1 Kpañ utọñ kop se Abọọñ atañ:

"Dakka da, kpe ikpe mmi ke iso mme ekamba abod;

yak mme ntək abod ekop se afo anie aditañ.

2 "Ikop utọk Abọọñ, ndufo mme ekamba abod;

ikpañ utọñ, ndufo mme nsi-nsi itiad idakisọñ ederimbod.

Sia Abọọñ anie utọk ye ikọd amọ;

anye akoot Isrel ikpe.

3 "Ikọd mmi, nsoo ke ami inam ndufo?

Ke die ke ami ifiik ndufo? Imbọọrọ miin.

4 Ami ñkisio ndufo ke Iyib,

ñnyʌñ ifak ndufo nsio ke isọñ ufʌn.

Ami mmaadọñ Moses nte idat ndufo usʌñ,

kpa ye Erọn ye Miriam.

5 Ikọd mmi, itoiyo

se Balak adidem Mọb akeduak

ye se Balaam ayịn Beo akebọọrọ.

Itoiyo isañ ndufo tọọñọ ke Sitịm tutu Kilkal,

nọ ato do ndufo etoiyo mme ndinen adinam Abọọñ."

6 Nsoo ke ami ndiiben ndi iso Abọọñ

ñnyʌñ ntuak iwuod nnọ ñkoñ-ñkoñ Abasi?

Me ami ñkpedi ke iso amọ ye ufọfọb uwa,

ye nditọ enañ e-esọññọ isua keed?

7 Me Abọọñ ayaanem esịd ye mme tọsịn akukịmedọñ,

ye udiọọñ adan ọlif tọsịn duob?

Me ñkpenọ akpa ayịn mmi ke ndudue mmi,

mfịd idem mmi ke idiọọkñkpọ ukpọñ mmi?

8 O awo, anye uwọt fiin se ifọn.

Ndin nsoo ke Abọọñ ayem uto fiin?

Adinam se inen ñnyʌñ mma mbọm,

ñnyʌñ nsaña ke nsuukidem ye Abasi mfo.

9 Kpañ utọñ! Abọọñ asʌk akoot abio,

ndin adibaak anyịñ mfo ado aniọñ.

"Kpeme esañ ye Awo a-akemekke anye.

10 Afo ufọk ndoom, me akpena ami nsʌk mfre mme inie a-afo akenieghe ke idiọọk usʌñ,

ye imək udomoñkpọ efa*, a-adooho emaesuuñọ?

11 Me a-ado se ami ñkpetoppo awo a-akamake mme ukwañ udomoñkpọ,

ye ekpad ndiọi udomoñkpọ?

12 Mme imọ awo ndufo edo mbon afai;

mbon e-edʌñọke ye ndufo edo mbon nsu

ndin edeme ammọ etañ ikọ abiaña-abiaña.

13 Ke ntoro, ami mmetọọñọ adisobo ndufo,

aditahade ndufo ke ntak mme ndiọiñkpọ ndufo.

14 Eyaedia ñkpọ ado idiikoppo uyʌkkọ;

idịb ndufo adiisʌk inaa ukpọk.

Ndufo eyaetañ ebono ado idikịtte ndomokeed,

sia se ndufo etañ ebono ami ñyaayaak nnọ akañkañ.

15 Ndufo eyaetọ ado idọkkọ;

eyaenyịmme adan ọlif, ado idiidatta adan ado inam ñkpọ,

eyaenuak kreb ado idiinwọññọ ukọd ado.

16 Ndufo emenịm ewʌhọ Omri

ye afịd mme edinam ke ufọk Ehab;

emekeene mme eduuwem ammọ.

Ke ntoro ami ñyaiyaak ndufo nsịn ke atahade,

mbon ndufo ekappa edo ñkpọ ndọk;

eyaeyọ nsaha eto mme idịd."