1 Ñkpisọñ, ami Yọọn, nnọ ñwed ami esọk edima ufan mmi Keyọs, a-ami mmaaha ke akpanikọ.

2 Edima ufan mmi, akam mmi ado yak afo aba ke nsọñidem, yak ñkpọ anyʌñ ufọn fiin kpa ukem naña afọn ye ukpọñ mfo. 3 Mmaanem esịd eti-eti adikop naña usʌk mme andinịm ke akpanikọ enọ ntiense ebo ke afo amenam akpanikọ anyʌñ asʌk aka iso asaña ke akpanikọ. 4 Inemesịd mmi anekke akpon ke adikop ke nditọ mmi esaña ke usʌñ akpanikọ.

5 Edima ufan, afo amenam akpanikọ ke utom Abasi a-afo anamma anọọ nditọeka* ke Krais, akpesʌkado a-ammọ edooho isenawo mfo. 6 Ammọ e-enọ ikọ ntiense ke atu ikọd Abasi ebaña ima mfo. Mbọk sio ammọ unyọñ ke usʌñ a-anemme Abasi esịd. 7 Sia aketo ke ntak Anyịñ ado ammọ ewuọ ekaa, ibọọhọ unwam ndomokeed ito mbon i-imiidiọọñọke Abasi. 8 Ndin ana ñnyịn isịn unwam inọ utọ ibon ado, nọ ikeene ido nsaña utom usuan etob akpanikọ.

9 Ami mmaawet ñwed nnọ esọk ufọkabasi, ado Diotrefes, a-amaaha isido adaiso, ikinyịmmeke adidaara ñnyịn. 10 Ke ntoro ami mmaadi, ñyaanam ediọọñọ se anye anam, ye ndiọi ikọ inua a-anye atañña idian ñnyịn. Anye iyʌkkọke ke ado, a-asịn adidaara mme andinịm ke akpanikọ mfen e-ediighe. Idooho ado kpọd, anye akaiso adibiọọñọ mbon se ikpinyịmme adinịm ke akpanikọ, abịn ammọ asịññe ke ufọkabasi.

11 Edima ufan, kuukeene udʌk usʌñ idiọọk, ado keene se ido eti. Awo a-anamma se ifọn ato Abasi. Awo akeedodo se inam ndiọiñkpọ idiọọñọke Abasi. 12 Afịd awo e-etañ nti ikọ ebaña Demitrus, kpa akpanikọ ke idem amọ. Ñnyịn ñko imitañ nti ikọ ibaña anye, ndin afo amediọọñọ ke ikọ ntiense ñnyịn ado akpanikọ.

13 Mmenie uwak ñkpọ se ñkpewet unọọ fiin, ado ñyemme adidat ñwed ye mmọọññwed ñwet. 14 Mmenie idodanyen ke idiikpeeneke ñyaadukịt fiin iso ye iso, ndin iyainie nneme iso ye iso.

15 Yak emem aba ye afo.

Mme ufan ke umi enọ ekọọm. Kọọm mme ufan ñnyịn do ke anyịñ ke anyịñ.