1 Ami Pọọl, Sailas ye Timoti, inọọ etob ami esọk ufọkabasi mbon Tesalọnika ke Abasi Ete ye Abọọñ Yisọs Krais. Mfọn ye emem aba ye ndufo.

2 Ñnyịn imisikọọm Abasi afịd ini ke ntak afịd ndufo, inyʌñ isịn afịd ndufo ke akam ñnyịn. 3 Ñnyịn imisitoiyo ndufo afịd ini ke iso Abasi Ete ke abaña utom ndufo a-atooho mbuọdidem, akpọsọñ utom ndufo e-enamma ke ima, ye ime a-ndufo enieghe ke ntak idodanyen ke Abọọñ ñnyịn Yisọs Krais.

4 Sia ñnyịn imidiọọñọ, mme nditọeka* ke Krais A-Abasi a-amaaha, ke anye imek ndufo, 5 sia eti etob ñnyịn ikisañake ye ikọ inua ikpọọñ, ado ye adudu ñko, ye Adisana Sịbidịd ye adinekke nnịm ke akpanikọ. Ndufo emediọọñọ naña ñnyịn ikidu uwem ke atu ndufo ke ntak ndufo. 6 Ndufo emaikpebe ñnyịn ye Abọọñ, sia ke unana adikere mbana akpọsọñ ndutʌhọ ndufo, emaebọ etob ke inemesịd A-Adisana Sịbidịd anọọhọ. 7 Ke ntoro ndufo emaekappa edoñño uwọdñkpọ enọ afịd mme andinịm ke akpanikọ ke Masidonia ye ke Akaya. 8 Etob Abọọñ amaatop awuọ ito ndufo, idooho ke Masidonia ikpọọñ ye Akaya, ado e-ekop etob mbuọdidem ndufo ke Abasi ke afịd itie. Ke ntoro, ñnyịn inieghe ñkpọ ndomokeed aba se itañ ibaña anye, 9 sia ammọ ke idem ammọ e-enọ mbʌk se ikitịppe ke utọ adidaara a-ndufo ekidaarake ñnyịn. Ammọ e-etañ naña ndufo ekekappa ekeene Abasi, ekpọñ mme usọsọiñkpọ, enyʌñ enam ñkpọ enọ aduuwem Abasi akpanikọ, 10 ndin ebet Ayịn amọ a-atooho hefịn, a-anye akenamma aset ke ñkpa, a-adooho Yisọs, i-inyaañake ñnyịn asio ke ekamba ifiobesịd a-adiidi.