1 ke ayọhọ usen edịb mme keed ke ayọhọ afiọñ itiaba, ikọ Abọọñ amaato prọfed Hakai adi: 2 "Tañ nọ Serubabel ayịn Sieltiel, adaiwuod ukara ke Yuda, nọ Yọsua ayịn Yosadak, akwa aku, ñko ye afịd mme ñyọhọnsʌhọ awo. Bịp ammọ, 3 ‘Anie awo ke atu ndufo se isʌhọ akekịt ufọk ami ke akaan ubọọñ amọ? Idahami anye abadie? Nte anye ibaaha ndufo nte ikpu-ikpu ñkpọ? 4 Ado idahami, sọñ idem Serubabel,’ Abọọñ atañ. ‘Sọñ idem, Yọsua ayịn Yosadak, akwa aku. Isọñ idem, afịd ndufo mbon isọñ,’ Abọọñ atañ, ‘inyʌñ inam utom. Sia ami mmọdo mba ye ndufo,’ Abọọñ Andikponñkan atañ. 5 ‘Ami ado se ami ñkenwọñọ ye ndufo idaha a-ndufo ekewuọñọke ke Iyib. Ñko sịbidịd mmi mmọdo aba ye ndufo. Ikiikop ndịk.’

6 "Se Abọọñ Andikponñkan atañ ado ami: ‘Ke etək-etək ini ami ñyaamaana ñnyeeñe mme hefịn ye isọñ, akpainyañ ye nsaad isọñ. 7 Ami ñyaanyeeñe afịd mme idịd, ndin se ido udọñ afịd mme idịd ayaadi, ndin ami ñyaayọhọ ufọk ami ye ubọọñ,’ Abọọñ Andikponñkan atañ. 8 ‘Silfa ado ake mmi kold ñko ado ake mi,’ Abọọñ Andikponñkan atañ. 9 ‘Ubọọñ ufọk anye ami ayaakpon akan ubọọñ akaan ufọk,’ Abọọñ Andikponñkan atañ. ‘Ñko ke itie ami ñyaanọ emem,’ Abọọñ Andikponñkan atañ."

10 Ke ayọhọ usen edịb mme inaañ ke ayọhọ afiọñ usʌkkeed, ke ayọhọ isua iba a-Adidem Dariọs akedaaha ukara, ikọ Abọọñ amaadi abịne prọfed Hakai: 11 "Se Abọọñ Andikponñkan atañ ado ami: ‘Ibịp mme aku se mbed atañ: 12 Adieke awo abenne unam e-emaekediọñ ke ñyeriye afọñ amọ, ndin ñyeriye afọñ ado atuuk usʌk uyo me abak, me ukọd, adan ọlif me ndidia mfen, nte anye asʌk ado se emaekediọñ?’ "

Mme aku emaebọọrọ, "Iyoo."

13 Ndin Hakai amaabo, "Adieke awo asappake idem amọ ato adituuk akpo adituuhọ keed ke atu mme ñkpọ ami, nte esappa anye?"

Mme aku ebọọrọ, "Ii, e-esappa."

14 Ndin Hakai amaabo, " ‘Naña aba adom ye mbon ami ye mme idịd ami ke iso mmi,’ Abọọñ atañ. ‘Se adodo a-ammọ ekpenamma, ye se adodo a-ammọ ekpenọọhọ ke itie ado e-ekappa se emaesappa.

15 " ‘Idahami nekke kọọk iwuod baña ñkpọ ami tọọñọ ke mfịn ami kaa iso, kere baña naña ñkpọ akeba mbemiso eben itiad keed edot ke anyọñ itiad mfen ke tembịd Abọọñ. 16 Awo ndomokeed a-akediighe ebono udomo ñkpọ edịb, duob kpọd akesʌhọ. Awo ndomokeed a-akekaaha itie unịm abañ ukọd adikoi udomo ñkpọ aba mme duob, edịb kpọd akesʌhọ. 17 Ami mmaawot afịd ubọkutom ndufo ye idiọọk udọñọ, ntọdibọ ye edịmitiad, ado ndufo ikitịmmeke iñkeene miin,’ Abọọñ atañ. 18 Tọọñọ ke usen mfịn, tọọñọ ke ayọhọ usen edịb mme inaañ ami ke afiọñ usʌkkeed, inekke ikọọk iwuod ibaña usen e-ekesịnne itiad idakisọñ ufọk tembịd Abọọñ. Inekke ikọọk iwuod ibaña: 19 Nte mfịd ndomokeed asʌhọ ke itie unịm mfịd? Tutu awuọ idahami, mme fain ye mme eto fik, ye pomekrened ye eto ọlif inwịmme mfịd.

" ‘Tọọñọ ke usen mfịn, ami ñyaudiọñ fiin.’ "

20 Ikọ Abọọñ amaadisịm Hakai ayọhọ akañ iba ke ayọhọ usen edịb mme inaañ ke afiọñ ado: 21 "Dọkkọ Serubabel adaukara ke Yuda ate ke ami ñyaadinyeeñe mme hefịn ye ederimbod. 22 Ami ñyaayʌt mme ebekpo ubọọñ ñkappa ñnyʌñ nsuan adudu mme abioubọọñ asen idịd. Ami ñyaasio mme sariọd ye mme andiwad nduọñọ; mme enañmbakara ye mme andiwad eyaeduọññọ keedekeed ato ke akañkañ ayịneka amọ awodeen.

23 " ‘Ke usen ado,’ Abọọñ Andikponñkan atañ ate, ‘Ami ñyauben fiin, ayịnufọk mmi Serubabel ayịn Sieltiel,’ Abọọñ atañ, ‘ndin ñyaunam fiin nte ñkpannuun idiọọñọ mmi, sia ami mmaumek fiin,’ Abọọñ Andikponñkan atañ."