1 Yịn mmi, sọọñọ idem mfo ke adudu mfọn a-atooho Krais Yisọs. 2 Ben mme ikọ se akekop ke inua mmi ke iso uwak ntiense yaak nọ mme anam akpanikọ e-ediikan ikpeep mbon mfen. 3 Ñkeene miin biom ukuud nte eti awo ekọñ Krais Yisọs. 4 Awo ndomokeed a-anamma utom ekọñ ibenne idem amọ ikikọp ke ndubeghe uwem ñkaña awo, ado adomo ukeme adinam se inem etubom ekọñ esịd. 5 Ñko, awo akeedodo a-akaaha nduba ikemeke adibọ anyanya, ibọhọke asaña ke item ye mbed. 6 Akpena eti anam utom inwañ ado andito ndia mfịd inwañ ado. 7 Kere baña se ntañ ami, sia Abọọñ ayaunọ ifiọk abaña afịd ñkpọ ami.

8 Toiyo ke Yisọs Krais a-akesette ke ñkpa, aketo ubon Defid. Ami ado eti etob a-ami ñkwọrọke, 9 a-anamma nọ eñkọp miin ke ñkpọnọ nọ mbọ ufen nte awo ñwo. Ado awo ikọppọ ikọ Abasi ke ñkpọnọ. 10 Ke ntoro, ami ñyọ afịd ñkpọ ke ntak ufọn mbon A-Abasi amekke, nọ ammọ ñko enie adinyaaña a-atooho Krais Yisọs, enyʌñ ebọ nsi-nsi ubọọñ.

11 Ikọ ami ado ataa akpanikọ ete:

Adieke ñnyịn ikikpaaha ye Krais,

ñnyịn iyaidu uwem ye anye.

12 Adieke ñnyịn inieghe ime,

iyaida ubọọñ ye anye.

Adieke ñnyịn ikañña anye,

anye ayaikan ñnyịn.

13 Adieke ñnyịn inanake mbuọdidem,

anye asʌk ado anam akpanikọ,

sia anye ikemeke ikañ idem amọ.

14 Kaa iso toiyo ammọ mme ñkpọ ami. Dʌt ammọ utọñ ke iso Abasi ate ammọ ekuutọhọ utọk ebana ikọ inua. Utọk inamma ufọn ndomokeed, utu ke ado ababiat mme andikop. 15 Domo afịd ukeme mfo adiwọt Abasi idem nte awo enyịmmeke, anam utom i-imiinieghe ntak adikop abuud, awo atʌmmọ akama ikọ akpanikọ. 16 Sio idem kpọñ ikpu-ikpu ndutañña a-akemeke inam mme awo ewuọñọ ekpọñ usʌñ Abasi. 17 Ukpeebñkpọ ammọ ayaatara nte inia. Ke atu utọ ibon ami edo Haimenius ye Filetus, 18 e-emaekewuọ ekpọñ akpanikọ. Ammọ ebo ke adiset ke ñkpa amaadadat itie, ndin ebiat mbuọdidem ubaak awo. 19 Kpayeado, itiad idakisọñ Abasi asọọñọ ada, enyʌñ emịñ anye ye mme ikọ ami: "Abọọñ adiọọñọ mbon se ido ake Amọ," ñko: "Afịd awo se itommo anyịñ Abasi ana esịññe idem ekpọñ ibak."

20 Idooho ñkpọ kold ye silfa ikpọọñ esibono ke ekamba ufọk. Mme ñkpọ se edat eto ye aduañ enam esibono do ñko. Esikama usʌk enam asaña-asaña ñkpọ, enyʌñ ekama usʌk enam mme adaña-adaña ñkpọ mfen. 21 Adieke awo asịññeke idem akpọñ idiọọkñkpọ, anye ayaado asaña-asaña ñkpọutom, enam asana, ado se Eteufọk adat anam utom, enyʌñ ebeeñe enịm enọ nti utom akeedodo.

22 Feghe kpọñ idiọọkitọñ uyịn, nyʌñ bịne adinenido, mbuọdidem, ima ye emem ke atu mbon e-ekoodo Abasi ke adisana esịd. 23 Kpọñ idiọọk ye ndisịme eniin sia amediọọñọ ke asiben utọk adi. 24 Asañautom Abasi inaaha aba utọk-utọk; ado ana afọn ido ye afịd awo, ado eti andikpeeb a-anieghe ime, inieghe udu. 25 Ana ekama nsuukidem enọ mme abiọọñọ ikọ Abasi ukpeebñkpọ, ye idodanyen nte ke Abasi ayaanam utọ ibon ado ekappa esịd, enyʌñ enie ifiọk a-atooho akpanikọ, 26 ndin ke ammọ eyaedidiọọñọ idem, enyʌñ efeghe ekpọñ afia andidiọọk, a-asịnne ammọ ukad anyʌñ anam ammọ enam uduak amọ.