1 Ke isua duob mme inaañ amaakeboiyo, ami mmaamaana ndọọk ñkaa Yeruselem, ini anyem ñkesaña ye Banabas ye Taitọs. 2 Ami ñkeka adinam uyio adiyaara añkebọọhọ nọ ato do mben eti etob a-ami ñkekwọrọke nnọ mme Gentile nnịm mme adaiwuod ke iso. Ami ñkenam ami mbaak adido ufeghe itọk mmi akedo ikpu-ikpu. 3 Kpayeado, ukpọk Taitọs a-akebaaha ye ami, awo ikibooho anye ke ana afọọrọ edʌd, akpesʌkado a-anye akedooho awo Greek. 4 Ñkpọ ami aketịppe sia mme nsu-nsu mbon i-imiinịmme ke akpanikọ emaesọọp edʌk atu ñnyịn adiyep ñkpọkñyak a-ñnyịn inieghe ke Krais Yisọs nọ ato do isịn ñnyịn ke ufʌn. 5 Ñnyịn ikiyaaha idem inọ ammọ ke usʌñ ndomokeed, nọ akpanikọ eti etob akpesʌhọ ye ndufo.

6 Amaado mbon e-ekenọọhọ asaña-asaña ukpono, se ammọ ekedodo iwuọñọke ñkpọ ndomokeed ke iso mmi; sia Abasi isatta awo ndomokeed. Ammọ ikidianna ñkpọ ndomokeed ke ukwọrọikọ mmi. Utu ke ado, ammọ emaediọọñọ ke ekeyaak ukwọrọ ikọ nnọọ mme Gentile ensịn miin ke ubọk, naña Pita akenie adikwọrọ nnọọ mme Yuu. 7 Ke akanna ado, ammọ emaedikịt ke emaennọ miin ubiọñutom adikwọrọ eti etob nnọọ mbon i-imiidiọọñọke Abasi*, kpa naña ekenọọ Pita akekwọrọ anọ mbon e-emaekefọọrọ edʌd*. 8 Sia Abasi a-akebaaha ye Pita ke utom ammọ nte abọsịd mme Yuu, mbon e-efọọrọke edʌd, akenyʌñ aba ye ami ke utom mmi nte abọsịd mme Gentile. 9 Yems, Kefas ye Yọọn, e-ekedoññoke mme adaaha emaikọọm ñnyịn ubọk adinyịmme ke ami ye Banabas ñko ido mme abọsịd ke ammọ emaekekịt mfọn A-Abasi akennọọhọ miin. Ammọ emaenyịmme ebo yak ñnyịn ibịne mme Gentile, ke ini ammọ ebịneke mbon e-efọọrọke edʌd. 10 Ukweeñe se ammọ ekibeeñe ñnyịn akedo yak ika iso itoiyo mbon uweene, a-adooho ñkpọ a-ami ñkenieghe udọñ adinam afịd ini.

11 Ke ini Kefas amaakedi Antiọk, ami mmaanie ntuaaha ye anye iso ye iso, sia anye akeba ke ubiomikpe. 12 Sia mbemiso mbon a-Yems akesiooho adọñ ekedisịm, anye amaasidia ñkpọ ye mme Gentile, ado ke ammọ emaekedisịm anye amaatọọñọ adisịkke nda ñnyʌñ mbakka idem amọ ñkpọñ mme Gentile, sia anye akebaak mbon e-ekesịneke ke atu mbon e-efọọrọke edʌd. 13 Mme Yuu mfen emaekeene anye ebakka eda ke unam utom anyen awo, ndin amaato ke ntak ami, emaenam Banabas ñko awakka akpọñ usʌñ.

14 Ke ini ami ñkekịtte ke ammọ ikinamma ñkpọ nọ akekem ye akpanikọ eti etob Abasi, ami mmaabo Kefas ke iso afịd ammọ nte: "Afo ado awo Yuu, ado afo adu uwem nte Gentile, uduuho nte Yuu. Nsinam nọ afo abo ke ana mme Gentile ekeene esaña ke eduuwem mme Yuu?

15 "Ñnyịn se ido mme Yuu ke emana, i-imiidooho mme anam idiọọkñkpọ nte mme Gentile, 16 imidiọọñọ ke ikpe itoppoke awo ikeene adinịm mbed, ado ato mbuọdidem ke Yisọs Krais. Ke ntoro, ñnyịn ñko imikọọñ mbuọdidem ñnyịn ke Krais Yisọs nọ ñnyịn inie utoppo ikpe ke Krais, idooho ke adinịm mbed, sia awo ndomokeed idiibọọhọ utoppo ikpe ito adinịm mbed.

17 "Ado adieke ñnyịn, ke adinwana adibọ utoppo ikpe ke Krais, ñnyịn i-idoññoke Yuu ikịt ke ñnyịn idoñño mme anam idiọọkñkpọ, nte ado iwọttọ ke Krais adadaara idiọọkñkpọ? Idooho ntoro ke baaba usʌñ ndomokeed! 18 Adieke ami mmaanake mbọp se mmaakewuut, mmenam ediọọñọ ke ami ndo abiad mbed.

19 "Sia ke ntak mbed ke ami ñkekpa nnọ mbed nọ ato do ami ndu uwem nnọ Abasi. 20 Emaeñkọñ miin ye Krais ndin idooho ami ndu uwem aba, ado Krais adu uwem ke idem mmi. Idahami, uwem a-ami nduuho ke abʌkidem, ndu ke mbuọdidem ke Ayịn Abasi, a-akemmaaha miin anyʌñ ayaak idem amọ annọ miin. 21 Ami nnəkko mfọn Abasi nnịm ñkañ keed, sia adieke ekpebọọhọ adinenido eto mbed, akpewuọñọ ke ñkpa Krais akedo utak-utak!"