1 शमुवेल 2

हन्नाहचे प्रार्थनागीत

1 तेव्हा हन्नाहने प्रार्थना केली आणि म्हणाली:

"माझे हृदय याहवेहमध्ये आनंद करीत आहे;

याहवेहमध्ये माझे शिंग*2:1 शिंग येथे याचा अर्थ सामर्थ्य उंच केलेले आहे.

माझे मुख माझ्या शत्रूंपुढे बढाई मारते,

कारण याहवेहने दिलेल्या उद्धारात मी आनंद करते.

2 "याहवेहसारखे कोणीही पवित्र नाही;

तुमच्याशिवाय दुसरे कोणीही नाही;

आमच्या परमेश्वरासारखा दुसरा कोणताही खडक नाही.

3 "फार गर्वाने बोलत राहू नका,

किंवा तुमच्या मुखाला उद्धट बोलणे करू देऊ नका,

कारण ते याहवेह परमेश्वर आहेत जे सर्वज्ञानी आहेत,

आणि त्यांच्याद्वारे कृत्ये तोलली जातात.

4 "योद्ध्यांचे धनुष्य तुटलेले आहेत,

परंतु जे अडखळले, ते शक्तीने सज्ज झाले आहेत.

5 ज्यांच्याकडे भरपूर होते ते आता अन्नासाठी मजुरी करीत आहेत,

परंतु जे भुकेले होते ते आता भुकेले नाहीत.

जी अपत्यहीन होती तिने सात लेकरांना जन्म दिला आहे,

परंतु जिला अनेक मुले होती ती क्षीण झाली आहे.

6 "याहवेह मृत्यू आणतात आणि जिवंतही करतात;

ते कबरेत घेऊन जातात आणि तिथून वरही काढतात.

7 गरिबी आणि संपत्ती याहवेह पाठवितात;

ते नम्र करतात आणि उंचही तेच करतात.

8 ते दीनांस धुळीतून वर काढतात,

आणि गरजवंतास राखेच्या ढिगार्‍यातून वर उचलून घेतात;

ते त्यांना राजपुत्रांबरोबर बसवितात,

आणि त्यांना वतन म्हणून सन्मानाचे आसन प्राप्त होते.

"कारण पृथ्वीचा पाया याहवेहचा आहे;

त्यावरच त्यांनी जग स्थापले आहे.

9 ते आपल्या प्रामाणिक सेवकांची पावले सांभाळतील,

परंतु दुष्ट अंधकारमय ठिकाणी शांत केले जातील.

"कोणीही बळाने विजय पावत नाही;

10 जे याहवेहचा विरोध करतात त्यांचा चुराडा होईल.

सर्वश्रेष्ठ याहवेह स्वर्गातून गर्जना करतील;

पृथ्वीच्या शेवटचा न्याय याहवेह करतील.

"ते आपल्या राजाला सामर्थ्य देतील,

आणि आपल्या अभिषिक्ताचे शिंग उंच करतील."