1 Ami Pọọl, Sailas* ye Timoti, inọọ ñwed ami esọk ufọkabasi mbon Tesalọnika ke Abasi Ete ñnyịn ye Abọọñ Yisọs Krais. 2 Mfọn ye emem a-atooho Abasi Ete ye Abọọñ Yisọs Krais akpekap aba ye ndufo.

3 Akpena ñnyịn isikọọm Abasi afịd ini inọ ndufo, nditọeka* ke Krais, ndin a-anen adinam ntoro, sia mbuọdidem ndufo asʌk anekke akọt, ndin ima a-afịd ndufo enieghe enọ emọ-emọ asʌk atọt. 4 Ke ntoro, ñnyịn imikpọ inua ke atu mme ufọkabasi ibaña nsịnifịk ye mbuọdidem ndufo ke afịd ndutʌhọ ye idomo a-ndufo eyọọhọ.

5 Afịd ami ado ntiense ke ubiideikpe Abasi ado adinen, ndin nte ibọọrọ, eyaibat ndufo ke emedot ke abioubọọñ Abasi a-ndufo ebọọhọ ufen ebaña. 6 Abasi ado adinen, ndin anye ayaakpe utịb mfịna anọ mbon i-inọọhọ ndufo mfịna, 7 ayaanyʌñ ibiommo ndufo ufen e-ebọọhọ, ye ñnyịn ñko. Ami adiitịppe ke emaeyaara Abọọñ Yisọs eto hefịn ke ekamba edeme ikañ ye mme enyere e-enieghe akpọsọñ adudu. 8 Anye ayaamia mbon i-imiidiọọñọke Abasi ufen, i-imiinyʌññọ isuuk iwuod inọ eti etob Abọọñ ñnyịn Yisọs. 9 Eyaenọ ammọ ufen ye nsi-nsi nsobo enyʌñ ekʌk usʌñ esio ammọ ke iso Abọọñ ye ke ubọọñ adudu amọ 10 ke usen a-anye adiidi idiyaara ubọọñ ke mme ndisana awo; ñko adiido utịppe ñkpọ ñkpaidem ke atu mbon e-enịmme ke akpanikọ. Ndufo ñko esịne ke atu ami, sia ndufo emaenịm ikọ ntiense a-ñnyịn ikitañña inọọ ndufo.

11 Sia inieghe ami ke esịd, ñnyịn ibọñ akam inọ ndufo afịd ini, ite Abasi ñnyịn akpenam ndufo edot ikood amọ, ndin ato ke adudu amọ anye anam afịd nti uduak ndufo ye afịd adinam a-atooho mbuọdidem ndufo asu. 12 Ñnyịn ibọñ akam ami, nọ anyịñ Abọọñ ñnyịn Yisọs akpebọ ubọọñ ke idem ndufo, ndin ndufo ñko ke anye, nọ asaña akekem ke mfọn Abasi ñnyịn ye Abọọñ Yisọs Krais.