1 Ado mme prọfed abiaña emaebiọññọ ke ufọọd mbon awo kpa naña mme andikpeeb abiaña ediinyʌñ iba ke ufọọd ndufo. Ammọ eyaedịbe edat asen ukpeebñkpọ nsobo edi, enyʌñ ekañ Abọọñ andikara a-akedeppe ammọ, ndin edat usọp-usọp nsobo enọ idem ammọ. 2 Uwak awo eyaenyʌñ ekeene usʌñ abʌkidem ammọ, ndin ato ammọ, mme awo eyaetañ idiọọk ikọ edian usʌñ akpanikọ. 3 Ke idiọọk itọñ ammọ mme andikpeeb abiaña ami eyaenam udod eto mbʌk a-ammọ enamma ke idem ammọ. Tọọñọ ke esed ubiomikpe amaadodoro ammọ ke iwuod, ndin nsobo ammọ inyʌññọ ikpeene.

4 Sia adieke Abasi imiikiyakka mme enyere e-ekedueghe ebọkkọ, ado atop ammọ aduọọk ke itie ufen ikañ, anyʌñ asịn ammọ ke ñkịm-ñkịm ukpe, ate enịm ammọ do tutu ubiideikpe; 5 adieke anye imiikinyʌññọ iyak akaan ederimbod abọkkọ, ado adat mmọọñ ukwọ asobo mbon i-imiikikponoke Abasi, ndin akpeme Nua, akwọrọ adinenido ye awo itiaba mfen; 6 adieke anye akesuaha anọ Sọdọm ye Komora ke adifọp ammọ nọ ekappa ntọñ, anyʌñ adat ammọ anam uwọdñkpọ anọ mbon i-imiidiọọñọke Abasi; 7 ñko, adieke anye akenyaañake Lọọd, adinen awo, a-akefʌhọke abaña abʌd-abʌd ido mbon i-imiinịmme mbed 8 (sia naña adinen awo ado akedʌñ ke atu ammọ, se anye akekịt anyʌñ akop akenam eti esịd amọ akịt mfʌhọ ke usen ke usen ye atịme-atịme adinam ammọ). 9 Adieke adooho ntoro, Abọọñ adiọọñọ naña adiinyaaña mbon e-ekponoke anye, asio ammọ ke idomo, ado anịm mme idiọọk awo ke itie ufen tutu asịm usen ikpe; 10 akpan-akpan mbon e-eduuho uwem ekeene idiọọk itọñ abʌkidem enyʌñ emiom mme akama ukara.

Ammọ edoñño mbon usanya anyen ye mbon ntañidem, ndin ndịk inamma ammọ adisueeñ mme adudu anyọñ; 11 ado mme enyere akpesʌkado e-ekoppo idem enyʌñ enie udịd ekan ammọ, itañña ikọ nsueñ ye utọ ibon ado ke emaeben edi ikpe ke iso Abọọñ. 12 Ado mbon ami etañ ikọ nsuukuyio ebaña mme ñkpọ se imiinwañake ammọ. Ammọ eba nte mme unam i-imiinieghe akikere, mme unam e-enamma ñkpọ naña ekịt, e-emanake ke uduod unam nọ emʌm ammọ ewot; ndin nte mme unam i-imiikereke ñkpọ, ammọ ñko eyaetak.

13 Eyaenọ ammọ utịb idiọọk akeene idiọọk a-ammọ enamma. Se ammọ edat nte udia uwem ado ammọ adidu abʌd-abʌd uwem ke ufọọd uweemeayio iba. Ammọ edoñño ñkpọ abuud ye asuenne, ke ini adooho ammọ esʌk ekop inem adidu abʌd-abʌd uwem ado esʌk ekeene ewana ke usọrọ ye ndufo. 14 Afịd akikere ammọ ayọhọ ye efịbe, inyʌññọ itre adinam idiọọkñkpọ. Ammọ etap mbon i-imiinieghe iwuuk; edoñño mbon akpọsọñ idiọọk itọñ ye mbon isuuñọ! 15 Ammọ ekpọñ nnen-nnen usʌñ enyʌñ ewọññọ ekeene usʌñ Balaam ayịn Besa, a-akemaaha utịb ibak: 16 Ado dọñki amaasua idiọọk ido amọ anọ anye, unam i-imiikanna ikọ itañ, amaatañ ikọ ke uyio awo, anyʌñ anam idaad prọfed ado atre.

17 Mbon ami edoñño idịm i-imiisakkake mmọọñ ye ntuhube ayobio abenne afịme aboiyo. Ataa abubịd ekịm ke enịm enọ ammọ. 18 Sia ammọ etañ ikpu-ikpu ikọ ñkpooninua enyʌñ edat adukpo ido a-asañake ye idiọọk itọñ abʌkidem etap mbon e-ebọkkọke mbon e-ebaaha ke ndudue. 19 Ammọ enwọñọ adinọ ammọ uwuọufʌn, ke ini adooho ammọ ke idem ammọ edoñño ifʌn abʌd-abʌd ido ammọ, sia awo adʌk afʌn anọ ñkpọ se ikara anye. 20 Sia adieke ammọ emaekebọkkọ mbiara ederimbod ami ke adidiọọñọ Abọọñ ye Andinyaaña ñnyịn Yisọs Krais ndin emaana ekesịn idem ke ñkpọ se isappa awo, enyʌñ eyaak ñkpọ ado akan ammọ ubọk, utịd ammọ ayaadiọọk akan akpa. 21 Akpaakefọn ammọ adikpitre adikidiọọñọ usʌñ adinenido akan adidiọọñọ, ndin ewọññọ ekpọñ adisana ewʌhọ e-ekenọọhọ ammọ. 22 Mme ñke ami edo akpanikọ ke uwem ammọ: "Ewa atịmme abịne akikọi amọ," ñko, "Edi e-eyette idem amaana akaa akewere ke mbad."